Read PEYMANA NÛ 2017 (ÎNCÎL) Yûhena 17 Bible Online

Yûhena 17 - PEYMANA NÛ 2017 (ÎNCÎL) bible

Yûhena 17

¹Îsa van tiştan got û çavên xwe bilindî rûyê ezman kir û got: Ya Bav, saet hat, Lawê xwe bilind bike ku, Law jî bila te bilind bike.

²Ji ber ku te li ser hemû mirovahiyê, rayedariyê da wî, da ku, ew jiyana abadîn bide hemû kesên ku te dane wî.

³Jiyana abadîn jî ew e ku, bila te, tenê Xwedayê rastiyê û Îsa Mesîhê ku te şandiye nas bikin.

⁴Bi qedandina xebata ku te ji bo çêkirinê da min, min te li ser rûyê erdê bilind kir.

⁵Û ya Bav, dema ku dinya hîn tunebû û bilindahiya min ya ku li cem te bû, niha bi wê min li cem xwe bilind bike.

⁶Min navê te ji mirovên ku te di dinê de dan min re, eşkere kir; ew yê te bûn, te wan da min û wan bi gotina te girtin.

⁷Ew niha dizanin ku, hemû tiştên te dane min, ew ji te ne.

⁸Ji ber, gotinên ku te dan min, min dan wan û wan qebûl kirin; wan bi rastî fêhm kirin ku ez ji te derketim û hatim û wan bawerî anîn ku, te min şandiye.

⁹Ez ji bo wan rica dikim; ne ji bo dinê, lê belê ji bo yên ku te dane min, rica dikim; ji ber ku ew yên te ne.

¹⁰Hemû tiştên min yên te ne, yên te jî yên min in û ez di wan de hatim bilind kirin.

¹¹Ez êdî ne li dinê me, lê ew li dinê ne û ez têm cem te. Ya Bavê pîroz; kesên ku te da min bi navê xwe biparêze ku, bila ew jî mîna me bibin yek!

¹²Dema ez li cem wan bûm, min wan bi navê teyê ku te dabû min hêvişand û parast û bona ku Nivîsa Pîroz were cîh; ji xeynî lawê helaqê, ji wan kesekî din helaq nebû.

¹³Lê belê ez niha têm cem te û van tiştan di dinê de dibêjim, da ku, bila kêfxweşiya min di wan de temam bibe.

¹⁴Min gotina te da wan û dinê ji wan kerihî; ji ber çawa ku ez ne ji dinê me, ew jî ne ji dinê ne.

¹⁵Ez ne ji bo ku tu wan ji dinê rake, lê bona ku tu wan ji yê xerab biparêzî rica dikim.

¹⁶Çawa ku ez ne ji dinê me, ew jî ne ji dinê ne.

¹⁷Wan bi rastiyê ve pîroz bike! Û gotina te rastî ye.

¹⁸Mîna ku te min şand dinê, min jî wan şandin dinê.

¹⁹Û di oxra wan de ez xwe pîroz dikim ku, bila ew jî bi rastiyê ve bên pîroz kirin.

²⁰Tenê ne ji bo wan, lê belê ji bo yên ku bi gotina wan baweriyê bi min bînin jî, bona ku hemû bibin yek, ez lava dikim;

²¹çawa ku, ya Bav, tu di min de yî û ez jî di te de me, bila ew jî di me de bin, da ku, bila dinya baweriyê bîne ku te min şandiye.

²²Û min bilindahiya ku te da min, da wan ku, bila mîna ku em yek in, ew jî bibin yek.

²³Ez di wan de û tu di min de, da ku, ew ji bona yekîtiyê temam bibin û bila dinya fêhm bike ku te min şandiye û mîna ku tu ji min hez dikî, tu ji wan jî hez dikî.

²⁴Ya Bav, ez dixwazim ku, yên te dane min jî li cîhê min, bi min re bin ku, bila ew bilindahiya min ya ku te daye min bibînin; ji ber ku te berî afirandina dinê ji min hez kir.

²⁵Ya Bavê dadmend! Dinya te nas nekir, lê belê ez te nas dikim û vana jî dizanin ku te min şandiye.

²⁶Bona hezkirina te ya ku ji bo min heye, di wan de be û ez jî di wan de bim; min navê te ji wan re gîhand û ez ê bighînim.