Read PEYMANA NÛ 2017 (ÎNCÎL) K. Şagirtan 8 Bible Online

K. Şagirtan 8 - PEYMANA NÛ 2017 (ÎNCÎL) bible

K. Şagirtan 8

¹Û Saûl bi kuştina wî ve razî bûbû. Wê rojê li Orşelîmê, li dijî Dêrê dema zordestiyek giran dest pê kir; xeynî şagirtan, hemû belavî her aliyê Samîriyê û Cihûstanê bûn.

²Û zilamên ji Xwedê ditirsin, Steyfan binax kirin û bona wî şînekî mezin girtin.

³Lê belê Saûl, mal bi mal digeriya, Dêrê perîşan dikir û mêran û pîrekan kaş dikir û davêt girtîgehê.

⁴Êdî yên ku belav bûne, mizgîniya gotinê kirin û geriyan.

⁵Û Fîlîpûs çû bajarekî Samîriyê û ji wan re dest bi danasîna Mesîh kir.

⁶Û gava gel nuwazeyên ku çêkirine bihîstin û dîtin, gişt pevra guh dan tiştên ku ji aliyê Fîlîpûs ve tên gotin.

⁷Ji ber ku ji nava gellek kesî ruhên xerab bi bang kirina dengekî bilind derketin; gellek kesê felc û kûd hatin baş kirin.

⁸Û li wî bajarî kêfxweşiyek mezin çêbû.

⁹Lê belê li bajêr bi navê Şîmûn yekî sêrbaziyê dike û xwe mîna zilamekî mezin nîşan dide û bi vî awayî gelê Samîriyê şaş dike hebû

¹⁰û bi gotina: Qudreta Xwedê, ya ji wê re dibêjin Mezin, ev e; ji biçûk heta mezin hemûyan bala xwe didan wî.

¹¹Ji ber ku di demeke dirêj de ye, wan bi sêrbaziya xwe şaş û metal hiştibû, bala xwe didan wî.

¹²Lê belê dema bi gotinên Fîlîpûs yê Mizgîniya di derheqê Serweriya Xwedê û navê Îsa Mesîh de bawer bûn, zilam û pîrekan hatin vaftîz kirin.

¹³Şîmûn bi xwe jî bawerî anî û vaftîz bû û her tim li cem Fîlîpûs ma û dema çêkirina nîşanên serxweza û mûcîzetên mezin dît, şaş û metal ma.

¹⁴Û şagirtên li Orşelîmê ne, dema bihîstin ku gelê Samîriyê gotina Xwedê qebûl kirine, Pêtrûs û Yûhena ji wan re şandin.

¹⁵Vana jî gava gîhaştin wir, bona ku Ruhê Pîroz bigirin, ji bo wan dua kirin;

¹⁶ji ber ku ew hîn daneketibû ser wan yekî jî; tenê bi navê Xudan Îsa ve vaftîz bûbûn.

¹⁷Wê demê şagirtan destên xwe danîn ser wan, wan jî Ruhê Pîroz girtin.

¹⁸Û dema Şîmûn dît ku, bi vê rêxistina dest danîna şagirtan ve Ruhê Pîroz girtin, wî pere ji wan re anî û got:

¹⁹Vê qudretê bidin min jî ku, ez her destê xwe deynim ser kî, bila Ruhê Pîroz bigire!

²⁰Lê belê Pêtrûs ji wî re got: Bila perê te bi te re helaq bibe! Ji ber ku te got qey ez ê xelata Xwedê bi peran ve bi dest bixim!

²¹Di vî karî de ne para te heye û ne jî nisîbê te heye; ji ber ku dilê te li ber Xwedê ne rast e!

²²Niha ji vê xerabiya xwe ve tobe bike û li ber Xudan bigere, dibe ku ev fikra dilê te ji te re bête bexşandin.

²³Ji ber ku, ez te di tahliya ziravê de û pêwendiya rêşaşiyê de dibînim!

²⁴Şîmûn jî bersiv da û got: Bona min hûn li ber Xudan bigerin ku bila ji van gotinên we, tu yek neyê serê min!

²⁵Paşî ku wan li gor gotina Xudan şahdeyiyê kirin û gotin, li gellek gundê Samîriyê bi waz kirina Mizgîniyê vegeriyan Orşelîmê.

²⁶Lê belê milyaketekî Xudan ji Fîlîpûs re axifî û got: Rabe, here rêgeha ji başûr ve, ji Orşelîmê ve dadikeve Gazayê, ew der çol e.

²⁷Ew jî rabû û çû û a vay, zilamek ji Hebeşîstanê[1], wezîrê Kandakî ya qiralîça Hebeşîstanê, yekî hatiye xesandin yê berpirsiyarê hemû xezîneyên wê ye, bona peristinê hatibû Orşelîmê

²⁸û ew şunda vedigeriya û di erebeya xwe de rûniştî, Îşaya peyxamber dixwend.

²⁹Û Ruh ji Fîlîpûs re got: Here, bigihêje wê erebê!

³⁰Fîlîpûs jî baz da cem û bihîst ku ew Îşaya peyxamber dixwîne û got: Gelo tu tiştê ku dixwîne, fêhm dikî?

³¹Wî jî got: Heta ku mirovek rê nîşanî min nede, ez ê çawa bikaribim ku fêhm bikim? Û bona ku Fîlîpûs siwar be û li cem wî rûne rica kir.

³²Û cîhê ku ji kitêbê ve dixwend ev bû: Mîna mîhan ji serjêkirinê re hate birin û çawa ku li ber kesên hirî diqusîne berxik dengê xwe dernexe, ûsa devê xwe venake.

³³Dema hate biçûk dîtin, dadî ji wî ve hate parastin[1]. Dê kî nîjada wî di bîr de bîne? Ji ber ku, li rûyê erdê dawî dan jiyana wî[2].

³⁴Yê xesandî jî bersivê da Fîlîpûs û got: Ez ji te rica dikim, peyxamber vêya ji bo kî dibêje? Ji bo xwe, an ji bo yekî din?

³⁵Fîlîpûs jî devê xwe vekir û ji vî nivîsê ve dest pê kir û Mizgîniya di derheqê Îsa de têgihand wî.

³⁶Û dema di rê de diçûn, hatin cem avekê û yê xesandî got: A vay, av! Ma çi astengî li ber vaftîz bûna min heye?

³⁷Û Fîlîpûs got: Ger tu bi hemûya dilê xwe bawer bikî caiz e! Û wî bersivê da û got: Ez baweriyê tînim ku, Îsa Mesîh Lawê Xwedê ye!

³⁸Û wî emir da ku erebe bê sekinandin; Fîlîpûs û yê xesandî her du jî ketin nav avê û Fîlîpûs wî vaftîz kir.

³⁹Û dema ji avê ve derketin, Ruhê Xudan Fîlîpûs girt û bir û yê xesandî êdî ew nedît, ji ber ku bi kêfxweşiyê ve bi rêya xwe ve çû.

⁴⁰Lê Fîlîpûs jî li Aşdotê hate dîtin û heta ku bigihêje Sezariyê digeriya û li hemû bajaran mizgîniya Încîlê dikir[1].