Read PEYMANA NÛ 2017 (ÎNCÎL) Yûhena 10 Bible Online

Yûhena 10 - PEYMANA NÛ 2017 (ÎNCÎL) bible

Yûhena 10

¹Bi rastî û bi rastî ez ji we re dibêjim: Yê ku di derî re naçe hewşa mîhan û ji rêyeke din re dikevê diz û rêbir e.

²Lê belê yê ku di derî re diçe hundir, ew şivanê mîhan e.

³Dergevan ji wî re derî vedike û mîh dengê wî dibihîzin; ew jî bi navê wan bangî mîhê xwe dike û wan dibe derve.

⁴Dema ku wî hemû mîhên xwe derxist derve, ew di pêşiya wan de diçe û mîh li pey wî diçin; ji ber ku ew dengê wî nas dikin.

⁵Û li pey yekî xerîb naçin, lê belê ji ber wî direvin; ji ber ku dengê xerîban nas nakin.

⁶Îsa ji wan re vê wekokê got, lê belê wan fêhm nekirin ku, ew ji wan re çi dibêje.

⁷Û li ser vê yekê Îsa ji wan re dîsa got: Bi rastî û bi rastî ez ji we re dibêjim: Ez deriyê mîha me.

⁸Hemûyên ku berî min hatine, diz û rêbir in, lê belê mîhan guh nedan wan.

⁹Ez derî me. Ger kesek di min de bikeve hundir, xelas dibe; dikeve hundir, derdikeve û çêregeh dibîne.

¹⁰Diz tenê ji bo diziyê, kuştînê û qelihandinê tê. Ez bona ku di wan de jiyan hebe û gellekî jiyan hebe hatim.

¹¹Ez şivanê qenc im; şivanê qenc di oxra mîhê xwe de canê xwe dide.

¹²Ew mirovê ku şivan û xwediyê mîhan nîne yê bi heqdest, dema ku ew hatina gur bibîne, ji ber ku mîh ne yên wî ne, wan berdide û direve, diçe; gur jî bi wan digire û belav dike.

¹³Ew direve, ji ber ku ew bi heqdest e û bona mîhan xem nake.

¹⁴Ez şivanê qenc im û ez yên xwe nas dikim.

¹⁵Çawa Bav min nas dike û ez jî Bav nas dikim, yên min jî ûsa min nas dikin û ez ji bo mîhan canê xwe didim.

¹⁶Û hin mîhên min ê din jî hene, ew daxilê vê hewşê nîn in; divê ez wan jî bînim; dê ew ê dengê min bibihîzin û bibin şivanek û keriyek.

¹⁷Ji ber vê yekê Bav ji min hez dike, ji ber ku ez canê xwe didim, da ku, ez wî dîsa bigirim.

¹⁸Tu kes nikare wî ji min bigire; lê belê ez wî bi xwe û xwe didim. Ji bo dayîna wî qudreta min heye û ji bo dîsa girtina wî qudreta min heye. Min vî emrî ji Bavê xwe ve girt.

¹⁹Ji ber van gotinan dîsa di nav Cihûdan de cudayî çêbû.

²⁰Û di nav wan de gellekan gotin: Di wî de cin heye, ew dîn e; ma hûn çima wî guhdarî dikin?

²¹Hinên din gotin: Ev gotinên hanê, yên mirovê cindar nîn in. Ma cin dikare ku çavê koran veke?

²²Di wê demê de li Orşelîmê, bo bîranîna vebûna Perestgehê cejn hebû û zivistan bû.

²³Û Îsa di hundirê Perestgehê de, di eywana Silêman de digeriya.

²⁴Û Cihûdan dora wî girtin û ji wî re gotin: Ma tuyê heta kengê dilê me di şikê de bihêlî? Ger tu Mesîh î, ji me re bi eşkereyî bibêje!

²⁵Îsa bersiv da wan: Min ji we re got û hûn bawer nakin. Xebatên ku min bi navê Bavê xwe kirin, ew ji bo min şahdeyiyê dikin.

²⁶Lê belê hûn bawer nakin; ji ber ku hûn ne ji mîhên min in.

²⁷Mîhên min dengê min dibihîzin û ez jî wan nas dikim û ew li pey min tên

²⁸û ez jiyana abadîn didim wan û ew abadîn helaq nabin û tu kes nikare wan ji destê min derxîne.

²⁹Bavê min, yê ku ew dane min, ji hemûyan mezintir e û hêza tu kesî nikare wan ji destê Bav derxîne.

³⁰Ez û Bav yek in.

³¹Cihûdan dîsa ji erdê kevir rakirin û xwestin ku wî bidin ber keviran.

³²Îsa bersiv da wan: Min ji Bav gellek xebatên qenc, nîşanî we dan; ma hûn ji bo kîjan xebatê min kevir dikin?

³³Cihûdan bersivê dan wî û gotin: Em ne bona xebatekî qenc, bona ku te kufrê kiriye, tu jî mirov î, lê belê tu dibêjî ku ez Xwedê me; te didin ber keviran.

³⁴Îsa bersiv da wan: Ma di zagona we de nehatiye nivîsandin; min got: Hûn îlah in[1]?

³⁵Xwedê gotina xwe ji kê re şandiye, ji wan re îlah tê gotin û Nivîsa Pîroz jî xerab nabe.

³⁶Bav min pîroz kir û şand dinê. Wê çaxê bona ku min got: Ez Lawê Xwedê me, hûn çawa ji min re dibêjin ku te kufrê kir?

³⁷Ger ez xebata Bavê xwe nekim, baweriyê bi min neynin.

³⁸Lê belê ger ez dikim û hûn naxwazin, baweriyê bi min bînin, balê baweriyê bi xebatên ku ez dikim bînin, da ku, hûn bizanibin û fêhm bikin ku Bav di min de ye û ez jî di Bav de me!

³⁹Wan dîsa xwestin ku wî bigirin, lê belê ew ji destê wan derket.

⁴⁰Îsa dîsa çû wêdatira Urdunê[1], cîhê ku Yehya berê li wir vaftîz dikir û li wê derê ma.

⁴¹Pirr kes hatin cem wî û gotin: Bi rastî Yehya qet mûcîzetan çênekir; lê belê tiştên ku Yehya ji bo wî got, ew hemû rast derketin!

⁴²Û li wê derê pirr kesî bawerî bi wî anîn!