Read PEYMANA NÛ 2017 (ÎNCÎL) N. Romiyan 12 Bible Online

N. Romiyan 12 - PEYMANA NÛ 2017 (ÎNCÎL) bible

N. Romiyan 12

¹Niha ya birano, ez bona dilovaniya Xwedê li ber we digerim ku hûn bedenên xwe mîna qurbanên zindî, pîrozî û wî xoşnûd kirî pêşkêşî Xwedê bikin; peristina we yî ruhanî ev e!

²Û li gor vê alemê mekin; lê belê bona ku hûn bizanibin viyana[1]Xwedê, ya qenc, xweş û bêkêmasî çî ye, bi nûbûna ramanên xwe ve bêne guhertin.

³Ji ber, ez bi wê xêr[1]a ku ji min re hatiye bexşandin ji her zilamê ku di nav we de ye re dibêjim, bila kes di derheqê xwe de ji hewcekirina fikirandinê zêdetir nefikire; lê belê her kes, bila li gor pîvana baweriya ku Xwedê dayiyê, bi eqlî selîm bifikire.

⁴Ji ber, mîna ku di bedenekê de gellek endamên me hene û karên hemû endaman ne wekhev e,

⁵em jî, yên ku gellek in, di Mesîh de yek beden in û endamên hev in.

⁶Û li gor xêra ku ji me re hatiye bexşandin, xelatên me yî ruhanî yên cihê hene; ger peyxamberî be, bila li gor pîvana baweriya xwe;

⁷ger xizmet be; bila di xizmetê de; ger yekî hînker be, bila di hînkirinê de be;

⁸an jî ger şîretker be, bila şîretan bide; yê ku bexşê dike, bila bi comerdî; yê ku rêvebirtî dike, bila bi xîretê; yê ku dilovaniyê dike, bila bi rûkenî bike!

⁹Bila hezkirina we, ne bi durûyî be! Ji xerabiyê bikerihin; bi qenciyê ve xwe girêdin!

¹⁰Di hezkirina biratiyê de ji hev û din bi dilovanî hez bikin; di hurmetê de yên din çêtir bibînin!

¹¹Di xîretê de sist nebin; di Ruh de agirîn bibin; qûlitiyê ji Xudan re bikin!

¹²Bi hêviyê kêfxweş bibin; di tengasiyê de di ber xwe bidin; di duê de bi xîret bidomînin!

¹³Beşdarî motajiya pîrozan bikin; bala xwe bidin mêvan perweriyê!

¹⁴Bona kesê zilmê li we dikin, qenciyê bixwazin; qenciyê bixwazin û lanetê mekin!

¹⁵Bi kêfxweşan re kêfxweş bibin; bi kesên digirîn re bigirîn!

¹⁶Li dijî hev û din yekraman bin. Tiştên bilind nefikirin, lê belê hevaltiyê bi kesên biçûk tên dîtin re bikin. Ji cem xwe zane nebin!

¹⁷Li dijî xerabiyê ji tu kesî re xerabiyê mekin! Li ber çavên her kesî, bona çêkirina ya qenc, bala xwe bidin.

¹⁸Ger bibe, heta ku ji destê we tê, bi hemû mirovan re di nava aşitiyê de bijîn.

¹⁹Ya xoşewîstno, ji bo xwe tolê nestînin; lê belê cîh bidin xezeba Xwedê; ji ber ku hatiye nivîsandin: Xudan dibêje: Tol ya min e, ez ê berdêla wê bidim[1].

²⁰Lê belê: Ger neyarê te birçî bûbe, wî têr bike; ger tî bûbe, avê bide wî. Ji ber ku bi çêkirina vana, tuyê pêtên agir li ser serê wî kom bikî[1].

²¹Nebe binketê xerabiyê, lê belê xerabiyê bi qenciyê bindest bike!