Read Pa-khek-lé Pe̍h-ōe-jī Sèng-keng, 1933 - Barclay Taiwanese Bible, 1933 - Full Romanization Lia̍t-ông siōng-koàn 22 Bible Online

Lia̍t-ông siōng-koàn 22 - Pa-khek-lé Pe̍h-ōe-jī Sèng-keng, 1933 - Barclay Taiwanese Bible, 1933 - Full Romanization bible

Lia̍t-ông siōng-koàn 22

¹Í-sek-lia̍t kap A-lân saⁿ-nî kú bô kau-chiàn.

²Kàu tē-saⁿ nî Iû-tāi ông Iok-sa-hoat lo̍h-khì Í-sek-lia̍t ông hia.

³Í-sek-lia̍t ông tùi i ê lô͘-po̍k kóng, Lín kiám-m̄-chai Ki-lia̍t ê La̍h-boa̍t sī lán-ê? lán kéng-jiân tiām-tiām bô tùi A-lân ông ê chhiú chhiúⁿ--lâi mah?

⁴A-hap kā Iok-sa-hoat kóng, Lí beh kap góa khì Ki-lia̍t ê La̍h-boa̍t kau-chiàn mah? Iok-sa-hoat kā Í-sek-lia̍t ông kóng, Góa chhin-chhiūⁿ lí, góa ê peh-sìⁿ chhin-chhiūⁿ lí ê peh-sìⁿ, góa ê bé chhin-chhiūⁿ lí ê bé.

⁵Iok-sa-hoat kā Í-sek-lia̍t ông kóng, Chhiáⁿ lí kin-á-ji̍t mn̄g Iâ-hô-hoa ê ì-sù,

⁶Í-sek-lia̍t ông chiū chū-chi̍p sian-ti iok-lio̍k sì-pah lâng, mn̄g in kóng, Góa tio̍h chiūⁿ--khì Ki-lia̍t ê La̍h-boa̍t lâi kau-chiàn, á-sī tio̍h soah ah? In kóng, Thang chiūⁿ--khì; in-ūi Chú beh chiong i kau tī ông ê chhiú.

⁷Iok-sa-hoat kóng, Tī-chia kiám bô iáu ū Iâ-hô-hoa ê sian-ti, hō͘ lán thang tùi i lâi mn̄g mah?

⁸Í-sek-lia̍t ông kā Iok-sa-hoat kóng, Iáu ū chi̍t-lâng, sī Im-la̍h ê kiáⁿ Bí-kai-ngá, lán thang tùi i lâi mn̄g Iâ-hô-hoa; chóng-sī góa oàn-hūn i, in-ūi i só͘ chhàm-gú góa-ê, lóng bô hó-ōe, chí-ū chai-ē nā-tiāⁿ. Iok-sa-hoat kóng, Chhiáⁿ ông bo̍h-tit án-ni kóng.

⁹Í-sek-lia̍t ông chiū tiàu chi̍t ê koaⁿ-oân lâi, kóng, Lí khì kiò Im-la̍h ê kiáⁿ Bí-kai-ngá kín-kín lâi.

¹⁰Í-sek-lia̍t ông kap Iû-tāi ông Iok-sa-hoat, ta̍k-ê chē i ê chō-ūi, chhēng lé-ho̍k, tī Sat-má-lī-a siâⁿ-mn̂g-kháu khoah ê só͘-chāi; chèng sian-ti ta̍k-ê tī in ê bīn-chêng chhàm-gú.

¹¹Ki-ná-ná ê kiáⁿ Se-tí-ka chòe thih-kak, kóng, Iâ-hô-hoa án-ni kóng, Lí beh ēng chiah-ê tak A-lân lâng, kàu in bia̍t-bô.

¹²Chèng sian-ti lóng án-ni chhàm-gú kóng, Thang chiūⁿ--khì Ki-lia̍t ê La̍h-boa̍t, beh tek-sèng; in-ūi Iâ-hô-hoa beh chiong i kau tī ông ê chhiú.

¹³Hit-ê khì kiò Bí-kai-ngá ê sù-chiá kā i kóng, Khòaⁿ ah, chèng sian-ti lóng kóng chi̍t-iūⁿ ōe, tùi ông kóng hó-sū; kiû lí só͘-kóng-ê kap in saⁿ-tâng, pîⁿ-pîⁿ kóng hó-ōe.

¹⁴Bí-kai-ngá kóng, Góa kí éng-oa̍h ê Iâ-hô-hoa lâi kóng, Iâ-hô-hoa tùi góa kóng sím-mi̍h, góa beh kóng i.

¹⁵Bí-kai-ngá kàu ông ê bīn-chêng, ông mn̄g i kóng, Bí-kai-ngá ah, goán thang chiūⁿ-khì Ki-lia̍t ê La̍h-boa̍t lâi kau-chiàn, á-sī tio̍h soah ah? I ìn kóng, Thang chiūⁿ-khì, beh tek-sèng; Iâ-hô-hoa beh chiong i kau tī ông ê chhiú.

¹⁶Ông tùi i kóng, Góa tio̍h kúi-pái kah lí chiù-chōa, lí thok Iâ-hô-hoa ê miâ, chí-ū tio̍h ēng chin-si̍t kā góa kóng?

¹⁷Bí-kai-ngá kóng, Góa khòaⁿ-kìⁿ Í-sek-lia̍t chèng peh-sìⁿ sì-sòaⁿ tī soaⁿ--nih, chhin-chhiūⁿ bô bo̍k-chiá ê iûⁿ chi̍t-poaⁿ; Iâ-hô-hoa án-ni kóng, Chiah-ê bô chú-lâng, in ta̍k-ê thang pêng-an tò-khì in ê ke.

¹⁸Í-sek-lia̍t ông kā Iok-sa-hoat kóng, Góa kiám bô kā lí kóng, Chit-lâng só͘ beh chhàm-gú góa--ê, bô kóng hó-ōe, chí-ū chai-ē nā-tiāⁿ.

¹⁹Bí-kai-ngá kóng, Só͘-í lí tio̍h thiaⁿ Iâ-hô-hoa ê ōe; góa khòaⁿ-kìⁿ Iâ-hô-hoa chē tī pó-chō, thiⁿ-téng ê bān-kun khiā tī I ê chó-iū.

²⁰Iâ-hô-hoa kóng, Chī-chūi beh ín-iú A-hap, hō͘ i chiūⁿ-khì Ki-lia̍t ê La̍h-boa̍t, sí tī-hia ah? Chit-ê kóng án-ni, hit-ê kóng àn-ni.

²¹Āu-lâi ū chi̍t ê sîn chhut-lâi, khiā tī Iâ-hô-hoa ê bīn-chêng, kóng, Góa beh ín-iú i.

²²Iâ-hô-hoa mn̄g i kóng, Lí beh ēng sím-mi̍h hoat-tō͘? I kóng, Góa beh chhut-khì, chòe pe̍h-chha̍t ê sîn tī i chèng sian-ti ê chhùi. Iâ-hô-hoa kóng, Lí beh ín-iú i, iā beh chiâⁿ i; chhut-khì, lâi chòe án-ni.

²³Taⁿ Iâ-hô-hoa ēng pe̍h-chha̍t ê sîn ji̍p tī lí chiah ê sian-ti ê chhùi; Iâ-hô-hoa lūn-kàu lí ū kóng chai-ē.

²⁴Ki-ná-ná ê kiáⁿ Se-tí-ka chìn-chêng, siàn Bí-kai-ngá ê chhùi-phóe, kóng, Iâ-hô-hoa ê sîn tùi toh-lo̍h chi̍t tiâu lō͘ lī-khui góa lâi kap lí kóng ah?

²⁵Bí-kai-ngá kóng, Khòaⁿ ah, lí ji̍p lāi-pâng ka-kī bih, hit-ji̍t chiū beh khòaⁿ-kìⁿ.

²⁶Í-sek-lia̍t ông kóng, Tio̍h tòa Bí-kai-ngá khì kau siâⁿ-siú A-bûn, kap ông ê kiáⁿ Iok-a-si, kóng,

²⁷Ông án-ni kóng, Ēng chit-lâng koaiⁿ tī kaⁿ--nih, ēng kan-khó͘ ê piáⁿ, kan-khó͘ ê chúi, hō͘ i chia̍h, thèng-hāu góa pêng-an tò-lâi.

²⁸Bí-kai-ngá kóng, Lí nā chin-chiàⁿ pêng-an tò-lâi, chiū-sī Iâ-hô-hoa bô thok góa kóng. Koh kóng, Chiah ê peh-sìⁿ ah, lín lóng tio̍h thiaⁿ.

²⁹Í-sek-lia̍t ông kap Iû-tāi ông Iok-sa-hoat chiūⁿ--khì Ki-lia̍t ê La̍h-boa̍t.

³⁰Í-sek-lia̍t ông kā Iok-sa-hoat kóng, Góa beh kái-chong chiūⁿ-tīn; lí thang chhēng ông-ho̍k. Í-sek-lia̍t ông chiū kái-chong chiūⁿ-tīn.

³¹A-lân ông ū hoan-hù i ê chiàn-chhia ê koaⁿ-tiúⁿ saⁿ-cha̍p-jī-ê, kóng, Bô-lūn tōa-sòe m̄-thang kap in kau-chiàn, chí-ū kap Í-sek-lia̍t ông kau-chiàn.

³²Chiàn-chhia ê koaⁿ-tiúⁿ khòaⁿ-kìⁿ Iok-sa-hoat, chiū kóng, Che pit-tiāⁿ sī Í-sek-lia̍t ông; chiū oa̍t-tńg beh kap i kau-chiàn. Iok-sa-hoat chiū háu-kiù.

³³Chiàn-chhia ê koaⁿ-tiúⁿ khòaⁿ-kìⁿ m̄-sī Í-sek-lia̍t ông, chiū oa̍t-tńg-khì bô tui i.

³⁴Ū chi̍t-lâng ngó͘-jiân khui-keng siā-ji̍p Í-sek-lia̍t ông chiàn-kah ê kap-chōa; ông kā kóaⁿ-chhia--ê kóng, Lí oa̍t-tńg chhiú, tòa góa chhut-tīn; in-ūi góa tio̍h tāng-siong.

³⁵Hit-ji̍t kau-chiàn ê sè-bīn ná béng-lia̍t; ū lâng hû ông tī chhia--nih, tí-tng A-lân lâng; kàu ji̍t àm ông chiū sí, huih tùi tio̍h-siong ê só͘-chāi lâu kàu chhia-tóe.

³⁶Ji̍t beh lo̍h ê sî, ū hō-lēng piàn-thoân tī kun-iâⁿ-tiong, kóng, Ta̍k-lâng tò-khì pún-siâⁿ, ta̍k-lâng tò-khì pún-tōe.

³⁷Ông sí, tòa i kàu Sat-má-lī-a; in bâi-chòng ông tī Sat-má-lī-a.

³⁸Ū lâng sóe i ê chhia tī Sat-má-li-a ê tî-piⁿ, káu lâi chī i ê huih, tú-chiàu Iâ-hô-hoa só͘ kóng ê ōe; chhiong-ki iā tī-hia sóe seng-khu.

³⁹A-hap kî-û ê sū, kìⁿ i só͘-kiâⁿ-ê, kap i só͘ khí chhiūⁿ-gê ê chhù, í-ki̍p só͘ khí lóng-chóng ê siâⁿ, kiám bô kì tī Í-sek-lia̍t chiah ê ông ê kì-lio̍k mah?

⁴⁰A-hap kap i ê lia̍t-chó͘ tâng khùn; i ê kiáⁿ A-hap-siā sòa-chiap i chòe ông.

⁴¹Í-sek-lia̍t ông A-hap tē-sì nî, A-sat ê kiáⁿ Iok-sa-hoat chē-ūi chòe Iû-tāi ông.

⁴²Iok-sa-hoat chē-ūi ê sî, saⁿ-cha̍p-gō͘ hè; tī Iâ-lō͘-sat-léng chòe ông jī-cha̍p-gō͘ nî; i ê lāu-bú miâ kiò A-só͘-pa, chiū-sī Sī-lī-hi ê cha-bó͘-kiáⁿ.

⁴³Iok-sa-hoat kiâⁿ i-ê lāu-pē A-sat hiah ê lō͘, bô oa̍t-tńg lī-khui i, kiâⁿ Iâ-hô-hoa khòaⁿ-chòe hó ê sū; chóng-sī soaⁿ-thâu-tôaⁿ iáu-bē hòe-bô, peh-sìⁿ iû-goân hiàn-chè sio-hiuⁿ tī soaⁿ-thâu-tôaⁿ.

⁴⁴Iok-sa-hoat kap Í-sek-lia̍t ông li̍p-iok hô-hó.

⁴⁵Iok-sa-hoat kî-û ê sū, kap i só͘ hián-chhut ê lêng-le̍k, kap i cháiⁿ-iūⁿ kau-chiàn, kiám bô lóng kì tī Iû-tāi lia̍t-ông ê kì-lio̍k mah?

⁴⁶I ê lāu-pē A-sat ê sî, só͘ lâu--lo̍h-lâi ê loân-tông, Iok-sa-hoat tùi kok-lāi tû-khì.

⁴⁷Hit-sî Í-tong bô ông, ū úi-oân koán-lí i.

⁴⁸Iok-sa-hoat chō Tha-si ê chûn-chiah, beh khì Gô-hui ūn kim lâi; chóng-sī bô khì, in-ūi chûn phah-phòa tī Í-sûn-ka-piat.

⁴⁹A-hap ê kiáⁿ A-hap-siā kā Iok-sa-hoat kóng, Iông-ún góa ê lô͘-po̍k kap lí ê lô͘-po̍k chē-chûn saⁿ-kap khì; chóng-sī Iok-sa-hoat m̄-khéng.

⁵⁰Iok-sa-hoat kap lia̍t-chó͘ tâng-khùn, kap i ê lia̍t-chó͘ chòng tī i ê chó͘ Tāi-pi̍t ê siâⁿ; i ê kiáⁿ Iâ-hô-lâm sòa-chiap i chòe ông.

⁵¹Iû-tāi ông Iok-sa-hoat cha̍p-chhit nî, A-hap ê kiáⁿ A-hap-siā tī Sat-má-lī-a chē-ūi, chòe Í-sek-lia̍t ông, chòe-ông tī Í-sek-lia̍t le̍k-kè nn̄g-nî.

⁵²I kiâⁿ Iâ-hô-hoa khòaⁿ-chòe pháiⁿ ê sū, kiâⁿ i ê pē ê lō͘, kap i ê lāu-bú ê lō͘, kap hō͘ Í-sek-lia̍t hoān-chōe ê Nî-pat ê kiáⁿ Iâ-lô-phò-àm ê lō͘.

⁵³I chiàu in lāu-pē it-chhè só͘-kiâⁿ-ê ho̍k-sāi Pa-le̍k lâi kèng-pài i, kek Iâ-hô-hoa Í-sek-lia̍t Siōng-tè ê siū-khì.