Read Pa-khek-lé Pe̍h-ōe-jī Sèng-keng, 1933 - Barclay Taiwanese Bible, 1933 - Full Romanization Í-su-la̍h 3 Bible Online

Í-su-la̍h 3 - Pa-khek-lé Pe̍h-ōe-jī Sèng-keng, 1933 - Barclay Taiwanese Bible, 1933 - Full Romanization bible

Í-su-la̍h 3

¹Kàu tē-chhit ge̍h, Í-sek-lia̍t lâng í-keng khiā-khí in hiah ê siâⁿ, hit-sî peh-sìⁿ chhin-chhiūⁿ chi̍t-lâng chū-chi̍p tī Iâ-lō͘-sat-léng.

²Iok-sat-tap ê kiáⁿ Iâ-su-a, kap i ê hiaⁿ-tī hiah ê chè-si, kap Sat-la̍h-thiat ê kiáⁿ Só͘-lô-pa-pek, kap i ê hiaⁿ-tī, lóng khí-lâi khí Í-sek-lia̍t Siōng-tè ê tôaⁿ, thang hiàn sio-chè tī hí(**hit) téng-bīn, chiàu Siōng-tè ê lô͘-po̍k Mô͘-se lu̍t-hoat ê chheh só͘ kì-chài ê.

³In khí-tôaⁿ tī pún-kū ê ūi, in-ūi kiaⁿ hiah ê kok ê peh-sìⁿ; koh tī hí(**hit) téng-bīn hiàn sio-chè hō͘ Iâ-hô-hoa, chiū-sī chá-khí ê-hng ê sio-chè.

⁴Iā siú tah-liâu-á choeh, chiàu só͘ kì-chài ê; koh hiàn ta̍k-ji̍t ê sio-chè, chiàu in ê siàu-gia̍h, chiàu tiāⁿ-tio̍h ê lē, chhin-chhiūⁿ ta̍k-ji̍t só͘ eng-kai-tio̍h ê.

⁵Jiân-āu hiàn chiàu-siông ê sio-chè, kap múi-ge̍h chhoe-it ê chè, í-ki̍p Iâ-hô-hoa hun-piat chòe-sèng ê choeh-kî ê chè; koh hiàn ta̍k-lâng kam-sim hoaⁿ-hí hiàn ê chè hō͘ Iâ-hô-hoa.

⁶Tùi chhit-ge̍h chhoe-it khí, in hiàn sio-chè hō͘ Iâ-hô-hoa. Chóng-sī Iâ-hô-hoa tiān ê tōe-ki, iáu-bē hē.

⁷In koh ēng gûn hō͘ chio̍h-chhiūⁿ, ba̍k-chhiūⁿ; ēng lim-chia̍h ê mi̍h, kap iû, hō͘ Se-tùn lâng, Chhui-lô lâng, hō͘ in chiong pek-hiuⁿ-chhiū tùi Lī-pa-lùn ūn kàu hái kàu Iok-phàⁿ; sī chiàu Pho-su ông Kó͘-lia̍t só͘ ún-chún--ê.

⁸In kàu Iâ-lō͘-sat-léng Siōng-tè ê tiān hia, tē-jī nî jī-ge̍h, Sat-la̍h-thiat ê kiáⁿ Só͘-lô-pa-pek, Iok-sat-tap ê kiáⁿ Iâ-su-a, kap kî-û ê hiaⁿ-tī, chiū-sī chè-si, kap Lī-bī lâng, kap it-chhè tùi siū-lia̍h ê tiong-kan tò-lâi Iâ-lō͘-sat-léng ê lâng, lóng khí-chhiú, phài Lī-bī lâng, tùi jī-cha̍p hè í-chiūⁿ, tok-kang khí Iâ-hô-hoa ê tiān.

⁹Tùi án-ni Iâ-su-a, kap i ê kiáⁿ kap hiaⁿ-tī, Kah-bia̍t kap i ê kiáⁿ, Iû-tāi ê kiáⁿ-sun, kap Hi-ná-ta̍t ê kiáⁿ, kap in ê kiáⁿ, in ê hiaⁿ-tī Lī-bī lâng, lóng khí-lâi, tok-lí hiah ê tī Siōng-tè ê tiān chòe-kang ê lâng.

¹⁰Khí-chhù sai-hū hē Iâ-hô-hoa tiān ê tōe-ki ê sî, chè-si chhēng lé-ho̍k kia̍h hō-thâu. A-sat ê kiáⁿ-sun Lī-bī lâng the̍h lâ-poa̍h, lóng khiā-teh beh o-ló Iâ-hô-hoa, chiàu Í-sek-lia̍t ông Tāi-pi̍t só͘ tiāⁿ-tio̍h ê lē.

¹¹In ū-ê chhiùⁿ ū-ê hô, o-ló kám-siā Iâ-hô-hoa, kóng, In-ūi I sī hó, I éng-oán si chû-ài hō͘ Í-sek-lia̍t. In o-ló Iâ-hô-hoa ê sî, chèng peh-sìⁿ tōa-siaⁿ hoah, in-ūi Iâ-hô-hoa tiān ê tōe-ki í-keng hē-teh.

¹²Chóng-sī ū chōe-chōe chè-si, Lī-bī lâng, cho̍k-tiong ê lāu-tōa, chiū-sī bat khòaⁿ-kìⁿ chêng ê tiān hiah ê lāu-lâng, taⁿ chhin-ba̍k khòaⁿ-kìⁿ hē chit keng tiān ê tōe-ki, chiū tōa-siaⁿ thî-khàu; iā chōe-chōe lâng ūi-tio̍h hoaⁿ-hí tōa-siaⁿ hoah.

¹³Tì-kàu peh-sìⁿ bōe-ōe hun-piat hoaⁿ-hí hoah ê siaⁿ kap peh-sìⁿ thî-khàu ê siaⁿ; in-ūi peh-sìⁿ tōa-siaⁿ hoah ê siaⁿ hō͘ hit ê siaⁿ thiaⁿ kàu chin-hn̄g.