Read PEYMANA NÛ 2017 (ÎNCÎL) K. Şagirtan 3 Bible Online

K. Şagirtan 3 - PEYMANA NÛ 2017 (ÎNCÎL) bible

K. Şagirtan 3

¹Pêtrûs û Yûhena di saeta nehemîn ya wexta ku dua kirinê ye de, diçûn Perestgehê.

²Û mirovekî, ji dayîkbûyînê ve kûd bû dihat birin, bona ku ji kesên dikevin Perestgehê parsê bixwaze, her roj wî dianîn û datanîn cem Deriyê Perestgehê ku jê re: Ya Xweşik tête gotin.

³Û wî dema ku dît Pêtrûs û Yûhena dikevin Perestgehê, ji wan sedeqe xwest.

⁴Pêtrûs bi Yûhena re li wî nihêrt[1]û got: Li me binihêre!

⁵Û zilam bi hêviya ku tiştekî ji wan ve bistîne, bala xwe da wan.

⁶Lê belê Pêtrûs got: Zêr û zîvê min nîne, lê belê ez, yê bi min re heye didim te: Bi navê Îsa Mesîhê Nisretî rabe û bimeşe!

⁷Û bi destê wî yî rastê girt û wî rakir; wê demê lingên wî û hestiyên pahniyên wî quwetê dîtin[1].

⁸Tûl da û rabû ser pêlan, dest bi meşê kir; bi meş û tûlbûnê û bi pesnvedana Xwedê, bi wan re ket Perestgehê.

⁹Hemû gel wî di meşandin û pesnvedana Xwedê de dîtin.

¹⁰Û wan jî wî nas kirin, ew zilamê ku di deriyê Xweşik yê Perestgehê de bona parsê rûdinê ev bû û ji ber ya ku ji wî re bûye, bi şaşî û metaliyê ve tijî bûn.

¹¹Û gava ku hîn zilam bi Pêtrûs û Yûhena ve digirt; hemû gel di nava şaşiyekê de, li cîhê ku bi navê: Eywana Silêman tête binav kirin, ber bi wan ve baz dan.

¹²Dema Pêtrûs vêya dît; bangî gel kir: Ya zilamên Îsraêl, çima hûn bi vêya şaş man? An jî wekî ku me bi hêz û teqwaya xwe wî meşandibin; çima we berê xwe daye me ûsa zîq li me dinihêrin?

¹³Xwedayê Birahîm, Îshaq û Aqûp, Xwedayê bapîrên me, qûlê xwe Îsa bilind kir; we wî dan dest û dema Pîlato biryar da ku wî serbest berde, we wî li ber Pîlato înkar kir.

¹⁴Û we yê Pîroz û dad red kir û we xwestin ku qesasek ji we re bête bexşandin.

¹⁵Û we Serokê jiyanê kuşt! Lê belê Xwedê wî ji mirinê vejand; em şahdeyê vêya ne.

¹⁶Baweriya bi navê wî ve ev zilamê ku hûn dibînin û nas dikin navê wî xurt kir û baweriya ku bi navgîniya wî ye, li hemberî we hemûyan vê tenduristiya bitûmî da wî zilamî.

¹⁷Niha ya birano, ez dizanim ku, mîna rêvebirên we, we jî ji ber nezaniya xwe ûsa kirin;

¹⁸lê belê Xwedê, hemû tiştên ku di derheqê jan kişandina Mesîhê xwe de, bi devê hemû peyxamberan ve daye têgihandin, bi vî awayî anî cîh.

¹⁹Bi vî awayî bona ku gunehên we bên paqijkirin tobe bikin û vegerin, da ku, bila ji ber Xudan wextên nûbûnê werin

²⁰û bila Mesîh Îsayê ku bona we ji berê ve hatiye bijartin bişîne;

²¹heta vegerandina hemû tiştên ku Xwedê ji bastanê ve, bi devê hemû peyxamberên pîroz ve têgihandiye, hewce dike ku ezman wî qebûl bike.

²²Ji ber ku Mûsa ji kalikan re gotibû: Dê Xudan, Xwedanê we, ji we re di nava birayên we de, peyxamberekî mîna min derxîne; di her tiştî de, her gotinê ku ew ji we re bibêje, hûn ê guhdarî bikin[1].

²³Û dê wusa bibe ku, ji netewê, her canê ku guh nede wî peyxamberî, dê bête helaq kirin[1].

²⁴Û hemû peyxamberan, Samûyêl û yên li pey wî hatine û axifîne; hemûyan jî van rojan dane bihîstin[1].

²⁵Hûn lawê peymana bi gotina ku wî ji peyxamberan re û ji Birahîm re gotiye: Dê hemû malbatên erdê di nifşeya te de bête pîroz kirin[1], Xwedê bi kalikên we re birriye ne.

²⁶Xwedê, bona ku we her yekî ji rêyên xerab vegerîne û pîroz bike, Qûlê xwe vejand û pêşiyê ji we re şand!