Read PEYMANA NÛ 2017 (ÎNCÎL) Yûhena 16 Bible Online

Yûhena 16 - PEYMANA NÛ 2017 (ÎNCÎL) bible

Yûhena 16

¹Ji bo ku hûn tilpekî nebin, min ev tişt ji we re got.

²Dê we ji keniştan biqewirînin; belê, saetek wusa tê ku, her zilamê we dikujin, dibêjin qey ew ji Xwedê re xizmetê dikin.

³Û ew ê dê van tiştan bikin, ji ber ku wan ne Bav, ne jî min nas kirin.

⁴Lê belê min ev tişt ji we re got; da ku, çaxê dema wan bê hûn wan bînin bîra xwe. Min ew tişt di destpêkê de ji we re negot; ji ber ku ez tevî we bûm.

⁵Lê belê niha jî, ez diçim cem yê ku min şandiye û ji we tu kes ji min napirse: Ma tu bi ku derê ve diçî?

⁶Lê belê bona ku min ji we re ev tişt got, dilê we bi keserê ve tijî bû.

⁷Lê belê ez ji we re rastiyê dibêjim: Çûyîna min ji bo qenciya we ye; ji ber ku ger ez neçim, ji we re Xemrevînkir nayê; lê belê ger ez biçim, ez ê wî ji we re bişînim.

⁸Û dema ku ew were, dê ew ê di derheqê guneh, rastî û darazîkirinê de dinê bide bêdengkirinê[1].

⁹Ji bo guneh, ji ber ku baweriyê bi min naynin;

¹⁰ji bo rastiyê, ji ber ku ez diçim cem Bav û hûn êdî min nabînin;

¹¹ji bo darazî kirinê, ji ber ku serokê vê dinê hatiye darazî kirin.

¹²Hîn gellek tiştên min, yên ku ez ji we re bêjim hene; lê belê hûn niha nikarin baldirêjiyê li wan bikin.

¹³Lê belê dema ku ew, Ruhê rasteqîniyê were, dê di her rasteqîniyê de rê nîşanî we bide; ji ber ku ew ê bi xwe neaxife[1]; lê belê her çi bibihîze, dê bibêje û tiştên ku bêne dê bighîne we.

¹⁴Dê ew ê min bilind bike; ji ber ku dê ew ê ji yê min bigire û ji we re bighîne.

¹⁵Her çi tiştê Bav heye, ew yê min e; ji bo vêya min ji we re got: Ew dê ji yê min bigire û bide we.

¹⁶Hinekî dem û hûn min nabînin û dîsa hinekî dem û hûn ê min bibînin.

¹⁷Wê çaxê hinek şagirtên wî ji hev û din re gotin: Hinekî dem û hûn min nabînin û dîsa hinekî dem û hûn ê min bibînin û: Ji ber ku ez diçim cem Bav; ma ew çî ye ku ji me re dibêje?

¹⁸Wan digotin: Ev ya ku dibêje: Hinek dem çî ye? Em nizanin ku, ka ew çi dibêje!

¹⁹Îsa fêhm kir ku ew dixwazin ji wî bipirsin û ji wan re got: Ma hûn ji bo vê gotina min ya ku: Hinekî dem û hûn min nabînin û dîsa hinekî dem û hûn ê min bibînin gotime, ji hev û din dipirsin?

²⁰Bi rastî û bi rastî ez ji we re dibêjim: Hûn ê bigirîn û li xwe bixin, lê belê dê dinya kêfxweş bibe; hûn ê keserê bikişînin, lê belê xema we dê vegere kêfxweşiyê.

²¹Dema ku pîrek zarok tîne dinê, tengasiyê dikişîne; ji ber ku saeta wê hatiye; lê belê dema ku zarok tîne dinê, bi kêfxweşiya mirovek li dinê bûye, êdî tengasiyê di bîra xwe de nîne.

²²Mîna vê niha kesera we heye, lê belê ez ê we dîsa bibînim û dê dilê we şa bibe û şabûniya we kes nikare ji we bistîne.

²³Û di wê rojê de, hûn ê tu tiştî ji min nepirsin. Bi rastî û bi rastî ez ji we re dibêjim: Bi navê min hûn ji Bav her çi bixwazin, ew ê wêya bide we!

²⁴Heta niha we bi navê min tu tişt nexwestin; bixwazin û hûn ê bigirin; da ku, bila şabûna we temam bibe!

²⁵Min ji we re ev tişt bi methelokan ve got; saet tê ku, ez êdî bi methelokan ve ji we re nabêjim; lê belê di derheqê Bav de ez ê bi eşkereyî ji we re bighînim.

²⁶Di wê rojê de hûn ê bi navê min bixwazin û ez nabêjim ku, ez ê ji bo we ji Bav bixwazim.

²⁷Ji ber ku Bav bi xwe ji we hez dike; ji ber ku hûn ji min hez dikin û ji Xwedê derketina min ve bawer dikin.

²⁸Ez ji Bav derketim û hatim dinê; dîsa dinê berdidim û vedigerim cem Bav.

²⁹Şagirtên wî gotin: A vay, tu niha bi eşkereyî dibêjî û tu qet wekokekî nabêjî!

³⁰Em niha fêhm dikin ku tu bi hemû tiştî dizanî û ji te re hewce nake ku tu kes ji te bipirse; em ji ber vê yekê bawerî tînin ku tu ji Xwedê ve hatiye!

³¹Îsa bersiv da wan: Ma hûn niha bawer dikin?

³²A vay, saet tê, belê, ew dem hatiye û hûn ê min tenê berdin, belav bibin û her yek ji we dê here cem yên xwe; lê belê ez ne tenê me, ji ber ku Bav bi min re ye.

³³Bona ku xweşiya we di min de hebe, min ev tişt ji we re got. Di dinê de tengasiya we heye; lê belê dilawêr bin[1], min dinê mexlûb kir!