Read PEYMANA NÛ 2017 (ÎNCÎL) Meta 28 Bible Online

Meta 28 - PEYMANA NÛ 2017 (ÎNCÎL) bible

Meta 28

¹Û piştî Sebtê, ber ve roja yekem ya hefteyê de, di dema dest pê kirina berbangê de, Meryema Mejdelanî û Meryema din hatin ku li gorê binihêrin.

²Û a vay, erdhejîneke mezin bû; ji ber ku milyaketekî Xudan ji ezmanan hate xwarê û hat kevir gindirand û li ser rûnişt.

³Xuyabûna wî mîna birûskê bû û kincên wî mîna berfa sipî bûn.

⁴Nobedar ji tirsa wî lerizîn û bûn mîna miriyan.

⁵Û milyaket bersiv da û ji jinan re got: Hûn metirsin! Ji ber ez dizanim ku hûn li Îsayê ku hatibû xaçkirin digerin.

⁶Ew ne li vir e; ji ber ku ew rabûye, mîna ku wî gotîbû. Werin, ew cîhê ku Xudan razayîbû, bibînin!

⁷Û zû herin, ji şagirtên wî re bêjin: Ew ji nav miriyan rabûye û a vay, ew berî we diçe Celîlê û li wir hûn ê wî bibînin. A vay, min ji we re got!

⁸Jin bi tirs û şabûneke mezin hema ji gorê çûn, reviyan ku ji şagirtan re bêjin.

⁹Û a vay, di wê demê de Îsa rastî wan hat û got: Silav ji we re! Ew jî nêzîkî wî bûn, xwe avêtin lingên Îsa û ji wî re secde kirin.

¹⁰Wê wextê Îsa ji wan re got: Metirsin; herin û ji birayên min re bêjin ku, bila ew biçin Celîlê û ew ê li wir min bibînin!

¹¹Wexta ku ew diçûn, a vay, hinek ji leşkerên nobedar hatin bajêr û hemû tiştên bûyî ji serokên kahînan re gotin.

¹²Û piştî ku ew tevî kalepîran civiyan û şêwirîn, zehf pere dan leşkeran û gotin:

¹³Bêjin, şagirtên wî şev hatin û gava ku em di xew de bûn, ew dizîn.

¹⁴Û ger ev xeber bigihêje guhê walî, em ê wî bixapînin û em nahêlin tu zirar bê we.

¹⁵Wan jî pere girtin û çawa ku ji wan re hatibû hînkirin, kirin. Û ev gotin di nav Cihûdan de heta îroj belav bûye.

¹⁶Lê belê yanzdeh şagirt çûn Celîlê, çiyayê ku Îsa ji wan re gotibû.

¹⁷Û gava ku wan Îsa dîtin, jê re secde kirin; lê belê hinekan şik kirin.

¹⁸Îsa hat cem wan û bi wan re axifî û got: Hemû rayedariya ezman û erdê ji min re hatiye dayîn.

¹⁹Niha hûn herin, hemû neteweyan bikin şagirt[1]û wan bi navê Bav û Law û Ruhê Pîroz ve vaftîz bikin

²⁰û bi girtina hemû tiştên ku min ji we re emir kirine hînî wan bikin. Û a vay, ez hemûya rojan, heta dawiya dinê bi we re me! Amîn.