Read Pa-khek-lé Pe̍h-ōe-jī Sèng-keng, 1933 - Barclay Taiwanese Bible, 1933 - Full Romanization Thoân-tō 12 Bible Online

Thoân-tō 12 - Pa-khek-lé Pe̍h-ōe-jī Sèng-keng, 1933 - Barclay Taiwanese Bible, 1933 - Full Romanization bible

Thoân-tō 12

¹Lí tio̍h tī siàu-liân ê ji̍t, kì-liām chhòng-chō lí ê Chú, chiū-sī hoān-lān ê ji̍t iáu-bē kàu, iā lí só͘ kóng, Góa bô thang tī i khoài-lo̍k, hiah ê nî iáu-bē kūn ê sî.

²tī ji̍t kap kng kap ge̍h kap chhiⁿ bē piàn-chòe o͘-àm, í-ki̍p hō͘ kè-sin, hûn bē koh lâi ê tāi-seng.

³Tng hit-ji̍t, kò͘-chhù--ê ngia̍uh-ngia̍uh-chhoah; ū la̍t ê lâng so͘-io, oe-bō--ê, in-ūi in chió, chiū soah; tùi thang-á khòaⁿ--chhut-khì--ê lóng o͘-àm;

⁴thàng ke-lō͘ ê mn̂g koaiⁿ--teh, oe-bō ê siaⁿ sòe-sòe; chiáu-á chi̍t-ē háu, lâng chiū khí-lâi; chhiùⁿ-koa ê cha-bó͘-gín-ná iā lóng kàng-kē;

⁵kìⁿ-tio̍h koâiⁿ chiū kiaⁿ, tī lō͘-tiong iā ū só͘ kiaⁿ-ùi; hēng-chhiū khui hoe, chháu-meh chòe tāng-tàⁿ, io̍k-sim lóng bô--khì; in-ūi lâng kui tī i éng-oán ê chhù, ai-khàu ê lâng óng-lâi tī ke-lō͘;

⁶tng gûn-liān-á bē tn̄g, kim-óaⁿ bē phòa, tī chúi-chôaⁿ-piⁿ ê chúi-pân bē sún-hoāi, ka-lak bē pháiⁿ tī chíⁿ-téng;

⁷tîn-ai kui thô͘ lâi hoán-pún, lêng-hûn kui tī hō͘ i lâi ê Siōng-tè ê tāi-seng, tio̍h kì-liām chhòng-chō lí ê Chú.

⁸Thoân-tō--ê kóng, Khang-hu ê khang-hu, hoân-sū lóng sī khang-hu.

⁹Koh in-ūi Thoân-tō--ê ū tì-hūi, i iû-goân kà-sī peh-sìⁿ chai-bat; iā chēng-chēng siūⁿ, chhâ-khó, koh chiàu chhù-sū pâi-lia̍t chōe-chōe chim-giân.

¹⁰Thoân-tō--ê choan-sim chhē thang hoaⁿ-hí ê ōe, sī chiàu chèng-ti̍t siá ê sêng-si̍t ōe.

¹¹Tì-hūi ê lâng ê ōe chhin-chhiūⁿ chhì; hōe-tiúⁿ ê ōe chhin-chhiūⁿ tèng-tiâu ê teng, lóng sī tùi chi̍t ê bo̍k-chiá só͘ sù ê.

¹²Góa ê kiáⁿ ah, iáu ū chi̍t-chân, lí tio̍h siū khoàn-kài; tù chheh chōe, bô kiông-chīn; tha̍k-chheh chōe, seng-khu ōe ià-siān.

¹³Chiah ê sū lóng í-keng thiaⁿ-liáu lah; kiat-bé chiū-sī kèng-ùi Siōng-tè, kín-sīn siú I ê kài-bēng; che chiū-sī lâng chiâu-pī ê pún-hūn.

¹⁴In-ūi kìⁿ só͘-chòe-ê kap it-chhè ún-ba̍t ê sū, bô-lūn sī hó sī pháiⁿ, Siōng-tè lóng beh sím-phòaⁿ.