Read PEYMANA NÛ 2017 (ÎNCÎL) Lûqa 21 Bible Online

Lûqa 21 - PEYMANA NÛ 2017 (ÎNCÎL) bible

Lûqa 21

¹Dema Îsa çavê xwe rakir û nihêrt, dewlemendên ku diyariyên xwe davêjin xezîneyê dît.

²Lê belê wî jinebiyek belengaz ya pûlikî[1]davêje wir jî dît.

³Û Îsa got: Ez bi rastî ji we re dibêjim: Vê jinebiya belengaz ji wan hemûyan bêtir avête nav!

⁴Ji ber ku vana hemûyan ji tiştên ku ji wan zêde bûn, avêtin nav diyariyan, lê belê vê pîrekê ji xizaniya xwe rizqê xwe hemû avête nav.

⁵Û gava ku hinekan gotin, Perestgeh bi kevirên sipehî û bi diyariyan hatiye xemilandin, Îsa got:

⁶Heçî ev tiştên ku hûn dibînin, dê roj bên ku hingê li vê derê kevir li ser kevir namîne ku nayê hilweşandin!

⁷Wan jî ji Îsa pirsiyan û gotin: Ya Mamoste, ma îcar ev tiştê hanê dê kengê biqewimin û çaxê ev tiştan li ber qewimandinê bin, nîşana wan çî ye?

⁸Îsa jî got: Hay ji xwe hebin ku hûn neyên xapandin! Ji ber ku gellekan dê bi gotinên: Ez ew im! Û: Wext nêzîk bûye! bi navê min ve werin; li pey wan neçin!

⁹Gava hûn bibihîzin ku qala şer û binavhevketinan bê kirin, metirsin, ji ber hewce ye ku pêşiyê vana biqewimin, lê belê hema dawî nayê.

¹⁰Wê gavê ji wan re got: Dê netew li dijî netewê û qiraletî li dijî qiraletiyê serî hilde

¹¹û dê zelzeleyên mezin û li cîh cîhan xela û jana zirav[1]çêbibin û tiştên tirsehêz û nîşanên mezin dê li ezmanan bibin.

¹²Lê belê ji berî van hemû tiştan dê dest bavêjin we û ew ê ji ber navê min we bidin destê kenişt û hepsan, dê we bibin ber qiral û waliyan û dê we bidin tengasiyê.

¹³Ev tişt dê biqewimin ku hûn şahdeyiyê bona min bikin.

¹⁴Ji ber vê yekê, ji pêşî ve bixin dilên xwe ku hûn nefikirin, hûn ê çi bersivê bidin;

¹⁵ji ber ku ez ê dev û ziman û zanyariyê bidim we ku neyarên we nikaribin li ber we biaxifin an jî bisekinin.

¹⁶Lê belê hûn, hûn ê heta ji aliyê dayik û bav, bira, meriv û hevalan ve, bi dest ve bêne dayîn û dê ji we hinekan bikujin.

¹⁷Ji ber navê min her kes jî dê ji we bikerihin.

¹⁸Û mûyek ji serê we winda nabe.

¹⁹Hûn ê bi sebirkirinê canên xwe qezenc bikin!

²⁰Lê belê gava hûn bibînin ku hawirdora Orşelîmê bi leşkeran tê girtin, bizanin ku xerabûna wê nêzîk e.

²¹Wê demê, yên ku di Cihûstanê de ne, bila birevin çiyan! Û yên ku di bajêr de ne, bila jê derkevin! Û yên ku li çolê ne, bila nekevin hundirê bajêr!

²²Ji ber ku ev ew rojên tolhildanê ne, da ku heçî tiştên hatine nivîsandin, bên cîhên xwe.

²³Wey li serê wan, yên ku di wan rojan de ducanî û bişîr in! Ji ber ku dê tengasiyek mezin were ser welêt û xezeb bê ser vî qewmî.

²⁴Ew ê bikevin ber devê şûr, bi dîlî dê bên birin nav hemû neteweyan û heta dema neteweyan biqede, dê Orşelîm di bin lingên wan de biperçiqe.

²⁵Li ser roj, heyv û stêrkan dê nîşan çêbibin û li ser erdê ji ber xuşîn û mişîna pêlên behrê, dê gel bibizdin û şaş bibin.

²⁶Ew mirovên li hêviya wan tiştên ku bên serê dinê disekinin, ji tirsan dê dilê wan bibihûre; ji ber ku hêzên ezmanan dê bihejin.

²⁷Û wê gavê dê bibînin ku Lawê Mirov, bi qudret û bilindahiya mezin ji ewrekî tê.

²⁸Lê belê dema van bûyeran dest pê bikin, li jor binihêrin û serê xwe bilind bikin[1]; ji ber ku xelasiya we nêzîk bûye.

²⁹Û Îsa wekokekê ji wan re got: Li dara hêjîrê û li hemû darên din binihêrin!

³⁰Gava ew bipişkivin, hûn dibînin û hûn ji ber xwe dizanin ku êdî havîn nêzîk e.

³¹Bi vî awayî, çaxê hûn jî bibînin ku ev tiştên hanê diqewimin, bizanin ku Serweriya Xwedê nêzîk e.

³²Bi rastî ez ji we re dibêjim: Ev nifş nabihûre, heta ev tiştên hanê hemû neyên cîhê xwe.

³³Erd û ezman dê bibihûrin, lê belê gotinên min nabihûrin.

³⁴Lê belê li xwe miqate bibin ku, bi xwarina zehfî û serxweşîtiyê û bi xemên vê jiyanê dilê we giran nebe û ew roj ji nişka ve wek dafikekê bi ser we de neyê!

³⁵Ji ber ku dê ew bi ser wan hemûyên ku li ser rûyê erdê dimînin de were.

³⁶Lê belê her gav dua bikin û hişyar bimînin, ji bo ku hûn bikarin, ji ber van hemû tiştên ku dê biqewimin, birevin û li ber Lawê Mirov rawestin!

³⁷Û Îsa bi roj di Perestgehê de dida hînkirinê û bi şev derdiket, diçû wî çiyayê ku jê re Çiyayê Zeytûnê tê gotin, şeva xwe dibuhurand.

³⁸Û hemûya gel sibê zû dihatin nav Perestgehê cem wî ku, guhdariya wî bikin.