Read PEYMANA NÛ 2017 (ÎNCÎL) Meta 25 Bible Online

Meta 25 - PEYMANA NÛ 2017 (ÎNCÎL) bible

Meta 25

¹Wê çaxê Serweriya Ezmanan, dê bibe mîna deh qîzên azib ku qendîlên xwe rahiştine û çûne pêşwaziya zavê.

²Ji wan pênc baqil û pênc bêaqil bûn.

³Ji ber gava ku yên bêaqil qendîlên xwe rahiştin, rûn bi xwe re negirtin.

⁴Lê belê yên baqil, rûn jî di qaban de tevî qendîlên xwe bi xwe re girtin.

⁵Lê belê gava ku zava dereng ket, xew ket ser hemûyan û di xew de çûn.

⁶Û nîvê şevê qêrînek hat: A vay, zava tê! Derkevin pêşiya wî!

⁷Wê wextê hemû qîz rabûn û qendîlên xwe amade kirin.

⁸Û yên bêaqil ji yên baqil re gotin: Ji rûnê xwe bidin me, ji ber ku qendîlên me ditemirin!

⁹Lê belê yên baqil bersiv dan û gotin: Na, dibe ku rûn ji me û we re têrê neke; ya qenc, hûn herin cem yên rûn difiroşin û ji bo xwe bikirin!

¹⁰Û dema ew çûn ku rûn bikirin, zava hat û ew qîzên ku amade bûn, tevî wî ketin dawetê û derî hate girtin.

¹¹Paşê qîzên din jî hatin û gotin: Ya Xudan, ya Xudan, li me veke!

¹²Lê belê wî bersiv da û got: Bi rastî ez ji we re dibêjim: Ez we nas nakim!

¹³Ji ber vê yekê hişyar bimînin! Ji ber ku hûn ne bi rojê û ne jî bi saeta ku Lawê Mirov tê dizanin.

¹⁴Ji ber ew mîna zilamê ku gava çû welatekî din, bangî xulamên xwe bike û malê xwe emanetî wan bike ye.

¹⁵Wî li gor hunerê wan, pênc telant[1]da yekî, du telant da yekî û telantek jî da yekî û derkete rê.

¹⁶Yê ku pênc telant girtibû hema çû, bi wan danûstendinê kir û pênc telantên din qezenc kir.

¹⁷Bi vî awayî yê ku du telant girtîbûn jî, duduyên din qezenc kirin.

¹⁸Lê belê yê ku telantek girtîbû, çû erd kola û pereyê efendiyê xwe veşart.

¹⁹Û piştî demeke dirêj efendiyê wan xulaman hat û tevî wan hesabê xwe dît.

²⁰Yê ku pênc telant girtîbûn, pêş de hat, pênc telantên din jî anîn û got: Efendî, te pênc telant dabû min, a vay, min pênc telantên din jî qezenc kir.

²¹Efendiyê wî jê re got: Aferîn, xulamê qenc û dilsoz! Tu di nav tiştên kêm de dilsoz bûyî, ez ê te deynim ser gellek tiştan; bikeve şênahiya efendiyê xwe!

²²Yê ku du telant girtîbû jî hat û got: Efendî, te du telant dabû min, a vay, min du telantên din jî qezenc kir.

²³Efendiyê wî jê re got: Aferîn, xulamê qenc û dilsoz! Tu di nav tiştên kêm de dilsoz bûyî, ez ê te deynim ser gellek tiştan; bikeve şênahiya efendiyê xwe!

²⁴Lê belê yê ku telantek girtîbû jî hat û got: Efendî, min dizanibû ku wekî tu mirovekî hişk î û cîhê ku te neajotiye, tu diçinî û cîhê ku te belav nekiriye, berhev dikî

²⁵û ez tirsiyam, çûm û telantê te di erdê de veşartim; a vay, malê te ji te re be!

²⁶Lê belê efendiyê wî bersiv da û ji wî re got: Xulamê xerab û zexel! Ma te dizanîbû ku, ez ji cîhê ku min neajotiye diçinim û cîhê ku, min belav nekiriye, berhev dikim?

²⁷Wê çaxê divê te perê min bida bankêran; gava ku ez bihatima, min ê pereyê xwe tevî selefa wî ve bigirta.

²⁸Ji ber vê yekê, wî telantî ji wî bigirin û bidin yê ku deh telantên wî hene!

²⁹Ji ber ku yê kî hebe, dê jê re bê dayînê û bê zêde kirin. Lê belê yê kî tune be, ya ku pê re heye jî dê jê bê girtin!

³⁰Û vî xulamê bêkêr bavêjin tariya derve! Li wê derê dê bibe girî û qirçîniya diranan.

³¹Lê belê wexta ku Lawê Mirov hemû milyaketan pê re û bi mezinahiya xwe ve bê, hingê dê li ser texta xwe yî bilind rûne;

³²hemûya gelan dê li ber wî bicivîn û ew ê wan ji hev û din veqetîne, çawa ku şivan mîhan ji bizinan vediqetîne.

³³Dê mîhan bide milê xwe yî rastê û bizinan bide milê xwe yî çepê.

³⁴Wê wextê Qiral, dê ji yên ku li aliyê xwe yî rastê ne re bêje: Ya hûn, pîrozên Bavê min, werin, Serweriya ku ji bona we ji destpêka dinê ve amade bûye, mêras bigirin!

³⁵Ji ber ku ez birçî bûm û we xwarin dan min; ez tî bûm û we av dan min; ez xerîb bûm û we min girtin hundir;

³⁶ez tazî bûm û we kinc li min kirin; ez nexweş ketim û we serîdankê li min kirin; ez di girtîgehê de bûm û hûn hatin cem min.

³⁷Wê wextê dê yên salih bersivê bidin wî û bêjîn: Ya Xudan, ma kengê me te birçî dîtin û xwarinê da te, an te tî dîtin û av da te?

³⁸Û kengê me te xerîb dîtin û te girtin hundir, an jî te tazî dîtin û kinc li te kirin?

³⁹Û kengê me te nexweş an di girtîgehê de dîtin û em hatin cem te?

⁴⁰Dê Qiral bersivê bide û ji wan re bêje: Bi rastî ez ji we re dibêjim: Madem ku we ji van birayên minî herî biçûk yekî re kir, we ji min re kir!

⁴¹Wê wextê ew, dê ji yên ku li aliyê xwe yî çepê ne re jî bêje: Yên lanet lê bûyî! Ji cem min herin nav agirê abadîn ku, ji bona Îblîs û milyaketên wî amade bûye!

⁴²Ji ber ku ez birçî bûm û we xwarinê nedan min, ez tî bûm û we avê nedan min;

⁴³ez xerîb bûm û we min negirtin hundir; ez tazî bûm û we kincan li min nekirin, ez nexweş û di girtîgehê de bûm û hûn nehatin cem min!

⁴⁴Wê wextê ew ê jî bersivê bidin û bêjin: Ya Xudan! Ma kengê me te birçî, an tî, an xerîb, an tazî, an nexweş, an jî di girtîgehê de dîtin û me ji te re xizmetê nekirin?

⁴⁵Wê wextê ew ê bersivê bide wan û bêje: Bi rastî ez ji we re dibêjim: Madem ku we ji vana yên herî biçûk yekî re nekir, we ji min re jî nekirin!

⁴⁶Û vana herin ezabê abadîn, lê belê yên salih dê herin jiyana abadîn!