Read PEYMANA NÛ 2017 (ÎNCÎL) 1. Korîntiyan 3 Bible Online

1. Korîntiyan 3 - PEYMANA NÛ 2017 (ÎNCÎL) bible

1. Korîntiyan 3

¹Ya birano, hêz neanîm ku, ji we re, mîna ku ji ruhaniyan re dibêjim, bibêjim; lê wekî ji cismaniyan re û di Mesîh de ji zarokan re bibêjim, gotim.

²Min şîr da we, ne xwarinên hişk; ji ber ku we hîn nikarîbûn xwarina hişk bixwarana û niha jî hûn nikarin bixwin;

³ji ber ku hûn hîn cismanî ne; ji ber, madem ku çavnebarî û keftûleftî di nava we de heye, ma hûn ne cismanî ne? Û ma hûn li gor mirov nameşin?

⁴Ji ber ku ger yek bibêje: Ez yê Pawlos im! Û yê din: Ez yê Apollos im! Ma hûn ne cismanî ne[1]?

⁵Ji ber ku Apollos kî ye û Pawlos kî ye? Li gor ku Xudan daye her yekî, xizmetkarên ku we bi navgîniya wan baweriyê anîne ne.

⁶Min daçikland, Apollos av da; lê belê Xwedê mezin kir.

⁷Bi vî awayî ne yê çandî, ne jî yê avdayî tiştek nîn in, lê belê Xwedayê ku yê hatiye çandin mezin kiriye yî.

⁸Niha yê çandî û avdayî yek in; lê belê her yek dê mişeya xwe li gor keda xwe bistîne.

⁹Ji ber ku em kedkarên Xwedê ne û hûn jî zeviya Xwedê û xaniyê Xwedê ne.

¹⁰Min li gor xêra Xwedê, ya ku ji min re hatiye dayîn, mîna mîmarekî[1]zaniyar, bingeh danî; kesên din jî li ser vê bingehê ava dikin. Lê belê bila her kes bala xwe bidinê ku ka çawa li ser wê ava dikin.

¹¹Ji ber ku tu kes, xeynî bingeha hatiye danîn, yanê, xeynî Îsa Mesîh nikare bingehek din deyne.

¹²Lê belê ger kesek li ser vê bingehê bi zêr, zîv, kevirên biqîmet, dar, gîha, qamîş ava bike,

¹³dê karê her kesî eşkere bibe; dê roj wê bide xuya kirin; ji ber ku dê bi agir ve eşkere bibe; ka karê her yekî çi celeb e dê agir bi xwe bide îspat kirin.

¹⁴Ger karê yekî ku li ser wê ava kiriye bisekine, dê ew kes mişeyê bistîne.

¹⁵Ger karê yekî bişewite, dê ziyanê[1]bike; lê belê ew bi xwe xelas bibe, lê dê bibe mîna ku di nava agir de derbas bûye.

¹⁶Ma qey hûn nizanin ku, hûn perestgeha Xwedê ne û Ruhê Xwedê di we de disekine[1]?

¹⁷Ger kesek, perestgeha Xwedê xera bike, dê Xwedê wî xera bike; ji ber ku perestgeha Xwedê pîroz e û ew perestgeh hûn in.

¹⁸Bila tu kes xwe bi xwe nexapîne! Ger yekî di nava we de, xwe li gor pîvana vê dinê zaniyar bihesibîne, bila bona zaniyar bibe, bêaqil bibe!

¹⁹Ji ber ku zaniyariya vê dinê, di çavê Xwedê de bêaqilî ye; ji ber ku hatiye nivîsandin: Ew, zaniyaran di hîleyên[1]wan de digire[2].

²⁰Û dîsa: Xudan, valahiya ramanên zaniyaran dizane[1].

²¹Bo vê yekê bila tu kes, bi mirovan ve pesnê xwe nede; ji ber ku her tişt yê we ne:

²²Divê Pawlos, an Apollos, an Kîfas, an dinya, an jiyan, an mirin, an dema niha, an jî ya ku bê, her tişt yê we ye;

²³lê belê hûn yê Mesîh in, Mesîh jî yê Xwedê ye.