Read PEYMANA NÛ 2017 (ÎNCÎL) Marqos 12 Bible Online

Marqos 12 - PEYMANA NÛ 2017 (ÎNCÎL) bible

Marqos 12

¹Û wî bi wekokan ji wan re dest bi gotinê kir: Zilamekî rez danî û dora wê çeper kir û kortikekê kola û qûleyek çêkir. Û wê bi kirê da rezvanan û çû welatekî din.

²Û wexta demsala wê hat, wî kolekî şand bona tiriyê para xwe ketiye bistîne.

³Û rezvanan ew girtin, lê dan û destvala şandin.

⁴Û wî dîsa koleyekî din ji wan re şand; lê belê wan serê wî şikand û heqaret li wî kirin û şandin.

⁵Wî yekî din şand, ew jî kuştin û wekî din hîn gellekên din şandin; li hinekan xistin, hinek jî kuştin.

⁶Lawekî wî yê xoşewîst jî hebû; dawiyê lawê xwe ji wan re şand û got: Dê ew ê ji lawê min re hurmetê bikin!

⁷Lê belê rezvanan ji hev û din re gotin: Mêrasxwer ev e! Werin, em wî bikujin, dê mêras bibe ya me!

⁸Û wan bi wî girtin, kuştin û avêtin derveyî rezê.

⁹Niha, dê xwediyê rezê çi bike? Ew ê bê, rezvanan helaq bike û rez bide kesên din!

¹⁰Ma we vê Nivîsa jî qey nexwendine? Kevirê ku çêkeran nexwest, bû kevirê serê quncikê.

¹¹Ev ji aliyê Xudan ve çêbû û ew di çavên me de karekî nûwaze[1]ye.

¹²Û wan xwestin ku wî bigirin, lê belê ji gel ve tirsiyan; ji ber wan fêhm kirin ku ew di vê wekoka de qala wan dike. Û wan wî berdan û çûn.

¹³Û bona ku wî bi gotinên wî bixînin dafikê, hin kesên Fêrisî û alîgirê Hêrodês şandin cem wî.

¹⁴Ew hatin û jê re gotin: Mamoste, em dizanin ku, tu mirovekî rast î û tu di nava mirovan de bê bijartin û bê veqetandin, rêya Xwedê bi duristî hîn dikî, ji ber ku tu li rûyê mirovan nanihêrî. Ma caiz e ku em bacê bidin Qeyser an na? Ma divê em bidin, an nedin?

¹⁵Lê belê Îsa bi durûyitiya wan dizanîbû û ji wan re got: Ma hûn çima min diceribînin? Ka dînarekî ji min re bînin ku ez bibînim!

¹⁶Wan jî anîn. Wî ji wan re got: Ev sûret û ev nivîs yê kî ye? Wan gotin: Yê Qeyser in!

¹⁷Îsa ji wan re got: Tiştên Qeyser bidin Qeyser û tiştên Xwedê bidin Xwedê! Û ew li wî ecêb man.

¹⁸Sadûqiyên[1]ku digotin vejîn nîne, hatin cem wî û jê pirsîn û gotin:

¹⁹Ya Mamoste, Mûsa ji me re nivîsiye[1]ku: Ger birayê zilamekî bimire, pîreka xwe bî bihêle û zarok nehêle, bila birayê wî pîreka wî bistîne û nifşeya wî bajo.

²⁰Heft bira hebûn. Yê pêşîn pîrekek girt û zarok nehişt û mir.

²¹Yê duduyan wê pîrekê girt, ew jî nebû xwedî zarok û mir û yê sisêyan jî wusa bû.

²²Û her heftan jî wê girtin û bê zarok mirin. Paşî hemûyan pîrek jî mir.

²³Di vejînê de, ger ew bivejin, dê pîrek bibe ya kîjanî? Ji ber ku her heft jî bi wê re zewicîn.

²⁴Îsa jî ji wan re got: Hûn ne Nivîsên Pîroz, ne jî Hêza Xwedê dizanin, ma sedema şaşbûna we ne ev e?

²⁵Ji ber ku dema ew ji mirinê ve bivejin ne dizevicin, ne jî tên zewicandin; lê mîna milyaketên ezman in.

²⁶Lê belê ger em bên vejîna miriyan; di Pirtûka Mûsa de, di birra deviyê de Xwedê ji wî re: Ez Xwedayê Birahîm û Xwedayê Îshaq û Xwedayê Aqûp im[1]gotiye, qey we nexwendin?

²⁷Ew ne yê miriyan, lê Xwedayê zindiyan e; hûn gellekî ji rê derketine.

²⁸Gava alimekî zagonê guftegoya wan guhdarî dikir û dît ku wî bersivek xweş da wan; ber bi wî hat û jê pirsî: Di nav hemû emiran de ya yekemîn kîjan e?

²⁹Îsa bersiv da wî: Ya yekemîn ev e: Bibihîze, ya Îsraêl! Xudan Xwedayê me, Xudanê yek e.

³⁰Û ji Xudan, Xwedayê xwe, bi hemû dilê xwe, bi hemû canê xwe, bi hemû ramanê xwe û bi hemû hêza xwe hez bike[1]!

³¹Ya duwemîn jî ev e: Ji cîranê xwe mîna xwe hez bike[1]! Ji vana mezintir, emirek din tune.

³²Alimê zagonê ji wî re got: Te qenc got Mamoste! Te bi gotina xwe yî: Xwedê yek e û xeynî wî yekî din nîne, rast got.

³³Û bi hemû dil û bi hemû feraset û bi hemû hêzê ji wî hez kirin û hez kirina cînarê xwe mîna xwe, ji hemû pêşkêşiyên şewitandinê û ji hemû qurbanan zêdetir e!

³⁴Gava Îsa dît ku wî bersivek bi baqilî da, jê re got: Tu ji Serweriya Xwedê ne dûr î! Êdî kesî newêribû ku ji wî bipirse.

³⁵Dema Îsa di Perestgehê de hîn dikir, dest pê kir û got: Çawa dibe ku alimên zagonê dibêjin; Mesîh Lawê Dawid e?

³⁶Dawid bi xwe ji Ruhê Pîroz ve gotiye: Xudan ji Xudanê min re got: Heta ku ez neyarên te ji lingên te re pêlik deynim; li rastê min rûne[1]!

³⁷Dawid bi xwe ji wî re dibêje: Xudan; ma ew çawa dibe Lawê Dawid? Û ajaweya mezin, bi kêfxweşî li wî guhdarî dikirin.

³⁸Dema hînkirinê wî got: Xwe ji alimên zagonê biparêzin, yên ku hez dikin bi kincên dirêj bigerin, di qadan de

³⁹silav li wan bê kirin û di keniştan de li kursiyên pêş û di dawetan de li cîhên jorîn rûnin.

⁴⁰Ew malên jinebiyan dadiqurtînin û bona nîşandanê bi dûdirêjî dua dikin; hukumê wan dê hîn jî girantir be.

⁴¹Îsa li hemberî xeznê rûniştibû û gelên ku pere davêjin qutîkê temaşe dikir. Gellek kesên dewlemend, pirr avêtinê.

⁴²Pîrekek bî ya xizan hat, du perê paxirî, qasî yek manqerî[1]bi qîmet avêtê.

⁴³Îsa şagirtên xwe bangî cem xwe kir û ji wan re got: Bi rastî ez ji we re dibêjim: Vê pîreka bî ya xizan ji her kesî zêdetir pere avêt qutîkê.

⁴⁴Ji ber ku wan hemûyan, zêdeyiya ji ber dewlemendiya wan maye avêtinê; lê belê vê pîreka ji xizaniya xwe, hebûn û tunebûna xwe, bona jiyana wê çi di dest de bû, hemû avêtê.