Read PEYMANA NÛ 2017 (ÎNCÎL) Fîlêmon 1 Bible Online

Fîlêmon 1 - PEYMANA NÛ 2017 (ÎNCÎL) bible

Fîlêmon 1

¹Ji Pawlos, girtiyekê Mesîh Îsa û ji birayê Tîmotêyos ve, ji xoşewîst û hemkedkarê me Fîlêmon re

²û ji xwuşka me Afiya re û ji Arxîpoyê ku me pev re têkoşînê daye û ji Dêra ku li mala te ye re:

³Bila ji Bavê me Xwedê û ji Xudan Îsa Mesîh ve xêr û xweşî ji we re be!

⁴Ez bi bihîstina hezkirin û baweriya te yî ji Xudan Îsa re û ji hemû pîrozan re, ji Xwedayê xwe re şikir dikim

⁵û di duayên xwe de her tim te bi bîr ve tînim;

⁶da ku, di zanîna hemû tiştên qenc yên ku di we de ne de, beşdariya te yî baweriyê bila bona Mesîh kiryar be.

⁷Ji ber ku hezkirina te ji min re bû çavkaniya dilşayiyek mezin û xemrevîniyê; ji ber ku birayê xoşewîst, dilên pîrozan bi navgîniya te şa bû.

⁸Ji ber vê yekê, çawa ku bona tiştê birêk ji te re emir bikim, di Mesîh de ez gellekî wêrek im[1], lê

⁹ez, Pawlosê kalepîr û niha jî girtiyê Mesîh Îsa, bi hezkirinê ve ji te rica kirinê çêtir digirim.

¹⁰Ji bo lawê xwe Onîsîmûs, yê ku ez di zincîrên xwe de jê re bûm bav,

¹¹yê demekê ji te re bê fêde bû, lê belê niha ji te re û ji min re bi fêde ye, ji te rica dikim;

¹²wî, yanê, dilê xwe ji te re şûnda dişînim.

¹³Min dixwest ku heta dema ez di oxra Mizgîniyê de girtîbim dêvla te bona ku xizmetê ji min re bike, li cem xwe bigirim;

¹⁴lê belê heta ku erêkirina te nebe, min nexwest ku tiştekî bikim; da ku, bila qenciya ku tu bike, ne ji hewcedariyê, lê belê ji dil ve bibe.

¹⁵Ji ber ku demekî cudabûna wî ya ji te, dibe ku bona vêya bû, yanê,

¹⁶êdî tuyê wî ne mîna qûl[1], lê ji qûlan ve bilindtir, bi taybetî bona min, lê belê hîn pirr zêde him di bedenê de, him jî di Xudan de, bona te dê mîna birayek xoşewîst, abadîn[2]bibe yê te bû.

¹⁷Niha ger tu min rêhevalê xwe dihesibîne, wî mîna ku tu min qebûl dike qebûl bike.

¹⁸Ger wî di tiştekî de neheqî li te kiribe, an jî deynê wî hebe, vêya li min bihesibîne.

¹⁹Ez, Pawlos vêya bi destê xwe dinivîsînim: Ez ê berdêla wê bidim! Herhal hewce nake ku ez bibêjim tu heta jiyana xwe jî deyndarê min î.

²⁰Belê, ya birayo, bila di Xudan de fêdeyek te ji min re bibe; di Mesîh de dilê min şa bike!

²¹Ez bi bawerbûna îtaet kirina te û bi zanîna tuyê bi zêdeyî xwestekê min çêbike, ji te re dinivîsînim.

²²Tevî vêya ji min re jî qonaxekî amade bike; ji ber, ez hêvî dikim ku, ez ê bi navgîniya duayên we ji we re bême bexşandin.

²³Êpafrasê di Mesîh Îsa de hevalê minî girtîgehê,

²⁴hemkedkarên min Marqos, Arêstarqos, Dîmas û Lûqa silavê li te dikin.

²⁵Bila xêra[1]Xudanê me Îsa Mesîh bi ruhê we re be! Amîn.