Read PEYMANA NÛ 2017 (ÎNCÎL) Yûhena 21 Bible Online

Yûhena 21 - PEYMANA NÛ 2017 (ÎNCÎL) bible

Yûhena 21

¹Piştî van tiştan, Îsa di tenişta gola Taberiyê de xwe dîsa nîşanî şagirtan da. Û wî bi vî awayî xwe nîşan da:

²Şîmûn Pêtrûs, Tûmasê ku jê re Zo digotin û ji Kanaya Celîlê Natanyêl û lawên Zebedî û du heb şagirtên wî yên din bi hev re bûn.

³Şîmûn Pêtrûs ji wan re got: Ez diçim girtina masiyan! Wan gotin: Em jî bi te re bên. Ew derketin û siwarî lotkê bûn û wan wê şevê tiştekî negirtin.

⁴Dema ku êdî roj hilat, Îsa di tenişta golê de sekinî, lê belê şagirtan fêhm nekirin ku, ew Îsa ye.

⁵Û Îsa ji wan re got: Zarokno, ma xwarinek we heye? Wan bi gotina: Na! bersivê dan wî.

⁶Wî jî ji wan re got: Torê berdin aliyê rastê yê lotkê, hûn ê bibînin! Li ser vê yekê wan berdan û ji ber pirrbûna masiyan êdî wan nikarîbûn ku torê kaş bikin.

⁷Wê demê şagirtê ku Îsa jê hez dikir, ji Pêtrûs re got: Ev Xudan e! Şîmûn Pêtrûs, dema bihîst ku ew Xudan e, kirasê xwe li xwe pêçand, ji ber ku ew tazî bû û xwe avêt golê.

⁸Lê belê wan şagirtên din, tora masiyan kaş kirin bi lotka biçûk ve hatin; (ji ber ku ew ji reşayiyê ne dûr bûn, lê qasî du sed gezî dûr bûn).

⁹Dema derketin reşayiyê, wan dîtin ku agirê komirê dişewite û li ser agir masî û nan hene.

¹⁰Îsa ji wan re got: Niha wan masiyên ku we girtine bînin!

¹¹Û Şîmûn Pêtrûs li lotkê siwar bû û tora ku bi sed û pêncî û sê masiyên mezin ve tijî ye kişand reşayiyê û çawa ku ewqas pirr bûn jî, dîsa jî tor neçiriya.

¹²Îsa ji wan re got: Werin, taştê bixwin! Tu şagirtekî newêriya ku jê pirs bike û bibêje: Ma tu kî yî? Ji ber wan dizanîbûn ku, ew Xudan e.

¹³Îsa hat nan rahişt, da wan û bi vî awayî masî jî da wan.

¹⁴Îsa piştî ji mirinê rabû, niha ev cara sisiyan bû ku, wî xwe nîşanî şagirtên xwe dida.

¹⁵Bi vî awayî dema wan taştê xwarin, Îsa ji Şîmûn Pêtrûs re got: Ya Şîmûnê lawê Yûhena, ma tu ji van hîn jî zêdetir ji min hez dikî? Wî jê re got: Belê, ya Xudan, tu dizanî ku ez ji te hez dikim! Îsa jî ji wî re got: Berxên min biçêrîne!

¹⁶Cara diduyan dîsa ji wî re got: Ya Şîmûnê lawê Yûhena, ma tu ji min hez dikî? Wî jê re got: Belê, ya Xudan, tu dizanî ku ez ji te hez dikim. Îsa ji wî re got: Mîhên min biçêrîne!

¹⁷Cara sêwemîn jê pirs kir: Ya Şîmûnê lawê Yûhena, ma tu ji min hez dikî? Pêtrûs ji ber ku wî cara sêwemîn jê pirs kir û got: Ma tu ji min hez dikî? xemgîn bû û ji wî re got: Ya Xudan, tu bi her tiştî dizanî; tu dizanî ku, ez ji te hez dikim. Îsa ji wî re got: Mîhên min biçêrîne!

¹⁸Bi rastî û bi rastî ez ji te re dibêjim: Gava ku tu xort bû, te xwe girê dida û bi ku ve bixwesta tuyê biçûya wê derê; lê belê gava ku tu kal bibî, tuyê destê xwe dirêj bikî û yekî din dê te girê bide û te bibe cîhê ku tu naxwazî biçê.

¹⁹Wî vêya, bona ku ka dê ewê[1]bi mirinek çi awayî Xwedê bilindtir bike, nîşan bide, got. Û piştî ku vêya axifî, jê re got: Li pey min were!

²⁰Pêtrûs li paş xwe vegeriya û dît, ew şagirtê ku Îsa jê hez dikir li pey wan tê. Ew şagirtê ku, di xwarina êvarê de, xwe dabû ber sînga Îsa û gotibû: Ya Xudan, ew ê ku te bide dest kî ye?

²¹Pêtrûs wî dît û ji Îsa re got: Ya Xudan, ma dê vêya çi bibe?

²²Îsa ji wî re got: Ger ez bixwazim heta ku ez werim, ew bisekine, ma çiyî te ji vê ye[1]? Tu li pey min were!

²³Bi vî awayî: Di nav birayan de gotin derket ku, ew şagirt namire. Lê belê Îsa ji wî re negotibû ku: Ew namire; lê belê wî tenê gotibû ku: Ger ez bixwazim heta ku ez werim, ew bisekine, ma çiyî te ji vê ye[1]?

²⁴Şagirtê ku şahdeyiyê ji van tiştan re dike û van tiştan nivîsandiye ew e û em dizanin ku, şahdeyiya wî rast e.

²⁵Hîn gellek karên din yên ku Îsa çêkiriye hene; ez bawer im ku, ger ew yek bi yek bihatana nivîsandin, kitêbên ku dê bihatana nivîsandin heta ku di dinê de jî bi cîh nebûna. Amîn.