Read PEYMANA NÛ 2017 (ÎNCÎL) Yûhena 15 Bible Online

Yûhena 15 - PEYMANA NÛ 2017 (ÎNCÎL) bible

Yûhena 15

¹Ez mêwa rasteqîn im û Bavê min rezvan e.

²Ew her şivmêwa ku di min de fêkî nade jê dike û her ya ku fêkî dide, bona hîn jî zêdetir bide, wê paqij dike.

³Bi gotina ku min ji we re gotiye, hûn jixwe paqij in.

⁴Di min de bisekinin û ez di we de! Ger şivmêw bi mêwê ve nesekine, bi xwe nikare fêkî bide; mîna vêya, ger hûn jî di min de nesekinin, hûn nikarin fêkî bidin.

⁵Ez mêw im, hûn şivmêw in. Kesê ku di min de disekine û ez di wî de bisekinim, ew pirr fêkî dide; ji ber ku hûn bêyî min nikarin tu tiştekî bikin.

⁶Her kî di min de nesekine, ew mîna şivmêwê bi derve tête avêtin û hişk dibe; wan didin hev, davêjin agir û ew dişewitin.

⁷Ger hûn di min de bisekinin û gotinê min di we de bisekinin, hûn her çi dixwazin bixwazin, dê ji we re bête dayîn.

⁸Dema ku hûn pirr fêkî bidin, Bavê min bi vêya bilindtir dibe û hûn ê bi vî awayî bibin şagirtên min.

⁹Mîna ku Bav ji min hez dike, ez jî wusa ji we hez dikim; di hezkirina min de bisekinin!

¹⁰Ger hûn emirên min bînin cîh, hûn ê di hezkirina min de bisekinin; çawa ku, min bi emirên Bavê xwe ve girtin û ez di hezkirina wî de disekinim.

¹¹Bona ku kêfxweşiya min di we de be û kêfxweşiya we temam bibe, van tiştan ji we re gotim.

¹²Emirê min ev e: Mîna ku min ji we hez kir, hûn jî ji hev û din hez bikin.

¹³Ji hezkirina ku zilamek di oxra hevalên xwe de canê xwe bide, mezintir hezkirin di tu kesî de nîne.

¹⁴Ger hûn tiştên ku min ji we re emir kiriye, bikin, hûn hevalên min in.

¹⁵Êdî ez ji we re nabêjim qûl, ji ber ku qûl nizane ku efendiyê wî çi dike; lê belê min ji we re got heval; ji ber, hemû tiştên ku min ji Bavê xwe bihîst, ji we re gîhandin.

¹⁶We min nebijartin, lê min hûn bijart û min we wezîfedar kir ku, hûn herin fêkî bidin û fêkiyê we bimîne; da ku, hûn bi navê min ji Bav çi bixwazin, ew ê bide we.

¹⁷Ez vî emrî didim we ku, hûn ji hev û din hez bikin!

¹⁸Ger dinya ji we bikerihe, bizanin ku, berî we ji min kerihiye.

¹⁹Ger hûn ji dinê bûna, dê dinya ji yên ku daxilê wê ne hez bikira; bona ku hûn ne ji dinê ne; lê min we ji dinê ve bijart; ji bo vê yekê dinya ji we dikerihe.

²⁰Gotina ku min ji we re got, bînin bîra xwe: Qûl ji efendiyê xwe mezintir nîne. Ger zilmê li min kiribin, dê li we jî zilmê bikin; ger gotinê min qebûl kiribin, dê yên we jî qebûl bikin.

²¹Lê belê hemû van tiştan ji ber navê min dê bi we bikin, ji ber ku ew yê ku min şandiye nas nakin.

²²Ger ez nehatibama û ji wan re negotibama, gunehên wan dê tunebûya; lê belê niha bona gunehên wan lêborînên wan nîne[1].

²³Kesê ku ji min dikerihe, ji Bavê min jî dikerihe.

²⁴Ger min xebatê ku tu kesî nekiriye, di nav wan de çênekiribûya, gunehên wan dê tunebûya; lê belê wan niha him dîtin û him jî ji min û Bavê min kerihîn.

²⁵Lê belê bona ku vê gotina di zagona wan de hatiye nivîsandin, were cîh: Bêsedem ew ji min kerihîn[1], bû.

²⁶Xemrevînkir, Ruhê rasteqîniyê, yê ku ez ê ji Bav tê, ji we re bişînim, dema were, dê ew ê bona min şahdeyiyê bike.

²⁷Hûn jî şahdeyiyê bikin; ji ber ku hûn ji destpêkê ve bi min re bûn.