Read PEYMANA NÛ 2017 (ÎNCÎL) Peyxam 7 Bible Online

Peyxam 7 - PEYMANA NÛ 2017 (ÎNCÎL) bible

Peyxam 7

¹Û paşî vêya, bona ku bi ser erdê ve û bi ser behrê ve û bi ser darê her wekî ve ba nebe, çar milyaketên ku bi girtina çar bayê erdê, li çar aliyê rûyê erdê ve disekinin, dîtim.

²Û milyaketekî din, yê ku mohra Xwedayê zindî pê re bû, ji rojhilatê ve derdikeve dîtim û wî ji çar milyaketên ku rayedariya xesariya erd û behrê ji wan re hatiye dayîn re bi dengekî bilind qêriya û got:

³Heta ku em qûlên Xwedayê xwe ji eniya wan ve bi mohr bikin, xesarê nedin erd û behr û daran!

⁴Û min hejmara yên ku hatine mohrkirin bihîst: Ji hemû eşîrên Lawên Îsraêl, sed û çel û çar hezar hatibûn mohrkirin.

⁵Ji eşîra Cihûda donzdeh hezar hatibûn mohrkirin; ji eşîra Rûben donzdeh hezar, ji eşîra Gad donzdeh hezar,

⁶ji eşîra Aşer donzdeh hezar, ji eşîra Naftalî donzdeh hezar, ji eşîra Manaşşe donzdeh hezar,

⁷ji eşîra Şîmeûn donzdeh hezar, ji eşîra Lêwî donzdeh hezar, ji eşîra Îsşakar donzdeh hezar,

⁸ji eşîra Zebûlûn donzdeh hezar, ji eşîra Ûsiv donzdeh hezar, ji eşîra Benyamîn donzdeh hezar hatibûn mohrkirin.

⁹Paşî vêya dîtim û a vay, ajaweyek mezin ya ku kes nikare bijmêre, ji her netewî, ji her eşîrî, ji her gelî û ji her zimanî ava bûye, li ber text û li ber Berxikê ve sekinîbûn; qeftanên sipî li xwe kiribûn û di destê wan de guliyên xurmê hebûn.

¹⁰Û bi dengekî bilind diqêriyan û digotin: Xelaskirin, mexsûsî Xwedayê me yî li ser text ve rûniştî û Berxikê ye!

¹¹Û hemû milyaket li dora text û kalepîran û çar afirên zindî ve disekinîn û li ber text xwe bi ser rû davêtin erdê, ji Xwedê re diperistin û digotin:

¹²Amîn! Bila pesnahî û bilindahî û zaniyarî û şikirî û hurmet[1]û hêz û qudret, bi abadîna abadînan ve ji Xwedayê me re be! Amîn.

¹³Û yekî ji kalepîran bersiv da min û got: Vanê ku qeftanê sipî li xwe kirine kî ne û ji ku ve hatine?

¹⁴Û ji wî re gotim: Ya efendiyê min, tu dizanî! Û wî ji min re got: Vana, yên ji wê tengasiya mezin ve têne ne û wan qeftanên xwe şuştin û wan qeftanên xwe di xwîna Berxikê de sipî kirin.

¹⁵Bona vêya li ber texta Xwedê ne û roj û şev di Perestgeha wî de, ji wî re xizmetê dikin û yê li ser text ve rûniştiye, dê çadira xwe li ser wan ve vegire.

¹⁶Û ew dê êdî birçî nebin û êdî tî nebin û ne roj, ne jî germayiyek li wan nexîne;

¹⁷ji ber ku dê Berxikê ku li nava text e wan bajo û bibe çavkaniyên avên jiyanê û dê Xwedê hemû hêstiran ji çavên wan ve paqij bike.