Read PEYMANA NÛ 2017 (ÎNCÎL) Meta 24 Bible Online

Meta 24 - PEYMANA NÛ 2017 (ÎNCÎL) bible

Meta 24

¹Û gava Îsa ji Perestgehê derket û çû, şagirtên wî hatin cem wî ku xaniyên Perestgehê nîşanî wî bidin.

²Îsa jî bersiv da wan û ji wan re got: Ma hûn van hemûyan nabînin? Bi rastî ez ji we re dibêjim: Li vir kevir li ser kevir namîne ku, neyê hilweşandin!

³Wexta ku Îsa li ser Çiyayê Zeytûnê rûniştîbû, şagirtên wî bi tenê hatin cem wî û ji wî pirsiyan: Ji me re bêje, ma ew tiştana dê kengê bibin? Nîşana hatina te û dawiya vê dinê dê çi be?

⁴Îsa bersiv da û ji wan re got: Hay ji xwe hebin, nebe ku kes we ji rê derxîne!

⁵Ji ber ku gellek dê bi navê min bên û bêjin: Mesîh ez im û dê gellekan ji rê derxînin!

⁶Hûn ê dengê şeran û gotinên şer bibihîzin, hay ji xwe hebin ku, hûn netirsin; ji ber hewceye ku ev tişt bibin; lê belê hîn dawî nîne.

⁷Ji ber ku gel li hember gelan û qiraletî li hember qiraletiyan rabin, cîh cîhan dê birçîtî, weba û erdhejînan bibin.

⁸Lê hemûya van tiştan, destpêka jana ne.

⁹Wê wextê dê tengasiyê bidin we, we bikujin û bona navê min hemûya gelan ji we bikerihin.

¹⁰Û wê gavê gellek tilpekî bibin, hev û din didin dest û ji hev û din bikerihin.

¹¹Û dê gellek peyxamberên sexte derkevin û gellekan ji rê derxînin.

¹²Û ji bo zêdebûna xerabiyê, dê hezkirina gellekan sar bibe.

¹³Lê belê kî ku heta dawiyê ber xwe bide, ew ê xelas bibe.

¹⁴Û ev Mizgîniya Serweriyê, bona ku ji hemûya netewan re şahdeyiyê bike, dê li hemûya dinê ve bête waz dayîn û dawî dê wê demê were.

¹⁵Niha, gava tiştê têkçûnê tîne û mekruh ya ku bi navgîniya Danîêl peyxamber ve hatiye gotin[1], hûn li cîhê pîroz çikandî bibînin – bila xwendevan fêhm bike –,

¹⁶wê wextê yên ku li Cîhûstanê ne, bila birevin çiyan;

¹⁷yê li ser xanî ye, bila ji wir neyê xwarê ku, ji mala xwe tiştekî bigire

¹⁸û yê ku li nav zeviyê ye jî, bila bona girtina eba xwe venegere.

¹⁹Lê belê wey li ducanî û berdergûşa, di wan rojan de!

²⁰Dua bikin ku, bila reva we li zivistanê, an jî di roja Sebtê de nebe.

²¹Ji ber ku wê wextê tengasiyekî ûsa mezin dê bibe ku, ji destpêka dinê ve heta niha mîna wê nebûye û tu car dê nebe jî.

²²Ger ew rojana nehatana kurt kirin, tu kes xelas nedibû; lê belê ji bona xatirê bijartiyan dê ew rojana bên kurt kirin.

²³Wê wextê, ger yek ji we re bêje: A vay, Mesîh li vir e! an jî: Ew li wir e! bawer nekin.

²⁴Ji ber ku Mesîhên sexte û peyxamberên sexte dê derkevin, elamet û nuwazeyên mezin bikin ku, ger mimkun be bijartiyan jî ji rê ve derxînin.

²⁵A vay, min ji berê ve ji we re got.

²⁶Ger ew ji we re bêjin: A vay, ew li çolê ye! dernekevin, an bêjin: A vay, ew di oda hindur de ye! bawer nekin.

²⁷Ji ber ku çawa birûsk ji rojhilatê derdikeve û heta rojavayê xuya dike, dê hatina Lawê Mirov jî ûsa be.

²⁸Ji ber ku li ku derê berate[1]hebe, qertel jî li wir bicivin.

²⁹Lê belê hema li pey tengasiya wan rojan, dê roj tarî bibe û heyv ronahiya xwe nade; dê sterk ji ezmên bikevin û dê qudretên ezmanan bihejin.

³⁰Wê gavê nîşana Lawê Mirov dê li ezmanan xuya bibe û wê gavê hemûya neteweyên dinê li xwe bixin û dê hatina Lawê Mirov li ser ewrên ezmanan bi quwet û bi bilindahiya mezin ve bibînin.

³¹Û ew ê milyaketên xwe bi boriya dengbilind ve bişîne û milyaket dê bijartiyên wî ji aliyekê ezmên heta aliyê wê yî din, ji her çar bayî ve bicivînin.

³²Lê belê ji dara hêjîrê ve dersê bigirin: Wexta ku guliyên wê nerm dibin û pelikên wê şîn dibin, hûn zanin ku havîn nêzîk e.

³³Ûsa wexta ku hûn jî van hemû tiştan bibînin, bizanibin ku ev tişt nêzîk e; li ber deriya ye.

³⁴Bi rastî ez ji we re dibêjim: Heta ku ev hemû tişt çênebin, va nifşeya derbas nabe.

³⁵Dê erd û ezman derbas bibin, lê belê gotinên min derbas nabin.

³⁶Lê belê di derheqê wê rojê û saetê de, ne milyaketên ezmanan, ne jî Law; lê xeynî Bav kesek tiştekî nizane.

³⁷Çawa ku di rojên Nûh de bûn, di hatina Lawê Mirov de jî dê ûsa bibe.

³⁸Ji ber çawa ku wan rojên berî tofanê mirovan dixwarin û vedixwarin, dizewicîn û mêr dikirin, heta wê roja ku Nûh kete keştiyê

³⁹û mirov pê nehisiyan, heta ku tofan rabû û hemû xeniqîn; dê hatina Lawê Mirov jî ûsa be.

⁴⁰Wê wextê du mirov dê li nav zeviyê bin, dê yek bê girtin û yek bê hiştin.

⁴¹Du pîrekê li aşê genim dihêrin hebin û dê yek bê girtin û yek bê hiştin.

⁴²Ji ber vê yekê, hişyar bimînin; ji ber hûn nizanin ku, Xudanê we dê kîjan rojê bê!

⁴³Lê belê vêya bizanibin ku, ger xwediyê malê zanîbûya ku diz kîjan saetê bihata, dê hişyar bimaya û nedihişt ku mala wî qul bikirina.

⁴⁴Bona vê yekê hûn jî amade bin; ji ber ku Lawê Mirov di saetekê de bê ku, hûn ne li bendê ne.

⁴⁵Bi wî awayî, ma kî ye ew xulamê dilsoz û baqil ku, efendiyê wî ew danî ser xulamên xwe, bona di wextê de xwarina wan bide wan?

⁴⁶Xwezî bi wî xulamî ku, wextê efendiyê wî bê, wî di xizmetekî ûsa de bibîne!

⁴⁷Bi rastî ez ji we re dibêjim: Dê efendî wî dayne ser hemû malên xwe.

⁴⁸Lê belê ger ew xulamê xerab di dilê xwe de bêje: Dê efendiyê min dereng bê

⁴⁹û dest pê bike, li hevalên xwe yên xulam bixe û tevî yên serxweş bixwe û vexwe,

⁵⁰dê efendiyê wî xulamî di rojek ûsa de bê ku, ew ne li benda wî ye û di saetek ûsa de ku, ew pê nizane.

⁵¹Û dê wî bike du parî û para wî dê tevî durûyan bide; li wir dê girî û qirçîniya diranan bibe.