Read PEYMANA NÛ 2017 (ÎNCÎL) Galatiyan 1 Bible Online

Galatiyan 1 - PEYMANA NÛ 2017 (ÎNCÎL) bible

Galatiyan 1

¹Ne ji mirovan, ne jî bi navgîniya mirovan, lê bi navgîniya Îsa Mesîh û Bav Xwedê, yê ku wî ji miriyan vejandiye, bi şagirtî hatiye tayîn kirin, ji min Pawlos

²û ji hemû birayan, yên ku bi min re ne, ji Dêrên[1]ku li Galatiyêne re:

³Bila ji Bavê me Xwedê û ji Xudanê me Îsa Mesîh, yê ku li gor viyana[1]Bavê me û Xwedayê me, bona me ji dema nihayî xerab xelas bike,

⁴xwe bona gunehên me daye, xêr û xweşî ji we re be;

⁵bila heta bêdawiyan ji Xwedê re bilindahî be! Amîn.

⁶Ez ecêb dimînim ku hûn, yê ku bi xêra Mesîh bangî we kiriye berdidin û ewqas bi lezî vedigerin mizgînek din;

⁷bi rastî mizgînek din tune ye; lê belê kesên dixwazin ku aqlê we tevlihev bikin û Mizgîniya Mesîh bişewşînin hene.

⁸Lê belê ger em an jî milyaketekî ji ezman, çewtî Mizgîniya ku me ji we re waz kiriye mizgîniyek din ji we re waz bike, bila nalet li wî be!

⁹Çawa ku me berê gotibûn, niha jî dîsa dibêjim: Ger kesek ji we re, li dijî Mizgîniya ku we qebûl kiriye mizgîniyek din waz bike, bila nalet li wî be!

¹⁰Ji ber ku niha, ma gelo ez li riza mirovan, ya na li riza Xwedê digerim? An jî qey ez bona xoşnûd kirina mirovan dişuxulim? Ger min hîn jî xoşnûd kirina mirovan bixwesta, ez nedibûm qûlê Mesîh.

¹¹Birano, ez dixwazim ku hûn jî bizanin, Mizgîniya ku ji aliyê min ve hatiye waz kirin, ne li hev anîna mirovan e.

¹²Ji ber ku min wê[1]ji mirovan ve negirt û nehatim hîn kirinê; lê belê bi peyxama Îsa Mesîh ve stendim.

¹³Ji ber ku we ji jiyana minî berê, ya di Cihûdîtiyê de bihîstiye; heta ku tu bibêje min zilmê li Dêra Xwedê dikir û wê dişkenand û derbas dikirim.

¹⁴Di parêziya kevneşopên bapîrê xwe de, bi sertaybetî bi xîret û di Cihûdîtiyê de ji gellekên temendarê xwe gellekî di pêş de bûm.

¹⁵Lê belê Xwedanê ku hîn ez di rehma dayika xwe de bûm min bijart û bi xêra xwe bangî min kir,

¹⁶gava bona ku ez di nav netewan de wî waz bikim, razî bû ku Lawê xwe nîşanî min bide, ez hema bi xwînê û goşt[1]re neşêwirîm

¹⁷û neçûm Orşelîmê, cem yên berî min şagirtiyê dikirin jî; lê belê çûm Erebîstanê û dawiyê dîsa vegeriyam Şamê.

¹⁸Sê sal li pey vêya, bona ku bi hev re nasîna Kîfas çûm Orşelîmê û panzdeh roj li cem wî mam.

¹⁹Lê belê min kesî ji şagirtên din nedît; tenê birayê Xudan, Aqûp dîtim.

²⁰Û di tiştên ku ji we re dinivîsim de, a vay, ez li ber Xwedê derew nabêjim.

²¹Pişt re ez hatim herêmên Sûrî û Kîlîkyayê.

²²Û Dêrên Cihûstanê yên di Mesîh de ne, min bi xwe nas nedikirin.

²³Û tenê vêya bihîstibûn: Zilamê ku demekî zilmê li me dikir, baweriya berê dixwast ku xera bike, niha waz dike!

²⁴Û bi vî awayî, ji bo min Xwedê bilind dikirin.