Read PEYMANA NÛ 2017 (ÎNCÎL) Marqos 16 Bible Online

Marqos 16 - PEYMANA NÛ 2017 (ÎNCÎL) bible

Marqos 16

¹Û dema roja Sebtê derbas bû, Meryema Mejdelanî û Meryema diya Aqûp û Şalomê çûn, bona ku li wî bidin biharatê stendin.

²Û di roja heftê ya pêşîn de sibehê gellekî zû, gava ku roj hilat, ew hatin gorê.

³Û wan di nava xwe de digotin: Ma kevirê di deriyê gorê de ye, dê kî bona me bigindirîne?

⁴Û dema ku wan mêze kirin, dîtin ku ew kevirê mezin gindiriye[1], ji ber ku ew zehf mezin bû.

⁵Û ew ketin gorê û zilamekî qeftanê spî li xwe kirî, li aliyê rastê rûniştiye dîtin û pirr şaş man.

⁶Wî jî ji wan re got: Şaş nebin! Hûn li Îsayê Nisretî yê ku hatibû xaçkirin digerin, ew ji mirinê rabûye; ew ne li vir e! A vay, cîhê ku ew lê dirêjkirî bû!

⁷Lê belê hûn herin ji şagirtên wî re û ji Pêtrûs re bibêjin: Ew berî we diçe Celîlê; mîna ku ji we re gotibû, hûn ê wî li wir bibînin!

⁸Pîrek jî ji gorê derketin û reviyan; ji ber ku ricifandin û şaşiyek bi wan ve ketibû; ji tu kesî re jî tiştekî negotin; ji ber ku ditirsiyan.

⁹Di roja heftê ya pêşîn de, sibê zû dema ku Îsa vejiya, pêşiyê xuyayî Meryema Mejdelanî bû, ya ku heft cinan ji vê qewirandibû.

¹⁰Ew jî çû û xeber da yên ku bi Îsa re mabûn; wan şîn digirtin û digiriyan.

¹¹Û gava wan bihîst ku Îsa zindî[1]ye û xuyayî wê bûye, pê bawer nekirin.

¹²Piştî van tiştan, wî xwe bi xuyangek[1]din nîşanî duduyan ji wan da ku, ew derketibûn çolê û dimeşiyan.

¹³Ew çûn û xeberê dan yên din; lê belê ew bi gotina vana jî bawer nebûn.

¹⁴Pişt re dema li sifrê rûniştibûn, ew xuyayî Yanzdehan bû û bona bêbaweriya wan û hişkbûna dilê wan, ew şermezar kirin; ji ber bi yên ku ew ji mirinê rabûyî dîtine re, bawer nekiribûn.

¹⁵Û wî ji wan re got: Herin hemûya dinê û Mizgîniyê ji hemûya gerdûnê re bibêjin[1]!

¹⁶Yê ku bawer bike û vaftîz bibe, dê xelas bibe; lê belê yê ku bawer neke, dê mehkûm bibe[1].

¹⁷Şaneyên ku bi kesên bawer bikin re xuya bibin ev in: Dê bi navê min, cinan biqewirînin, dê bi zimanên nû ve biaxifin,

¹⁸dê bi maran bigirin û rakin û ger ew tiştekî ku bikuje vexwin, dê tu xesarê[1]ji wê nebînin; dê destê xwe deynin ser nexweşan û dê ew ê qenc bibin.

¹⁹Piştî ku Xudan Îsa van gotinan ji wan re got, bi ezmanê ve hate girtin û li aliyê rastê Xwedê rûnişt.

²⁰Ew jî derketin û li her derê waz kirin û Xudan bi wan re dişuxulî û kelamê bi nîşanên ku ji paş ve tên tesdîq dikirin. Amîn.