Read Pa-khek-lé Pe̍h-ōe-jī Sèng-keng, 1933 - Barclay Taiwanese Bible, 1933 - Full Romanization Ní-hi-bí 12 Bible Online

Ní-hi-bí 12 - Pa-khek-lé Pe̍h-ōe-jī Sèng-keng, 1933 - Barclay Taiwanese Bible, 1933 - Full Romanization bible

Ní-hi-bí 12

¹Kap Sat-la̍h-thiat ê kiáⁿ Só͘-lô-pa-pek, kap Iâ-su-a, tâng chiūⁿ-lâi ê chè-si kap Lī-bī lâng kì tī ē-tóe; Se-lâi-ngá, Iâ-lī-bí, Í-su-la̍h;

²A-má-lī-ngá, Má-lo̍k, Hap-tu̍t;

³Sī-ka-nî, Lī-hông, Bí-lī-boa̍t;

⁴E̍k-to, Kūn-tùn, A-pí-ngá;

⁵Bí-ngá-bîn, Má-tí-ngá, Phek-ka;

⁶Sī-má-ngá, Iok-ngá-li̍p, Iâ-tāi-ngá;

⁷Sat-lō͘, A-bo̍k, Hi-le̍k-ka, Iâ-tāi-ngá. Chiah ê lâng tī Iâ-su-a ê sî chòe chè-si kap in hiaⁿ-tī ê thâu.

⁸Lī-bī lâng Iâ-su-a, Pin-lōe, Kah-bia̍t, Sī-lī-pí, Iû-tāi, Má-tha-nî; chit ê Má-tha-nî kap i ê hiaⁿ-tī koán-lí o-ló kám-siā ê sū.

⁹In ê hiaⁿ-tī Pat-pò͘-ka kap O͘-nî, chiàu in ê pan-lia̍t, kap in saⁿ-tùi.

¹⁰Iâ-su-a siⁿ Iok-ngá-kim, Iok-ngá-kim siⁿ Í-lī-a-si̍t, Í-lī-a-si̍t siⁿ Iâ-hô-iâ-tāi,

¹¹Iâ-hô-iâ-tāi siⁿ Iok-ná-tan, Iok-ná-tan siⁿ Ap-tō͘-a.

¹²Tī Iok-ngá-kim ê sî, chè-si chòe cho̍k-tiúⁿ ê, Se-lâi-ngá cho̍k ū Bí-la̍h-ngá; Iâ-lī-bí cho̍k, ū Hap-ná-nî-ngá;

¹³Í-su-la̍h cho̍k ū Bí-su-lân; A-má-lī-ngá cho̍k, ū Iok-hap-lân;

¹⁴Bí-lī-kó͘ cho̍k, ū Iok-ná-tan; Sī-pa-nî cho̍k, ū Iok-sek;

¹⁵Hap-lîm cho̍k, ū Ap-ná; Bí-la̍h-iok cho̍k, ū Hi-le̍k-khái;

¹⁶E̍k-to cho̍k, ū Sat-ka-lī-a; Kūn-tùn cho̍k, ū Bí-su-lân;

¹⁷A-pí-ngá cho̍k, ū Sè-ki-lī; Bí-ná-bîn cho̍k, Mô͘-a-tí cho̍k, ū Pí-le̍k-thài;

¹⁸Phek-ka-cho̍k, ū Sa-bó͘-a; Sī-má-ngá cho̍k, ū Iok-ná-tan;

¹⁹Iok-ngá-li̍p cho̍k, ū Má-te̍k-nái; Iâ-tāi-ngá cho̍k, ū O͘-se;

²⁰Sat-lâi cho̍k, ū Ka-lâi; A-bo̍k cho̍k, ū Hi-pek;

²¹Hi-le̍k-ka cho̍k, ū Hap-sa-pí-ngá; Iâ-tāi-ngá cho̍k, ū Ná-thán-gia̍p.

²²Lūn-kàu Lī-bī lâng, tng Í-lī-a-si̍t, Iâ-hô-iâ-tāi, Iok-hap-lân, Ap-tō͘-a ê sî, in ê cho̍k-tiúⁿ lóng ū kì-miâ, chè-si iā sī án-ni, ti̍t-kàu Pho-su ông Tāi-lī-o͘ ê sî.

²³Lī-bī lâng chòe cho̍k-tiúⁿ--ê, kì tī le̍k-tāi ê chheh, kàu Í-lī-a-si̍t ê kiáⁿ Iok-hap-lân ê sî.

²⁴Lī-bī lâng cho̍k-tiúⁿ Hap-se-pí-ngá, Sī-lī-pí, Kah-bia̍t ê kiáⁿ Iâ-su-a, kap in ê hiaⁿ-tī saⁿ-tùi, chi̍t-pan chi̍t-pan saⁿ-ǹg teh o-ló kám-siā, chiàu Siōng-tè ê lô͘-po̍k Tāi-pi̍t só͘ bēng-lēng-ê.

²⁵Má-tha-nî, Pat-pò͘-ka, Gô-pa-tí-a, Bí-su-lân, Ta̍t-bûn, A-kok, sī kò͘-mn̂g--ê, chiū-sī kò͘-siú siâⁿ-mn̂g ê khò͘-pâng.

²⁶Chiah-ê lóng sī tī Iok-sat-ta̍t ê sun Iâ-su-a ê kiáⁿ Iok-ngá-kim ê sî, kap chóng-tok Nî-hi-bí kap chè-si keng-ha̍k-sū Í-su-la̍h ê sî.

²⁷Tng Iâ-lō͘-sat-léng siâⁿ-chhiûⁿ hōng-hiàn ê sî, in khì Lī-bī lâng só͘ tiàm ê só͘-chāi chhē in, beh tòa in kàu Iâ-lō͘-sat-léng, beh ēng hoaⁿ-hí, kám-siā, chhiùⁿ-koa, khau-poa̍h, tôaⁿ-sek, tôaⁿ-khîm kiâⁿ hōng-hiàn ê lé.

²⁸Chhiùⁿ-koa--ê tùi Iâ-lō͘-sat-léng sì-ûi ê pîⁿ-iûⁿ, kap tùi Nî-tô-hoat ê hiuⁿ-siā lâi chū-chi̍p;

²⁹koh tùi Pek-kiat-kah, iā tùi Ka-pa kap Ap-má-hut ê chhân lâi; in-ūi chhiùⁿ-koa-ê, tī Iâ-lō͘-sat-léng sì-ûi ūi ka-kī kiàn-li̍p hiuⁿ-siā.

³⁰Chè-si Lī-bī lâng chheng-khì ka-kī iā chheng-khì peh-sìⁿ, í-ki̍p siâⁿ-mn̂g siâⁿ-chhiûⁿ.

³¹Góa chhōa Iû-tāi hiah ê siú-léng chiūⁿ siâⁿ-chhiûⁿ-téng, pun o-ló kám-siā--ê chòe nn̄g tōa-tūi; chi̍t-tūi tī siâⁿ-téng tùi chiàⁿ-pêng ǹg pùn-sò mn̂g khì;

³²tè tī in ê āu-bīn-ê ū Hô-sa-ngá, kap Iû-tāi siú-léng ê chi̍t-pòaⁿ;

³³koh ū A-sat-lī-ngá, Í-su-la̍h, Bí-su-lân,

³⁴Iû-tāi, Piān-ngá-bín, Sī-má-ngá, Iâ-lī-bí;

³⁵koh ū chè-si ê kiáⁿ kúi-nā lâng kia̍h hō-thâu ê, Iok-ná-tan ê kiáⁿ Sat-ka-lī-a, Iok-ná-tan sī Sī-má-ngá ê kiáⁿ, Sī-má-ngá sī Má-tha-nî ê kiáⁿ, Má-tha-nî sī Bí-kai-a ê kiáⁿ, Bí-kai-a sī Sat-khek ê kiáⁿ, Sat-khek sī A-sat ê kiáⁿ;

³⁶kap i ê hiaⁿ-tī Sī-má-ngá, A-sat-lī, Bí-la̍h-lâi, Ki-la̍h-lâi, Má-ai, Ná-thán-gia̍p, Iû-tāi, Hap-ká-nî, lóng the̍h Siōng-tè ê lô͘-po̍k Tāi-pi̍t ê ga̍k-khì; keng-ha̍k-sū Í-su-la̍h chòe in ê thâu-chêng.

³⁷In tī chúi-chôaⁿ mn̂g ê tùi-bīn, tùi Tāi-pi̍t siâⁿ ê kiā-á-chàn chiūⁿ-khì, chiū-sī chiūⁿ siâⁿ-chhiûⁿ ê só͘-chāi, sī Tāi-pi̍t ông-kiong ê téng-bīn, ǹg tang khì kàu chúi-mn̂g.

³⁸Tē-jī tūi o-ló kám-siā ê lâng beh kiâⁿ khì kap hí(**hit) chi̍t-tūi saⁿ tú-tio̍h, góa kap peh-sìⁿ ê chi̍t-pòaⁿ kun-tè in, tī siâⁿ-chhiûⁿ-téng keng-kè hé-lô͘ ê lâu, kàu khoan-khoah ê siâⁿ-chhiûⁿ,

³⁹koh kè Í-hoat-liân ê mn̂g, kū ê mn̂g, Hî ê mn̂g, Hap-lâm-gia̍p ê lâu, Hap-bí-a ê lâu, kàu Iûⁿ-mn̂g, chiū thêng-kha khiā tī hō͘-ōe ê mn̂g.

⁴⁰Tùi án-ni chit nn̄g-tūi o-ló kám-siā ê lâng, khiā tī Siōng-tè ê tiān, liân góa kap koaⁿ-tiúⁿ ê chi̍t-pòaⁿ iā tī-hia khiā;

⁴¹iáu-ū chè-si Í-lī-a-kim, Má-se-ngá, Bí-ná-bîn, Bí-kai-ngá, Í-lī-iok-nái, Sat-ka-lī-a, Hap-lâm-nî-a, lóng kia̍h hō-thâu;

⁴²koh ū Má-se-ngá, Sī-má-ngá, Í-lī-a-sat, O͘-se, Iok-hap-lân, Má-ki-ngá, Í-lân, kap Í-siā. Chhiùⁿ-koa-ê kap in ê thâu-lâng Í-su-la̍h-hi-ngá lóng tōa-siaⁿ chhiùⁿ.

⁴³Hit-ji̍t chèng-lâng hiàn tōa chè-sū koh hoaⁿ-hí; in-ūi Siōng-tè hō͘ in tōa hoaⁿ-hí khoài-lo̍k; hū-jîn-lâng kap gín-ná iā lóng hoaⁿ-hí, tì-kàu Iâ-lō͘-sat-léng hoaⁿ-hí ê siaⁿ thiaⁿ kàu hn̄g-hn̄g.

⁴⁴Tng hit-ji̍t phài lâng koán-lí khò͘-pâng, ūi-tio̍h hè-châi, kú-chè ê mi̍h, khí-thâu se̍k ê; kap só͘ chhú ê cha̍p-hūn-chi̍t, tùi ta̍k ê siâⁿ ê chhân-bó͘, chiàu lu̍t-hoat só͘ tiāⁿ-tio̍h siu lâi kiong-kip chè-si kap Lī-bī lâng ê hūn-gia̍h, lóng khǹg tī hí(**hit) lāi-bīn. Iû-tāi lâng in-ūi chè-si kap Lī-bī lâng tam-tng chit chiū hoaⁿ-hí.

⁴⁵In siú in ê Siōng-tè só͘ kau-tài--ê, iā siú só͘ kau-tài in chheng-khì ê lē; chhiùⁿ-koa--ê, kò͘-mn̂g--ê, iā án-ni chòe, chiàu Tāi-pi̍t kap i ê kiáⁿ Só͘-lô-bûn ê bēng-lēng.

⁴⁶In-ūi chá tī Tāi-pi̍t kap A-sat ê ji̍t ū ga̍k-kong koán-lí chhiùⁿ-koa--ê, í-ki̍p o-ló kám-siā Siōng-tè ê si-koa.

⁴⁷Tng Só͘-lô-pa-pek ê ji̍t, kap Nî-hi-bí ê ji̍t, Í-sek-lia̍t chèng-lâng chiong ta̍k-ji̍t eng-kai ê hūn-gia̍h, kiong-kip chhiùⁿ-koa--ê, kò͘-mn̂g--ê, iā hun-piat mi̍h chòe-sèng lâi kiong-kip Lī-bī lâng; Lī-bī lâng iā hun-piat mi̍h chòe-sèng lâi kiong-kip A-lûn ê kiáⁿ-sun.