Read Pa-khek-lé Pe̍h-ōe-jī Sèng-keng, 1933 - Barclay Taiwanese Bible, 1933 - Full Romanization Iok-pek-kì 5 Bible Online

Iok-pek-kì 5 - Pa-khek-lé Pe̍h-ōe-jī Sèng-keng, 1933 - Barclay Taiwanese Bible, 1933 - Full Romanization bible

Iok-pek-kì 5

¹Taⁿ chòe lí kiû-kiò, khòaⁿ ū chī-chūi ìn lí ah? Chiah ê sèng--ê ê tiong-kan, lí beh ǹg chī-chūi ah?

²In-ūi siū-khì ê sim, ōe hāi-sí gōng-lâng; Oàn-tò͘ ōe thâi-sí ham-bān ê lâng.

³Góa bat khòaⁿ-kìⁿ gōng-lâng tèng-kun, Chóng-sī hut-jiân-kan góa chiù-chó͘ i khiā-khí ê só͘-chāi.

⁴I ê kiáⁿ-jî lī-khui an-ún hn̄g-hn̄g; Tī siâⁿ-mn̂g siū ap-pek, iā bô ū chín-kiù in ê.

⁵Iau ê lâng chia̍h i só͘ siu-sêng ê, Tī chhì-phè-lāi iā chhiúⁿ--khì, Ū oa̍h-tauh khui-chhùi thun i ê châi-bu̍t.

⁶In-ūi chai-ē m̄-sī tùi thô͘--nih chhut-lâi, Hoān-lān iā m̄-sī tùi tōe--nih hoat-siⁿ;

⁷Chóng-sī lâng chhut-sì tiāⁿ-tio̍h ū hoān-lān, Chhin-chhiūⁿ hé-chhiⁿ pe-chiūⁿ koâiⁿ.

⁸Ōaⁿ-chòe góa, góa beh kiû-kiò Siōng-tè; Chiong góa ê sū kau-tài Siōng-tè.

⁹Chiū-sī kiâⁿ tāi-chì tōa kàu bōe chhek-to̍k-tit ê, Kiâⁿ kî-sū sǹg-bōe-liáu-ê.

¹⁰I lo̍h hō͘ tī tōe-bīn-chiūⁿ, Siúⁿ-sù chúi tī chhân-hn̂g--nih.

¹¹Beh an-tì pi-bî-ê tī koâiⁿ ê só͘-chāi; Beh kú-khí ai-chhám-ê tī an-ún ê tōe.

¹²I phò-hoāi káu-koài ê lâng ê kè-bô͘, Tì-kàu in ê chhiú só͘ chòe ê bōe sêng-kong.

¹³I hō͘ tì-hūi ê lâng tiòng ka-kī ê khúi-kè; Hō͘ khúi-khiat ê lâng ê kè-bô͘ kín-kín pāi.

¹⁴In ji̍t--sî tú-tio̍h o͘-àm, Ji̍t tiong-tàu sì-kòe bong, chhin-chhiūⁿ mî--sî.

¹⁵I kiù sòng-hiong lâng, thoat-lī in ê chhùi ê to-kiàm, Í-ki̍p kiông-pō ê lâng ê chhiú.

¹⁶Tùi án-ni, nńg-chiáⁿ-ê ū ǹg-bāng, Put-gī-ê, chhùi that-ba̍t.

¹⁷Khòaⁿ ah, Siōng-tè só͘ kéng-kài-ê, hit-lâng ū hok-khì; Só͘-í m̄-thang khòaⁿ-khin Choân-lêng--ê ê tok-chek.

¹⁸In-ūi I hō͘ lâng thàng-thiàⁿ, chiū kā i pau-ba̍t; I siong lâng, iā I ê chhiú i-hó i.

¹⁹I beh kiù lí, tī la̍k-pái ê hoān-lān; chiū nā chhit-pái, chai-hāi iā bô kha̍p-tio̍h lí.

²⁰Tī ki-hng ê sî, I beh kiù lí thoat-lī sí; Tī kau-chiàn ê sî, I beh kiù lí thoat-lī to-kiàm ê sè-le̍k.

²¹Lí beh tit-tio̍h khǹg-ba̍t, bián siū chhùi-chi̍h ê kong-kek; Chai-ē kàu ê sî, lí iā bián kiaⁿ.

²²Chai-hāi kap ki-hng, lí beh chhiò i, tōe-chiūⁿ ê iá-siù, lí iā bián kiaⁿ.

²³In-ūi lí beh kap chhân-hn̂g--nih ê chio̍h kiat-iok; Chhân-iá ê siù iā beh kap lí hô-hó.

²⁴Lí beh chai lí ê pò͘-pîⁿ pêng-an; Lí beh khì khòaⁿ lí ê iûⁿ-tiâu lóng bô khiàm-kheh.

²⁵Lí iā beh chai lí ê kiáⁿ-sun chōe-chōe, Lí ê hō͘-è chhin-chhiūⁿ tōe-chiūⁿ ê chhiⁿ-chháu.

²⁶Lí beh hè-siū móa-chiok chiah kui bōng, Chhin-chhiūⁿ tiū-khún kàu-sî siu-khǹg.

²⁷Khòaⁿ ah, che goán ū chhâ kàu thiat-tí, si̍t-chāi sī án-ni; Lí tio̍h thiaⁿ, chai sī chòe lí ê lī-ek.