Read Pa-khek-lé Pe̍h-ōe-jī Sèng-keng, 1933 - Barclay Taiwanese Bible, 1933 - Full Romanization Li-bī-kì 22 Bible Online

Li-bī-kì 22 - Pa-khek-lé Pe̍h-ōe-jī Sèng-keng, 1933 - Barclay Taiwanese Bible, 1933 - Full Romanization bible

Li-bī-kì 22

¹Iâ-hô-hoa hoan-hù Mô͘-se kóng,

²Lí tio̍h kā A-lûn kap i hiah ê kiáⁿ kóng, Tio̍h lī-khui Í-sek-lia̍t lâng só͘ hun-piat chòe-sèng kui hō͘ Góa ê sèng-mi̍h, bián-tit siat-to̍k Góa ê sèng-miâ; Góa sī Iâ-hô-hoa.

³Tio̍h kā in kóng, Lín tāi-tāi ê hō͘-è, kìⁿ-nā seng-khu ū ù-òe, lâi chhin-kūn Í-sek-lia̍t lâng só͘ hun-piat chòe-sèng, kui hō͘ Iâ-hô-hoa chòe sèng-mi̍h ê, hit-lâng tio̍h tī Góa ê bīn-chêng chián-tû; Góa sī Iâ-hô-hoa.

⁴A-lûn ê hō͘-è, kìⁿ-nā ū thái-ko-ê, á-sī hā-siau-ê, m̄-thang chia̍h sèng-mi̍h, tio̍h thèng-hāu i chheng-khì; bô-lūn sím-mi̍h lâng bong-tio̍h hit ê tùi sí-si bak-tio̍h lah-sap ê mi̍h, á-sī tūi-cheng ê lâng;

⁵á-sī bong-tio̍h sím-mi̍h bô chheng-khì ōe pê ê mi̍h, á-sī bong-tio̍h hiah ê hō͘ i bô chheng-khì ê lâng, put-koán hit-lâng ū sím-mi̍h bô chheng-khì;

⁶bong-tio̍h hiah-ê ê lâng, tek-khak bô chheng-khì kàu ê-hng; nā bô ēng chúi sóe seng-khu, chiū m̄-thang chia̍h sèng ê mi̍h.

⁷Ji̍t-lo̍h ê sî, i chiū chheng-khì; jiân-āu thang chia̍h sèng-mi̍h; in-ūi che sī i ê chia̍h-mi̍h.

⁸Ka-kī sí-ê, á-sī hō͘ iá-siù thiah-li̍h-ê, i m̄-thang chia̍h, in-ūi chit-ê phah lah-sap ka-kī; Góa sī Iâ-hô-hoa.

⁹Só͘-í in tio̍h siú Góa só͘ kau-tài ê, bián-tit in siat-to̍k i, tùi án-ni tam-tng chōe lâi sí; Góa sī hō͘ in chiâⁿ-sèng ê Iâ-hô-hoa.

¹⁰It-chhè ê gōa-lâng m̄-thang chia̍h sèng-mi̍h; hioh tī chè-si ê ke-ê, á-sī chòe-kang lâng, lóng m̄-thang chia̍h sèng-mi̍h.

¹¹Siat-sú chè-si bóe lâng, sī i ēng gûn bóe ê, hit-lâng thang chia̍h i; chhut-sì tī i ê ke-ê iā thang chia̍h i ê bí-niû.

¹²Chè-si ê cha-bó͘-kiáⁿ nā kè-chhut gōa-lâng, chiū m̄-thang chia̍h só͘ kú-khí-lâi ê sèng-mi̍h.

¹³Chóng-sī chè-si ê cha-bó͘-kiáⁿ nā sī kóaⁿ-hū, á-sī siū lî-chhut-ê, bô kiáⁿ-jî, koh tò-lâi lāu-pē ê ke, kap i siàu-liân ê sî chi̍t-iūⁿ, chiū thang chia̍h i ê lāu-pē ê chia̍h-mi̍h; to̍k-to̍k gōa-lâng m̄-thang chia̍h.

¹⁴Nā ū lâng bô tiuⁿ-tî chia̍h sèng-mi̍h, tio̍h chiàu hiah ê sèng-mi̍h ke gō͘-hūn-chi̍t, kau-hō͘ chè-si.

¹⁵M̄-thang siat-to̍k Í-sek-lia̍t lâng só͘ hiàn hō͘ Iâ-hô-hoa ê sèng-mi̍h;

¹⁶bián-tit in tī chia̍h sèng-mi̍h ê sî, tam-tng kè-sit ê chōe-kòa; in-ūi Góa sī hō͘ in chiâⁿ-sèng ê Iâ-hô-hoa.

¹⁷Iâ-hô-hoa hoan-hù Mô͘-se kóng,

¹⁸Lí tio̍h hoan-hù A-lûn kap i hiah ê kiáⁿ, kap Í-sek-lia̍t ê chèng-lâng, tùi in kóng, Í-sek-lia̍t-ke ê lâng, á-sī tī Í-sek-lia̍t-tiong kià-kha-ê kìⁿ-nā hiàn lé-mi̍h, bô-lūn sī só͘ hē ê goān, á-sī kam-sim hiàn-ê, chiū-sī hiàn hō͘ Iâ-hô-hoa chòe sio-chè-ê;

¹⁹chiū tio̍h hiàn gû, á-sī mî-iûⁿ, á-sī soaⁿ-iûⁿ, lóng tio̍h ēng kang-ê, bô hâ-chhû-ê, chiah ōe tit-tio̍h hoaⁿ-hí chiap-la̍p.

²⁰Kìⁿ-nā ū hâ-chhû-ê, lín m̄-thang hiàn; in-ūi che bô beh kā lín chiap-la̍p.

²¹Kìⁿ-nā tùi gû-kûn, á-sī iûⁿ-kûn tiong, chiong siā-un-chè hiàn hō͘ Iâ-hô-hoa, ūi-tio̍h beh siā te̍k-pia̍t hē ê goān, á-sī chòe kam-sim hiàn-ê, só͘ hiàn-tio̍h-ê tio̍h sûn-choân, bô hâ-chhû, chiah ōe tit-tio̍h chiap-la̍p.

²²Chhiⁿ-mî ê, tio̍h-siong-ê, phòa-siùⁿ-ê, siⁿ-liû-ê, siⁿ-chhng-ê, siⁿ-sián-ê, chiah-ê lóng m̄-thang hiàn hō͘ Iâ-hô-hoa; iā m̄-thang tī tôaⁿ-téng hiàn hō͘ Iâ-hô-hoa chòe hé-chè.

²³Bô-lūn sī gû-káng á-sī iûⁿ-á, nā sī chi-thé ū ke á-sī ū kiám ê, hit-hō thang chòe kam-sim chè lâi hiàn; chóng-sī ēng i lâi siā-goān chiū bōe tit-tio̍h chiap-la̍p.

²⁴Gōa-sin sún-siong-ê, á-sī teh-chhùi-ê, á-sī phòa-li̍h-ê, á-sī iam-ê, m̄-thang hiàn-hō͘ Iâ-hô-hoa; tī lín ê thó͘-tōe iā m̄-thang án-ni kiâⁿ.

²⁵Chit hō ê mi̍h lín iā m̄-thang tùi gōa-kok lâng ê chhiú chiap-siū hiàn-chòe lín Siōng-tè ê chia̍h-mi̍h; in-ūi chit hō mi̍h lóng ū húi-hoāi, ū hâ-chhû ê, bōe thang kā lín chiap-la̍p

²⁶Iâ-hô-hoa hoan-hù Mô͘-se kóng,

²⁷Gû, á-sī mî-iûⁿ, á-sī soaⁿ-iûⁿ í-keng siⁿ, chhit-ji̍t tè i ê bú, tùi tē-poeh ji̍t í-āu, thang chòe Iâ-hô-hoa hé-chè ê lé-mi̍h, tit-tio̍h chiap-la̍p.

²⁸Bô-lūn gû-bú á-sī iûⁿ-bú, lí m̄-thang siâng-ji̍t thâi bú kap kiáⁿ.

²⁹Lín hiàn siā-un-chè hō͘ Iâ-hô-hoa, tio̍h hiàn thang tit-tio̍h chiap-la̍p ê.

³⁰Tio̍h chiū hit-ji̍t chia̍h i, m̄-thang lâu chi̍t-tiám-á kàu keh chá-khí; Góa sī Iâ-hô-hoa.

³¹Só͘-í lín tio̍h siú Góa chiah ê kài-bēng lâi kiâⁿ i; Góa sī Iâ-hô-hoa.

³²Lín m̄-thang siat-to̍k Góa ê sèng-miâ; in-ūi Góa tī Í-sek-lia̍t lâng ê tiong-kan, beh siū chun lâi chòe-sèng; Góa sī hō͘ lín chiâⁿ-sèng ê Iâ-hô-hoa,

³³chhōa lín chhut Ai-ki̍p tōe, chòe lín ê Siōng-tè ê; Góa sī Iâ-hô-hoa.