Read PEYMANA NÛ 2017 (ÎNCÎL) Yûhena 7 Bible Online

Yûhena 7 - PEYMANA NÛ 2017 (ÎNCÎL) bible

Yûhena 7

¹Û piştî vêya Îsa li Celîlê digeriya; ji ber, bona Cihûdan dixwestin ku wî bikujin, wî nexwest li Cihûstanê bigere.

²Cejna Cihûdan ya Çardax çêkirinê nêzîk bû.

³Û birayên wî jê re gotin: Ji vê derê derkeve û here Cihûstanê ku, bila şagirtên te jî karên ku tu çêdikî bibînin!

⁴Ji ber, ew kesê ku dixwaze xwe bi eşkereyî bide nas kirin, karê ku çêdike, venaşêre; ger ku tu van tiştan çêdikî, xwe nîşanî dinê bide!

⁵Ji ber ku birayên wî jî bawerî bi wî nedianîn.

⁶Îsa ji wan re got: Wexta min hîn nehatiye, lê belê bo we wext her dem li cîh e.

⁷Dinya ji we nakerihe, lê belê ji min dikerihe; ji ber ku ez di derheqê dinê de şahdeyiyê dikim ku karên wê xerab in.

⁸Hûn herin vê cejnê; ez hîn naçim vê cejnê; ji ber ku wexta min hîn temam nebûye.

⁹Piştî wî ev tiştên hanê ji wan re got, li bajarê Celîlê ma.

¹⁰Lê belê dema ku birayên wî çûn cejnê, ew bi xwe jî wê demê, ne bi eşkereyî, lê belê mîna ku bi dizîka be, çû.

¹¹Cihûdan jî di cejnê de li wî digeriyan û digotin: Ew li ku derê ye?

¹²Di nav ajawê de di derheqê wî de gellek miremir çêbûn. Hinekan digot: Ew zilamek qenc e! Hinên din jî digotin: Na, lê belê ew gel ji rê derdixîne!

¹³Lê belê ji tirsa Cihûdan, kesî di derheqê wî de nikarîbû bi eşkeretî biaxife.

¹⁴Êdî gava ku bû nêviyê cejnê, Îsa çû Perestgehê û dest bi hînkirinê kir.

¹⁵Û Cihûdan ecêb mabûn û: Çawa ku tu carî lê nehatiye hîn kirin, lê ev zilam çawa bi nivîsan ve dizane? gotin.

¹⁶Îsa bersivê da wan û got: Hînkariya min ne ji min, lê ji yê ku ez şandime tê.

¹⁷Ger kesek bixwaze xwestina wî bîne cîh, ew ê bizanibe, ka ev hînkarî ya Xwedê ye, an ez ji xwe dibêjim.

¹⁸Yê ku ji xwe dibêje, li bilindahiya xwe digere, lê belê yê ku li bilindahiya kesê ku ew şandiye digere, rast e û di wî de neheqî nîne.

¹⁹Ma Mûsa zagonê neda we? Dîsa jî qet kesek di nav we de zagonê bi cîh nayne. Çima hûn bona kuştina min dixebitin?

²⁰Ajaweyê bersiv da û got: Tu cindar bûyî! Ma kî bona ku te bikuje dixebite?

²¹Îsa bersiv da û ji wan re got: Min xebatek çêkir û hûn hemû şaş dibin.

²²Mûsa sunetê da we (ku, ne ji Mûsa ye, lê ji bapîran e); hûn roja Sebtê mirovekî sunet dikin.

²³Bona ku zagona Mûsa xerab nebe, mirovek roja Sebtê tê sunet kirin û bona ku min di roja Sebtê de mirovek bitûmî baş kir, ma çima hûn bi min re dixeyîdin?

²⁴Mîna dîtina çavan daraziyê mekin, bi rastî daraziyê bikin!

²⁵Wê demê ji mirovên Orşelîmê hinekan gotin: Ma yê ku bona kuştina wî dixebitiyan, ne ev e?

²⁶Û a vay, ew niha bi eşkereyî diaxife û kesek ji wî re tiştekî nabêje. Gelo serokan bi rastî fêhm kirine ku ew Mesîh e?

²⁷Lê belê em bi vî zilamî dizanin, ji ku derê ye; lê belê ger Mesîh were, kes nizane ku ew ji ku derê ve tê.

²⁸Wê demê Îsa di Perestgehê de hîn dikir û wî dengê xwe bilind kir û got: Hûn him min nas dikin û him jî dizanin ku ez ji ku derê me! Û ez bi xwe nehatim, lê belê yê ku min şandiye rastî ye; hûn wî nas nakin.

²⁹Ez wî nas dikim; ji ber ku ez ji wî me û wî min şandiye.

³⁰Li ser vê yekê wan xwestin ku wî bigirin, lê belê qet kesekî destê xwe neavêt ser wî; ji ber ku saeta wî hîn nehatibû.

³¹Lê belê ji gel pirr kesan bawerî bi wî anîn û gotin: Dema ku Mesîh were, ma qey ji yên ku ev dike, dê hîn jî zêdetir elametan çêbike?

³²Fêrisiyan bihîstin ku gel di derbarê Îsa de, van tiştan diaxifin û Serokên kahînan û Fêrisiyan ji bo girtina wî karmendan şandin.

³³Û Îsa got: Ez hîn demekî kurt bi we re me û pişt re ez ê biçim cem yê ku ez şandime.

³⁴Hûn ê li min bigerin û hûn min nabînin û hûn nikarin werin cîhê ku ez lê me.

³⁵Ji ber vê yekê Cihûdan ji hev û din re gotin: Gelo ev mirov dê bi ku ve biçe ku em nikarin wî bibînin? Ma ew ê biçe cem yên ku di nav Grekiyan de belav bûne û Grekiyan hîn bike?

³⁶Ev gotina ku dibêje: Hûn ê li min bigerin û hûn min nabînin û hûn nikarin werin cîhê ku ez lê me, gelo çî ye?

³⁷Di roja dawîn û mezin ya cejnê de, Îsa rabû ser piyan bang kir û got: Ger kesek tî bibe, bila were cem min û vexwe!

³⁸Mîna ku Nivîsa Pîroz dibêje, yên ku baweriyê bi min bînin, di hundirê wan de dê çemên avên zindî biherikin.

³⁹Lê belê wî ev di derheqê Ruh de got, yê ku baweriyê bi wî bînin, dê bistandana; bona ku Ruh hîn nehatibû dayîn, ji ber ku Îsa hîn nehatibû bilind kirin.

⁴⁰Dema ku ji gel hin kesan van gotinan bihîstin, gotin: Bi rastî ev ew Peyxamber e.

⁴¹Hin kesan jî gotin: Ev Mesîh e! Lê belê hin kesan jî gotin: Çi! Ma Mesîh dê ji Celîlê bê?

⁴²Ma Nivîsa Pîroz negotiye, dê Mesîh ji nîjada Dawid û ji gundê Beytlehemê ya ku Dawid jê ye, were[1]?

⁴³Bi vî awayî di nav gel de ji ber Îsa cudayî çêbû.

⁴⁴Hin kesan ji wan xwestin ku wî bigirin, lê belê kesî destê xwe nedan wî.

⁴⁵Di wê navberê de karmend vegeriyan cem serokên kahînan û Fêrisiyan; vana ji karmendan re gotin: Ma we çima wî neanîn?

⁴⁶Karmendan bersivê dan: Tu kes tu carî, mîna vî zilamî negotiye!

⁴⁷Fêrisiyan bersivê dan wan: Ma hûn jî hatin çewt kirin?

⁴⁸Ma ji serokan, an ji Fêrisiyan, tu kesek baweriyê bi wî aniye?

⁴⁹Lê belê ev gelê ku zagonê nizane, bi nalet e!

⁵⁰Nîkodêmûsê ku yekî ji wan bû û ji berê ve bi şev hatibû cem Îsa, ji wan re got:

⁵¹Ma zagona me, heta ku mirovekî guhdarî neke û hînî tiştên ku ew dike jî nebe, daraziyê li wî dike?

⁵²Wan bersiv dan û ji wî re gotin: An na, ma tu jî ji Celîlê yî? Lê bigere û binihêre, ji Celîlê tu peyxamber dernakeve!

⁵³Û her kes çû mala xwe.