Read PEYMANA NÛ 2017 (ÎNCÎL) Marqos 3 Bible Online

Marqos 3 - PEYMANA NÛ 2017 (ÎNCÎL) bible

Marqos 3

¹Û ew dîsa ket keniştê. Û li wir zilamekî destê wî hişk bûyi, hebû.

²Ew jî bona ku Îsa sûcdar bikin, bi gotina, hela dê ew ê roja Sebtê wî baş bike, çavnêrîtiyê lê dikirin.

³Û Îsa ji mirovê dest hişk re got: Rabe ser pêlan û derkeve navendê!

⁴Û wî ji wan re got: Ma roja Sebtê qencî kirin, an xerabî kirin caiz e? Can rizgar kirin, an kuştin? Lê belê ew bêdeng man.

⁵Û Îsa bi hêrs li dora xwe nihêrt, ji ber dilhişkbûna wan kesirî û ji zilam re got: Destê xwe dirêj bike! Wî jî dirêj kir û destê wî dîsa bû wekî halê xweyî berê.

⁶Fêrisî derketin derve, hema bi Hêrodesiyan[1]re bona ku dê ew ê çawa Îsa bikujin dest bi şêwrê kirin.

⁷Îsa tevî şagirtên xwe vekişiya qeraxa golê û ajaweyeke mezin, ji Celîlê li pey wî hat.

⁸Û yên ku kirinên wî bihîstibûn, ajaweyeke mezin ji Cihûstanê û ji Orşelîmê û ji Îdomeyê û ji aliyê Urdunê û ji herêma Sûr û Saydayê hatin cem wî.

⁹Îsa bona ku di nava ajaweyê de, di tengasiyê de nemîne, ji şagirtên xwe re got ku, bila lotkekê biçûk amade bikin.

¹⁰Ji ber ku wî gellekan qenc dikir, wusa ku, hemûyên xwedî dert bûn, bona ku destê xwe di wî de bidin, bi ser wî ve dihêwirîn.

¹¹Dema ruhên xerab wî didîtin, xwe li ber wî diavêtin erdê, diqêriyan û digotin: Tu Lawê Xwedê yî!

¹²Û wî ji wan re emir dikir ku, bila kîbûna wî eşkere nekin.

¹³Îsa derket serê çiyê û yên ku wî dixwestin, bangî cem xwe kir; ew jî hatin cem wî.

¹⁴Û wî donzdeh kes bona ku bi wî re bimînin û wan ji bo wazdayînê bişîne

¹⁵û bona qewirandina cinan rayedar bike hilbijart:

¹⁶Şîmûnê ku navê Pêtrûs dayê

¹⁷û Boanerces, yanê, yên ku navê: Lawên Xurmîna ezmîn daye wan, lawên Zebedî Aqûp û birayê wî Yûhena

¹⁸û Andrêyas, Fîlîpûs, Bartolomeyo, Meta, Tûmas, Aqûpê lawê Alfay, Tadeyos, Şîmûnê Welatparêz

¹⁹û Cihûdayê Îsxeryotî, yê ku Îsa da dest.

²⁰Û ew çûn malekê û dîsa ajawe civiya, ewqas ku, ew nikarîbûn xwarinê jî bixwin.

²¹Dema mirovên wî vêya bihîstin, derketin ku wî bigirin; ji ber ku wan digot: Wî aqilê xwe winda kiriye!

²²Alimên zagonê yên ji Orşelîmê hatibûn, digotin: Di wî de Beelzebûl[1]heye û ew cina bi hêza serokê cinan diqewirîne!

²³Îsa jî wan bangî cem xwe kir û bi wekokan ji wan re got: Ma Îblîs çawa dikare Îblîs biqewirîne?

²⁴Ger welatek di nava xwe de du parî bûbe, ew welat nikare li ser pêlan bimîne.

²⁵Û ger malek di nava xwe de du parî bûbe, ew mal nikare li ser pêlan bimîne.

²⁶Ger Îblîs li dijî xwe rabûbe û bûbe du parî, êdî nikare li ser pêlan bisekine, dibe ku dawiya wî hatibe.

²⁷Lê belê tu kes nikare têkeve mala yê xurt û mala wî tazî bike; lê belê pêşiyê destên wî girê bide, wê demê dikare mala wî tazî bike.

²⁸Bi rastî ez ji we re dibêjim: Hemû gunehan û hemû kufrên mirovan dê bêne bexşandin,

²⁹lê belê her kî ku kufrê li Ruhê Pîroz bike, tu carî nayê bexşandin, lê ew bi gunehê bêdawî ve sûcdar e.

³⁰Ji ber ku wan digot: Ruhê xerab di wî de heye.

³¹Dayik û birayên Îsa hatin li derve sekinîn, xeber şandin û bangî wî kirin.

³²Ajawe li dora wî rûdinişt û ji wî re gotin: A vay, dayik û birayên te li derva ne, li te digerin!

³³Îsa bersiv da wan û got: Ma dayika min û birayên min kî ne?

³⁴Û li dora xwe, li kesên dora xwe rûniştiye nihêrt û got: A vay, dayika min û birayên min!

³⁵Ji ber her kî ku xwestina Xwedê bîne cîh, birayê min û xwuşka min û dayika min ew e.