Read PEYMANA NÛ 2017 (ÎNCÎL) Peyxam 6 Bible Online

Peyxam 6 - PEYMANA NÛ 2017 (ÎNCÎL) bible

Peyxam 6

¹Û min dît, gava ku Berxikê ji heft mohran yekî vekir[1]û min bihîst ku yekî ji çar afirên zindî, bi dengekî mîna gurmîniya ezmên got: Were!

²Û dîtim û a vay, hespekî sipî û kevanekî yê li ser wê siwar e hebû û tacekî bona wî hate dayîn û bona ku serfiraz bê, bi serkeftinê ve derket.

³Û Dema mohra duwemîn vekir, min gotina afirê zindî yê duwemîn ku got: Were[1]! bihîst.

⁴Û hespekî din, hespek sor derket û bona aşitî ji dinê ve rake û bona hev û din serjêkirinê rayedarî ji yê ku li ser wê siwar e re hate dayîn û şûrekî mezin ji wî re hate dayîn.

⁵Û dema mohra sêwemîn vekir, min gotina afirê zindî yê sêwemîn ku got: Were[1]! bihîst. Û dîtim û a vay, hespekî reş û şehînek[2]di destê yê ku li ser wê siwar bû de hebû.

⁶Û di nava çar afirên zindî de wekî dengekî ûsa axifî bihîstim: Olçekek genim bi dînarekî[1]û sê olçek ceh bi dînarekî û xesarê[2]nede zeyt û xemrê!

⁷Û dema mohra çaremîn vekir, min gotina afirê zindî yê çaremîn ku got: Were[1]! bihîst.

⁸Û dîtim û a vay, hespekî rengê wê çilmisokî[1]ye; navê suwarê wê Mirin bû û warê miriyan li pey wî dihate. Ji vana re, bona ku bi şûr, bi xela, bi weba û bi ajalên hov yên rûyê erdê ve mirinê biweşînin, li ser çarî yek rûyê erdê rayedarî hate dayîn.

⁹Û dema mohra pêncemîn vekir, min li binya pêşkêşgehê canê yên bona gotina Xwedê û şahdeyiya ku domandine hatine kuştin dît.

¹⁰Û bi dengekî bilind qêriyan û gotin: Ya Efendiyê[1]pîroz û rast! Bona ku tu yên li rûyê erdê daraz bikî û heyfa xwîna me bistînî, hîn tuyê çiqas bisekinî?

¹¹Û ji her yekî ji wan re, qeftanê sipî hate dayîn û ji wan re hate gotin ku bila heta hejmara rêhevalên wanî dîl û birayên wanî mîna wan bên kuştin temam bibe, demekî kurt rehet bikin.

¹²Û dema mohra şeşemîn vekir, min dît û a vay, erdhejînek[1]mezin bû û roj, mîna pertalek[2]ji mûyê be, reş bû û hemûya heyvê bû mîna xwînê

¹³û sitêrkên ezman, gava ku darê hêjîrê bi bayek xurt bête kilkirin çawa hêjîrên xwe yî xag diweşîne, ketin ser rûyê erdê.

¹⁴Û ezman, mîna tomarek bê pêçandin ji holê ve rabû û her çiya û her girav ji cîhê xwe ve hatin rakirin.

¹⁵Û qiralên dinê û mezinên wê û fermandarên wê û dewlemendên wê û xurtên wê û hemû azad û mirovên wê yî dîl li şikeftan û di nava zinarên çiyayan de xwe veşartin

¹⁶û ji çiya û zinaran re digotin: Bi ser me ve bikevin û ji rûyê yê li ser text ve rûniştiye û ji xezeba Berxikê ve me veşêrin!

¹⁷Ji ber ku roja mezin ya xezeba wî hat û ma kî dikare bisekine[1]?