Read PEYMANA NÛ 2017 (ÎNCÎL) K. Şagirtan 15 Bible Online

K. Şagirtan 15 - PEYMANA NÛ 2017 (ÎNCÎL) bible

K. Şagirtan 15

¹Hinek kesên ji Cihûstanê ve hatin, hînî birayan dikirin û digotin: Ger hûn li gor kevneşopa Mûsa sunet nebin, hûn nikarin xelas bibin!

²Piştî ku Pawlos û Barnabas, gellekî bi wan re ketin guftego û keftûleftê, wan biryar dan ku, bila Pawlos û Barnabas, bi hinekê birayan re ji bona vê pirsa gengeşiyê herin Orşelîmê cem şagirt û kalepîran.

³Bi vî awayî, yên ji aliyê Dêrê, ji rê ve hatin şandin û vegera neteweyan daxuyanî kirin û ji Fînîkyayê û Samîriyê ve derbas bûn û kêfxweşiya mezin dan hemû birayan.

⁴Û dema gîhaştin Orşelîmê, ji aliyê Dêrê, şagirtan û kalepîran ve hatin qebûl kirin û hemû tiştên ku Xwedê bi navgîniya wan kiriye anîn ziman.

⁵Lê belê hinek bawerkirên ji mezheba Fêrisiyan bûn, rabûn û gotin: Divê ew bêne sunet kirin û ji wan re emir bê dayîn ku li gor zagona Mûsa bikin!

⁶Şagirt û kalepîran, bona ku vê pirsgirêkê biaxifin civiyan.

⁷Û paşî guftegoyekê dirêj bû, Pêtrûs rabû ser pêlan û ji wan re got: Birano, hûn dizanin ku, bona neteweyan Mizgîniyê pêşiyê ji devê min bibihîzin û bi wê baweriyê bînin, Xwedê berî demekî dirêj, ji nav we min hilbijart.

⁸Û Xwedayê ku bi dilan dizane, mîna ku ji me re kiriye, bi dayîna Ruhê Pîroz ji wan re jî şahdeyî kir

⁹û wî di nava wan û me de tu cihêtiyê nekir, li ser bawerkirina wan, dilê wan jî safî kir.

¹⁰Niha, hûn çima nîrekî ku, ne bavên me, ne jî me karibûn bikişandina, dixin histuyê şagirtan û Xwedê diceribînin?

¹¹Lê belê em bawer dikin ku em ê jî bi xêra Xudan Îsa ve mîna wan xelas bibin.

¹²Û li ser vêya hemûya civakê bêdeng bû, dest bi guhdarkirina Barnabas û Pawlos kirin; wan çiqas nuwaze û mûcîzetên ku Xwedê bi navgîniya wan di nav neteweyan de çêkiriye, têgihandin[1].

¹³Û piştî ku wan axaftina xwe qedandin, Aqûp dest bi gotinê kir û got: Birano, min guhdarî bikin!

¹⁴Şîmûn anî ziman ku, Xwedê ji nava neteweyan, bona neteweyekî ji navê xwe re derxîne, cara yekemîn çawa seredaniya wan kiriye.

¹⁵Û gotinên peyxamberan vana rast dike; mîna ku hatiye nivîsandin:

¹⁶Paşî vêya ez ê vegerim û çadira Dawid, ya xerabûyî ji nû ve ava bikim. Û ez ê xirbên wê dîsa ava bikim û ez ê wê dîsa rakim ser pêlan.

¹⁷Da ku, mirovên li paş mayî û hemû neteweyên navê min li ser wan hatiye bang kirin, bila li Xudan bigerin.

¹⁸Xudanê ku van tiştana di destpêkê de têgîhandiye, dibêje[1].

¹⁹Ji bo vêya, bi min, divê em ji kesên ji neteweyan vegeriyane Xwedê ve astengiyê dernexînin;

²⁰tenê bona ku bila xwe ji mindariya seneman, ji zînayê û ji yê hatiye xeniqandinê û ji xwînê ve biparêzin, ji wan re binivîsînin.

²¹Ji ber ku ji demên kevnar ve, di her rojên Sebtê de li keniştan tête xwendin, li her bajarî, wazkirê Mûsa hene.

²²Wê çaxê ji hemûya Dêrê û şagirtan û kalepîran re, zilamên ku ji xwe ne, yanê, ji yên ku di nava birayan de pêş ve tên, Cihûdayê ku jê re Barsaba tête gotin û Sîlas bijartin û bi Pawlos û Barnabas re şandina Antaqyayê qenc xuyanî bû.

²³Bi navdîtiya wan ve wusa nivîsandin: Şagirt û kalepîr û birayan, ji birayên me yî ji neteweyan in û li Antaqyayê, li Sûriyê û li Kîlîkyayê ne re silavê dikin!

²⁴Me bihîst ku; ji nav me hinek kes hatine cem we, bi gotinên xwe aramiya we xera kirine û dilê[1]we tevlihev kirine; me wan neşandibûn.

²⁵Ji bo vêya, me bi yek rayê qirar dan ku, em ê zilaman hilbijêrin û bi xoşewîstê me Barnabas û Pawlos ve bişînin cem we;

²⁶ew zilamên ku di oxra Xudanê me Îsa Mesîh de canê xwe ji çav avêtine nin.

²⁷Ji ber vê yekê me Cihûda û Sîlas ji we re şandin û dê ew van tiştan bi dev bighînin we.

²⁸Ji ber ku ji Ruhê Pîroz û ji me re qenc xuya kir ku, xeynî van tiştên hewce ne zêdetir, em tu tiştî li we nekin bar:

²⁹Xwe ji tiştên ku ji pûtan re hatine qurban kirin, ji xwînê û ji yê hatiye xeniqandinê û ji zînayê biparêzin; ger hûn ji vana birevin, hûn ê qenc bikin. Di xweşiyê de bin!

³⁰Bi vî awayî ew derketin rê û çûn Antaqyayê û Civakê li hev civandin û nameyê dan wan.

³¹Û dema wan jî vêya xwendin, ji ber xemrevîniyê kêfxweş bûn.

³²Cihûda û Sîlasê ku bi xwe jî peyxamber bûn, bi gellek gotinan birayan teşwîq kirin û quwet dan wan.

³³Û piştî demekê li wir man, bona ku vegerin cem yê wan şandine, ji aliyê birayan ve bi dilxweşî hatin bi rê kirin.

³⁴Lê belê li wir mayîn ji Sîlas re qenc hate xuyanî kirin.

³⁵Lê belê Pawlos û Barnabas li Antaqyayê man, bi wekî din gellekan re ders dan û gotina Xudan waz dan.

³⁶Paşî çend rojan, Pawlos ji Barnabas re got: Niha em vegerin hemû bajarên ku me li wan gotina Xudan dane bihîstin û em seriyekî li birayan bixin, çawane em bibînin!

³⁷Barnabas, dixwest ku Yûhenayê bi navê Marqos ve tête nasîn jî bi xwe re bibe.

³⁸Lê belê Pawlos, li cîh nedît ku, zilamê li Pamfîlyayê wan sererû hiştiye û domî wezîfê nekiriye bi xwe re bibe.

³⁹Ji ber vê yekê keftûleftek dijwar derket, wusa ku, ji hev û din veqetiyan û Barnabas Marqos girt cem xwe û bi keştiyê, ber bi Qibrisê ve çû.

⁴⁰Lê belê Pawlos Sîlas bijart û paşî ji aliyê birayan ve li xêra Xudan hate emanet kirin, derket rê.

⁴¹Û li herêmê Sûrî û Kîlîkyayê geriya û Dêran[1]zeximand.