Read PEYMANA NÛ 2017 (ÎNCÎL) Peyxam 17 Bible Online

Peyxam 17 - PEYMANA NÛ 2017 (ÎNCÎL) bible

Peyxam 17

¹Û yekî ji heft milyaketên ku heft tasên wan hene, hat û bi min re axifî û got: Were! Ez ê cezayê ji fahîşeya li qeraxa avên mezin ve rûniştiye nîşanî te bidim.

²Qiralên erdê[1], bi wê re zinê kirin û yên li ser rûyê erdê dijîn, bi xemra zînaya wê ve serxweş bûn.

³Û wî min di Ruh de bir çolistanê û min li ser cenawirekî sor, yê ku heft serî û deh qiloçên wî hene û bi navên kufrê ve tijî ye, jinikekê siwarbûyî dît.

⁴Û pîrek, kincên erxewanî û sor li xwe kiribû û xwe bi zêr û kevirên bi qîmet û bi înciyan ve xemilandibû û di destê wê de kaseyek zêrînî ya bi tiştên erjeng û bi mindariyên zînaya xwe ve tijî hebû

⁵û li ser eniya wê, navek hatibû nivîsandin: RAZ[1], BABÎL A MEZIN, DAYÎKA FAHÎŞEYÊN Û ERJENGIYÊN DINÊ.

⁶Û min dît ku, pîrek bi xwîna pîrozan ve û bi xwîna şahidên Îsa ve serxweş bûye û dema min wê dît, ez ketim şaşiyek mezin.

⁷Û milyaket ji min re got: Çima tu şaş ma? Raza pîrekê û ya cenawirê bi heft serî û deh qiloçî ez ê ji te re bibêjim.

⁸Cenawirê ku tu dibînî, demekê hebû û niha tune ye û demek din dê ji kûritiyên bê binî ve derkeve û bi têkçûnê[1]ve biçe. Û kesên li ser rûyê erdê rûdinin û navê wan cergî dinya ava bûye di kitêba jiyanê de nehatiye nivîsîn, dema cenawir bibînin, dê şaş bibin; ji ber ku ew demekê hebû û niha nîne û dê dîsa bibe[2].

⁹Bona fêhm kirina vêya hewce ji zaniyariyê heye! Heft serî, heft çiyayên ku pîrek li ser wan ve rûniştiye û heft qiral in.

¹⁰Û pênc heb ketin û yek disekine, yê din jî hîn nehatiye û dema bê, lazim e ku demekî kurt bimîne.

¹¹Û cenawirê ku hebû, lê belê niha nîne, bi xwe jî yê heyştemîn e û dê ew ji heftan bibe yek û here têkçûnê[1].

¹²Û deh qiloçên ku tu dibînî, deh qiralên ku hîn qiraletiyê nestendine nin[1]; lê belê vana, tevî cenawir mîna qiralan, dê bona saetekî rayedariyê bistînin.

¹³Ramanên vana yek in, hêzên xwe û rayedariyên xwe didin cenawir.

¹⁴Dê vana bi Berxikê re şer bikin û dê Berxik wan bindest bike; ji ber ku ew Xudanê xudanan, Qiralê qiralan e û yên bi wî re ne, yên ku hatine bang kirin, hatine bijartin û yên bi wî re dilsoz maye ne.

¹⁵Û wî ji min re got[1]: Van avên ku tu dibînî, cîhê ku fahîşe lê rûniştiye, gelan û civakan û neteweyan û zimanan in.

¹⁶Û deh qiloçên ku te li ser cenawir dît, ew dê ji fahîşê ve bikerihin, wê perîşan bikin û tazî bihêlin û ew dê goştê wê bixwin û wê di agir de bişewitînin.

¹⁷Ji ber, heta ku gotinên Xwedê biçe serî, Xwedê kirina ramanê xwe û di yek ramanê de bûyînê û qiraletiya xwe bi cenawir ve dayînê xist dilê wan.

¹⁸Û ev pîreka ku tu dibînî, bajarê mezin yê li ser qiralên dinê qiraletiya wê heye ye.