Read Pa-khek-lé Pe̍h-ōe-jī Sèng-keng, 1933 - Barclay Taiwanese Bible, 1933 - Full Romanization Li-bī-kì 21 Bible Online

Li-bī-kì 21 - Pa-khek-lé Pe̍h-ōe-jī Sèng-keng, 1933 - Barclay Taiwanese Bible, 1933 - Full Romanization bible

Li-bī-kì 21

¹Iâ-hô-hoa tùi Mô͘-se kóng, Lí tio̍h hoan-hù A-lûn ê kiáⁿ-sun chòe chè-si-ê kóng, Cho̍k-tiong ū lâng sí, m̄-thang ūi-tio̍h i lâi phah lah-sap ka-kī.

²To̍k-to̍k ūi-tio̍h i kut-jio̍k ê chhin, chiū-sī ūi-tio̍h i ê lāu-bú, ūi-tio̍h i ê lāu-pē, ūi-tio̍h i ê kiáⁿ, ūi-tio̍h i ê cha-bó͘-kiáⁿ, ūi-tio̍h i ê hiaⁿ-tī,

³í-ki̍p kap i chì-chhin chòe chāi-sek-lú ê chí-bē, ūi-tio̍h i thang phah lah-sap ka-kī.

⁴I í-keng tī peh-sìⁿ-tiong chòe-thâu, chiū m̄-thang chiông-sio̍k lâi phah lah-sap ka-kī.

⁵Thâu-khak m̄-thang thì-kng-kng; chhùi-chhiu ê chiu-ûi m̄-thang khun; iā m̄-thang ka-kī koah-bah.

⁶Tio̍h kui in ê Siōng-tè lâi chiâⁿ-sèng, m̄-thang siat-to̍k in ê Siōng-tè ê miâ; in-ūi Iâ-hô-hoa ê hé-chè sī in ê Siōng-tè ê chia̍h-mi̍h, sī in só͘ hiàn-ê, só͘-í in tio̍h chiâⁿ chòe sèng.

⁷In m̄-thang chhōa kī-lú chòe-bó͘, á-sī siū phah lah-sap ê hū-jîn-lâng chòe-bó͘; iā m̄-thang chhōa hō͘ tiōng-hu lî-chhut ê hū-jîn-lâng chòe-bó͘; in-ūi in sī kui in ê Siōng-tè chòe-sèng.

⁸Só͘-í lí tio̍h hun-piat i chòe-sèng; in-ūi i hiàn lí ê Siōng-tè ê chia̍h-mi̍h, lí tio̍h khòaⁿ i chòe-sèng; in-ūi Góa, hō͘ lín chiâⁿ-sèng ê Iâ-hô-hoa, chiū-sī sèng-ê.

⁹Chè-si ê cha-bó͘-kiáⁿ nā kiâⁿ-îm, lêng-jio̍k ka-kī, chiū-sī lêng-jio̍k i ê lāu-pē, tio̍h ēng hé sio i.

¹⁰Tī hiaⁿ-tī-tiong chòe chè-si-thâu, ēng boah ê iû thîn tī i ê thâu-khak, koh siat-li̍p tam-tng sèng-chit, chhēng sèng saⁿ ê, m̄-thang phah-sòaⁿ thâu-mn̂g, iā m̄-thang thiah-li̍h saⁿ.

¹¹M̄-thang óa-kūn sí-si; iā m̄-thang ūi-tio̍h i ê lāu-pē, á-sī i ê lāu-bú, phah lah-sap ka-kī.

¹²M̄-thang chhut sèng-só͘, iā m̄-thang siat-to̍k i ê Siōng-tè ê sèng-só͘, in-ūi i ê Siōng-tè boah-iû ê bián-liû tī i ê thâu-khak; Góa sī Iâ-hô-hoa.

¹³I tio̍h chhōa chāi-sek-lú chòe-bó͘.

¹⁴Kóaⁿ-hū, á-sī siū-lî ê hū-jîn-lâng, á-sī siū phah lah-sap-ê, á-sī chhiong-ki chiah-ê, lóng m̄-thang chhōa; to̍k-to̍k thang chhōa pún-cho̍k ê chāi-sek-lú chòe-bó͘.

¹⁵Tī i ê peh-sìⁿ-tiong m̄-thang lêng-jio̍k i ê hō͘-è; in-ūi Góa sī hō͘ i chiâⁿ-sèng ê Iâ-hô-hoa.

¹⁶Iâ-hô-hoa hoan-hù Mô͘-se kóng,

¹⁷Lí tio̍h kā A-lûn kóng, Lí ta̍k sè-tāi ê hō͘-è kìⁿ ū phòa-siùⁿ ê, lóng m̄-thang kūn-chêng lâi hiàn i ê Siōng-tè ê chia̍h-mi̍h.

¹⁸In-ūi kìⁿ-ū phòa-siùⁿ ê lâng, bô-lūn sī chhiⁿ-mî-ê, pái-kha-ê, nah-phīⁿ-ê, chi-thé ū ke-ê,

¹⁹chi̍h-kha chi̍h-chhiú ê, ún-ku-ê, óe-sòe-ê,

²⁰ba̍k-chiu ū mâu-pēng-ê, siⁿ-sián-ê, siⁿ-chhng-ê, á-sī sún-hoāi gōa-sin ê, lóng m̄-thang kūn-chêng-lâi.

²¹Chè-si A-lûn ê hō͘-è, hoān ū phòa-siùⁿ-ê, lóng m̄-thang kūn-chêng lâi hiàn Iâ-hô-hoa ê hé-chè; i ū phòa-siùⁿ, m̄-thang kūn-chêng lâi hiàn i ê Siōng-tè ê chia̍h-mi̍h.

²²Siōng-tè ê chia̍h-mi̍h, bô-lūn sī chì-sèng-ê, sī sèng-ê, i lóng thang chia̍h.

²³Chóng-sī m̄-thang lâi kàu tiùⁿ-lî, iā m̄-thang kūn tôaⁿ-chêng, in-ūi i ū phòa-siùⁿ, bián-tit siat-to̍k Góa hiah ê sèng-só͘; in-ūi Góa sī hō͘ in chiâⁿ-sèng ê Iâ-hô-hoa.

²⁴Tùi án-ni Mô͘-se hoan-hù A-lûn kap i hiah ê kiáⁿ kap Í-sek-lia̍t chèng-lâng kóng.