Read PEYMANA NÛ 2017 (ÎNCÎL) Yûhena 14 Bible Online

Yûhena 14 - PEYMANA NÛ 2017 (ÎNCÎL) bible

Yûhena 14

¹Bila dilê we teng nebe! Baweriyê bi Xwedê bînin û bi min jî baweriyê bînin!

²Di mala Bavê min de gellek şunwar hene; ger tunebûya, min ê ji we re bigota; ji ber ez diçim ku ji we re cîh amade bikim.

³Û ger ez herim û ji we re cîh amade bikim û bona ku hûn jî li wî cîhê ku ez lê me bibin; ez ê dîsa werim û we bigirim cem xwe.

⁴Hûn rêya cîhê ku ez diçimê, dizanin.

⁵Tûmas jê re got: Ya Xudan, em nizanin ku tu bi ku ve diçî, ma em ê çawa bi rê bizanibin?

⁶Îsa ji wî re got: Rê, rastî û jiyan ez im; heta ku ne bi navberiya min be, tu kes nikare were cem Bav!

⁷Ger we min nas bikirana, weyê Bavê min jî nas bikirana û ji niha ve hûn bi wî dizanin û we ew dîtin.

⁸Fîlîpûs ji wî re got: Ya Xudan, Bav nîşanî me bide û ew ji me re bes e!

⁹Îsa ji wî re got: Fîlîpûs, ez ewqas dem e bi we re me, ma te hîn min nas nekiriye? Kî ku min dîtibe, wî Bav dîtiye. Ma tu çawa dibêjî: Bav nîşanî me bide?

¹⁰Ma qey tu bawer nakî ku, ez di Bav de me û Bav jî di min de ye? Gotinên ku ji we re dibêjim, ez bi xwe û xwe nabêjim, lê belê Bavê ku di min de disekine, xebatên xwe dike.

¹¹Bawerî bi min bînin ku; ez di Bav de me û Bav jî di min de ye; qet nebe ji ber wan xebatan baweriyê bînin!

¹²Bi rastî û bi rastî ez ji we re dibêjim: Yê ku baweriyê bi min bîne, dê bikaribe ev xebatên ku ez çêdikim, bi xwe jî çêbike, heta dikare ku mezintirên wan jî çêbike; ji ber ku ez diçim cem Bav.

¹³Hûn bi navê min her çi bixwazin, ez ê wê bikim; da ku, Bav di Law de bilind bibe.

¹⁴Ger ku hûn bi navê min tiştekî bixwazin, ez ê wê bikim.

¹⁵Ger hûn ji min hez dikin, emirên min bînin cîh!

¹⁶Ez ê jî lava ji Bav re bikim û dê ew ê Xemrevînkirek din, Ruhê Rasteqîniyê bide we; da ku, ew heta bêdawiyê bi we re bimîne.

¹⁷Dinya nikare wî qebûl bike; ji ber ku ew ne wî dibîne û ne jî bi wî dizane; lê belê hûn wî nas dikin; ji ber ku ew li cem we disekine û dê di hundirê we de be.

¹⁸Ez we sêwî nahêlim, ez ê werim cem we.

¹⁹Paşî demek dinî kurt û êdî dinya min nabîne; lê belê hûn ê min bibînin; madem ku ez dijîm, hûn ê jî bijîn!

²⁰Di wê rojê de hûn ê bizanibin ku, ez di Bav de me û hûn di min de ne û ez jî di we de me.

²¹Yê ku emirên min qebûl dike û wan bi cih tîne, ew e yê ku ji min hez dike, yê ku ji min hez dike; ew ê ji aliyê Bavê min ve bête hezkirin; ez ê jî ji wî hez bikim û ez ê xwe nîşanî wî bidim.

²²Cihûda (ne yê Îsxeryotî) jê re got: Ya Xudan, ma çawa dibe ku, tu xwe nîşanî dinê nadî, lê nîşanî me didî?

²³Îsa bersiv da û jê re got: Kî ji min hez bike, dê bi gotina min bigire û Bavê min ji wî hez dike û em tên cem wî û li cem wî şunwarê digirin.

²⁴Yê ku ji min hez neke, bi gotinên min nagire û gotina ku we bihîst ne ya min e, lê belê ya Bavê ku min şandiye yî.

²⁵Gava ez hîn li cem we me, min ji we re van tiştan got.

²⁶Lê belê Xemrevînkir, Ruhê Pîroz, yê ku dê Bav bi navê min bişîne, dê ew ê her tiştî hînî we bike û dê hemû gotinên ku min ji we re gotine bîne bîra we.

²⁷Ez aşitiyê ji we re dihêlim, ez aşitiya xwe didim we. Ez mîna ku dinya dide nadim we; bila dilê we teng nebe û metirse!

²⁸We bihîstin ku min ji we re got: Ez diçim û ez ê werim cem we! Ger we ji min hez bikirana, bona ku ez diçim cem Bav, hûn ê kêfxweş bibûna; ji ber ku Bavê min ji min mezintir e.

²⁹Û bona ku dema bibe, hûn bawer bikin, min berî ku bibe ji we re got.

³⁰Ez êdî bi we re gellekî tiştan naaxifim; ji ber ku serokê vê dinê tê û tu tiştekî wî di min de nîne.

³¹Lê belê bila dinya bizanibe ku, ez ji Bav hez dikim û Bav çawa emir daye min, ez ûsa dikim. Rabin, em ji vir herin!