Read PEYMANA NÛ 2017 (ÎNCÎL) Galatiyan 4 Bible Online

Galatiyan 4 - PEYMANA NÛ 2017 (ÎNCÎL) bible

Galatiyan 4

¹Lê belê ez dibêjim: Ger mêrasger xwediyê her tiştî jî be, heta ku zarok be, ji dîlekî ne bi ferq e[1];

²lê belê heta dema ku Bavê wî bijartiye, di bin çavnêriya wasî û wekîlan de ye.

³Mîna vêya, em jî dema zarok bûn, dîlê di binya ragezê serekînê dinê de dijîn bûn;

⁴lê belê wexta dem tijî bû, bona ku yên di bin zagonê de xelas bike,

⁵Xwedê, Lawê xwe yê ku ji pîrekê ve bûyiye, yê ku di bin zagonê de bûyiye şand; da ku, em mafê lawitiyê bigirin.

⁶Bona ku hûn law in, Xwedê Ruhê Lawê xwe yê bi gotina: Abba, Bavo! bang dike şand dilên we.

⁷Bo vê sedemê êdî hûn ne dîl in, lê law in û ger ku hûn law in, him jî bi navgîniya Mesîh ve mêraskerê Xwedê ne.

⁸Lê belê wê demê we bi Xwedê nizanîbûn û bi xwezayî ji yên ku ne îlah in re qûlitiyê kirin;

⁹lê belê niha jî piştî ku we Xwedê nas kirin, ya rastî, hûn ji aliyê Xwedê ve hatin nas kirin; çawa dibe ku hûn dîsa vedigerin van ragezên bêbandûr[1]û bêrûmet û dixwazin dîsa ji vana re bibin dîl?

¹⁰Hûn bi rojan û mehan û demsalan û salan digirin!

¹¹Bona ku, ez ji bo we bi awayekî vala nexebitîbim, ez ji bo we ditirsim.

¹²Birano, li ber we digerim, bibin mîna min; ji ber ku ez jî bûm mîna we! We tu neheqiyê li min nekirin;

¹³lê belê hûn dizanin ku, min Mizgîniyê cara pêşîn di lawaziya bedenî de ji we re waz kir

¹⁴û rewşa bedena min bona we ceribandinek bû û we min biçûk nedîtin û red nekirin; lê belê we min mîna milyaketekî Xwedê, mîna Mesîh Îsa, qebûl kirin.

¹⁵Ma niha ji wê dilxweşiya we re çi bû? Ji ber ku ez bona we şahdeyiyê dikim ku, ger ji destê we bihata, we yê çavên xwe bikolana û bidana min.

¹⁶Nexwe, qey bona ku min gotina rast ji we re got, ez bûm neyarê we?

¹⁷Ew di derheqê we de xîretê dikin, ne bi nêta qenc; lê belê bona ku hûn ji bo wan xîretê bikin, dixwazin we li derve bihêlin.

¹⁸Lê belê ne tenê ger dema ez li cem we bim, her tim bixîret bûn qenc e.

¹⁹Zarokên min; heta ku Mesîh di we de tişê[1]bigire, dîsa bona we jana welidandinê dikişînim;

²⁰lê belê min dixwest ku ez niha li cem we bim û awaza dengê xwe biguherînim; ji ber ku ez di derheqê we de dudilî me!

²¹Ya hûn, yên dixwazin ku di bin zagonê de bin, ji min re bibêjin: Ma qey hûn zagonê nabihîzin?

²²Ji ber ku bi gotina du lawên Birahîm hebûn, yek ji cariyê û yek ji pîreka azad, hatiye nivîsandin.

²³Lê belê yê ku ji cariyê bûye li gor bedenê û yê ku ji pîreka azad ve bûye, li gor wadê welidiye.

²⁴Li vir wekhev kirinek heye; ji ber ku ev pîrekana nîşana du peymanê ne; yek ji Çiyayê Sînayê ye, dê zarokên bibe dîl bibin; ew Hacirê ye.

²⁵Û Hacirê, Çiyayê Sînayê li Erebîstanê nîşan dide û beramberê Orşelîma niha ye; ji ber ku bi zarokên xwe re dîlitiyê dike.

²⁶Lê belê Orşelîma ezmanî azad e, dayîka me ew e.

²⁷Ji ber ku hatiye nivîsandin: Ya stewra ku nawelidîne, şa bibe! Hê ya ku bi jana zayînê nizane, bi şabûnê biqêre! Ji ber, zarokên pîreka ku hatiye berdan, ji zarokên ya bi mêr zêdetir in[1].

²⁸Û em, birano, mîna Îshaq zarokên wadê ne.

²⁹Lê belê yê ji rêya taybetî ve bûye, çawa ku wê demê li yê li gor Ruh ve bûye zilmê dikir, niha jî ûsa dibe.

³⁰Lê belê Nivîsa Pîroz dibêje çi? Pîreka dîl û lawê wê bavêje derve! Ji ber ku lawê pîreka dîl, dê bi lawê pîreka azad ve mêrasê negire[1].

³¹Bo vê yekê, ya birano, em ne zarokên cariyê, lê belê zarokên pîreka azad in.