Read PEYMANA NÛ 2017 (ÎNCÎL) Lûqa 3 Bible Online

Lûqa 3 - PEYMANA NÛ 2017 (ÎNCÎL) bible

Lûqa 3

¹Lê belê di sala panzdehên qiraletiya Qeyser Tîberyos de, gava ku Pîlatosê Pontiyûsê, waliyê Cihûstanê bû, Hêrodês serdarê[1]Celîlê bû û birayê wî Fîlîpo serdarê herêma Îtûrêya û Traxonîdayê bû û Lûsanyûs serdarê Abîlîneyê bû,

²Hena û Qayafa Serokkahîn bûn; di wê demê de gotina Xwedê li çolê ji Yehyayê lawê Zekerya re hat.

³Û ew jî li seranserê Çemê Urdunê ji bo bexşandina gunehan bi toba vaftîzê waz dayînê ve hat.

⁴Çawa ku di Pirtûka gotinên Îşaya peyxamber de hatiye nivîsandin: Dengê yê li çolê bang dike: Rêya Xudan amade bikin û şiverêyên wî rast bikin!

⁵Dê her gelî tijî bibin, dê her çiya û gir nizm bibin û yên çewt dê bên rastkirin û rêyên zaxor dê bên rastkirin

⁶û dê her mirov xelaskariya Xwedê bibînin[1].

⁷Wî ji ajaweyên dihatin ku ji aliyê wî ve bên vaftîz kirin re wisa got: Hey çêlikên koremaran, kê ji we re gotiye ku hûn ji ber vê xezeba ku tê baz bidin?

⁸Niha fêkiyên ku liyaqî tobê ne, bidin! Û di hundirê xwe de dest pê nekin û nebêjin: Birahîm bapîrê me ye; ji ber ez ji we re dibêjim ku, Xwedê dikare ji van keviran zarokan ji Birahîm re rake.

⁹Jixwe bivir jî li ser rehên daran e. Her dara ku berê qenc nede, dê bê birîn û bê avêtin nav êgir!

¹⁰Û gel jî ji wî pirsî û got: Wê demê divê em çi bikin?

¹¹Wî bersiv da û ji wan re got: Yên ku du kirasên wî hebin, bila bide yê ku yê wî qet nîne û bila kesê ku xwarina wî hebe jî ûsa bike!

¹²Wê demê karmendên bacê[1]jî hatin ku vaftîz bibin û gotin: Ya mamoste, ma em çi bikin?

¹³Wî ji wan re got: Ji tiştên ku hewce dike hûn bistînin zêdetir nestînin!

¹⁴Leşkeran jî ji wî pirsîn û gotin: Wê demê divê em çi bikin? Û wî jî ji wan re got: Bêbextiyê li tu kesî mekin û bi darê zorê tiştekî ji wan nestînin û bi heqdestên xwe ve razî bin!

¹⁵Ji ber ku gel di nava hêviyê de li bendê bûn, bona Yehya hemûyan di dilên xwe de dipirsîn: Gelo Mesîh ev e?

¹⁶Yehya bersiva hemûyan bi van gotinan ve da: Rast e, ez bi avê we vaftîz dikim; lê yê ji min ve biquwettir tê ku, ez ne hêja me benikên çaroxên wî vekim; ew ê bi Ruhê Pîroz û bi agir we vaftîz bike.

¹⁷Melhêba wî di destê wî de ye ku, bêndera xwe paqij bike û genim bixe embara xwe, lê belê ew ê kayê bi agirekî qet venamire ve bişewitîne!

¹⁸Wî, bi şîret kirina gellek tiştên din jî ji gel re Mizgînî waz dida.

¹⁹Lê belê, ji ber ku Hêrodêsê serdar, ji ber jinbira xwe Hêrodiya û ji ber hemû xerabiyên ku Hêrodês kiribû; ji aliyê Yehya ve hatibû azirandin,

²⁰li ser hemûyên vana, wî avêt girtîgehê.

²¹Û wusa bû ku, gava hemûya gel dihatin vaftîz kirin, Îsa jî hate vaftîz kirin û dema dua dikir ezman vebûn

²²û Ruhê Pîroz bi beden di şiklê kevokekê de li ser wî danî û dengek ji ezmanan hat û got: Lawê minî xoşewîst tu yî; ez ji te razî me!

²³Û Îsa dema dest bi wezîfeya xwe kir, nêzîkî sî salî bû û wek ku dihat gûman kirin, ew lawê Ûsiv, lawê Elî,

²⁴lawê Metat, lawê Lêwî, lawê Melkê, lawê Yannay, lawê Ûsiv,

²⁵lawê Metîtya, lawê Amos, lawê Nehûm, lawê Heslî, lawê Neggay,

²⁶lawê Mehat, lawê Metîtya, lawê Şemeyîn, lawê Yûsex, lawê Yoda,

²⁷lawê Yûhenan, lawê Rêşa, lawê Zerûbabel, lawê Şaltiyêl, lawê Nerî,

²⁸lawê Melkê, lawê Êdî, lawê Qosam, lawê Êlmedam, lawê Er,

²⁹lawê Yêşû, lawê Êliyazêr, lawê Yorîm, lawê Metat, lawê Lêwî,

³⁰lawê Şîmeûn, lawê Cihûda, lawê Ûsiv, lawê Yonam, lawê Êlyaqîm,

³¹lawê Melyo, lawê Mena, lawê Metêta, lawê Natan, lawê Dawid,

³²lawê Îşay, lawê Obêd, lawê Boaz, lawê Selmon, lawê Nehşon,

³³lawê Amînadab, lawê Admîn, lawê Aram, lawê Hesrûn, lawê Pêrez, lawê Cihûda,

³⁴lawê Aqûp, lawê Îshaq, lawê Birahîm, lawê Têrah, lawê Nehor,

³⁵lawê Serûx, lawê Rêwo, lawê Pêlêg, lawê Eber, lawê Şalah,

³⁶lawê Kenan, lawê Arpakşad, lawê Sem, lawê Nûh, lawê Lamex,

³⁷lawê Metûşela, lawê Henox, lawê Yarêd, lawê Mehalêl, lawê Kenan,

³⁸lawê Enoş, lawê Sêt, lawê Adem, lawê Xwedê bû.