Read Pa-khek-lé Pe̍h-ōe-jī Sèng-keng, 1933 - Barclay Taiwanese Bible, 1933 - Full Romanization I-se-kiat 39 Bible Online

I-se-kiat 39 - Pa-khek-lé Pe̍h-ōe-jī Sèng-keng, 1933 - Barclay Taiwanese Bible, 1933 - Full Romanization bible

I-se-kiat 39

¹Jîn-chú ah, lí tio̍h ǹg Ko-kek lâi soan-thoân kong-kek i kóng, Chú Iâ-hô-hoa án-ni kóng, Lô-si, Bí-siat, Thó͘-pa ê jîn-kun, Ko-kek ah, Góa kap lí chòe tùi-te̍k;

²Góa beh hō͘ lí oa̍t-tńg, beh chhōa lí chìn-chêng, hō͘ lí tùi pak-hng ê ke̍k-thâu lâi, tòa lí kàu Í-sek-lia̍t ê soaⁿ;

³Góa beh tùi lí ê tò-chhiú phah ka-la̍uh lí ê keng, tùi lí ê chiàⁿ-chhiú phah-lak lí ê chìⁿ.

⁴Lí kap lí ê kun-tūi í-ki̍p kap lí lâi ê lia̍t-kok lâng beh tó tī Í-sek-lia̍t ê soaⁿ; Góa beh chiong lí hō͘ ta̍k-iūⁿ ê eng-chiáu kap chhân-iá ê iá-siù chòe chia̍h-mi̍h.

⁵Lí beh tó tī chhân-iá; in-ūi Góa bat kóng--i; che sī Chú Iâ-hô-hoa kóng--ê.

⁶Góa iā beh kàng-lo̍h hé tī Má-kok kap hái-sū an-jiân khiā-khí ê lâng ê sin-chiūⁿ; in chiū chai Góa chiū-sī Iâ-hô-hoa.

⁷Góa beh tī Góa ê peh-sìⁿ Í-sek-lia̍t tiong hián-chhut Góa ê sèng-miâ, iā bô iông-ún Góa ê sèng-miâ koh siū siat-to̍k; lia̍t-kok lâng chiū chai Góa chiū-sī Iâ-hô-hoa, Í-sek-lia̍t tiong ê Sèng--ê.

⁸Chú Iâ-hô-hoa kóng, Khòaⁿ ah, tāi-chì lâi--lah iā beh chiâⁿ i; che sī Góa só͘ kóng ê ji̍t.

⁹Khiā-khí Í-sek-lia̍t siâⁿ ê lâng beh chhut--khì, khí-hé sio i ê ke-si, chiū-sī tōa-sòe ê tîn-pâi, keng-chìⁿ, thûi-á kap chhiuⁿ, lóng beh ēng in lâi hiâⁿ-hé le̍k-kè chhit-nî kú;

¹⁰sīm-chì in bô beh tùi chhân-iá khioh-chhâ, iā bô beh tùi chhiū-nâ chhò-chhiū; in-ūi in beh ēng ke-si hiâⁿ-hé; koh beh chhiúⁿ hiah ê chhiúⁿ in ê lâng, kiap hiah ê kiap in ê lâng; che chiū-sī Chú Iâ-hô-hoa kóng--ê.

¹¹Tng hit-ji̍t góa beh chiong Í-sek-lia̍t tōe, hái ê tang--sì, lâng só͘ keng-kè ê soaⁿ-kok, siúⁿ-sù Ko-kek chòe thióng-tōe chó͘-tòng keng-kè ê lâng ê lō͘; tī-hia lâng beh bâi-chòng Ko-kek kap i ê chèng-lâng; beh chheng hit só͘-chāi chòe Hap-bûn-ko-kek ê soaⁿ-kok.

¹²Í-sek-lia̍t-ke beh bâi-chòng in le̍k-kè chhit-ge̍h ji̍t ê kú, hō͘ hit ê tōe chheng-khì.

¹³Thong-kok ê peh-sìⁿ beh bâi-chòng in; tng Góa tit-tio̍h êng-kng ê ji̍t, chit ê sū beh hō͘ in tit-tio̍h miâ-siaⁿ; che sī Chú Iâ-hô-hoa kóng--ê.

¹⁴In beh phài lâng siông-siông sûn-cha piàn-tōe; kap keng-kè ê lâng saⁿ-kap chòng hiah ê chhun tī tōe--nih ê sin-si, thang chheng-khì hit ê tōe-hng; kàu chhit-ge̍h ji̍t móa, in beh koh sì-kòe chhē.

¹⁵Sûn-cha piàn tōe ê lâng beh keng-kè; nā ū lâng khòaⁿ-kìⁿ lâng ê kut-hâi, chiū tī-hia li̍p chi̍t ê kì-hō, thèng-hāu bâi-chòng ê lâng bâi-chòng i tī Hap-bûn-ko-kek ê soaⁿ-kok.

¹⁶Iā beh ū chi̍t ê siâⁿ, miâ kiò Hap-bûn-ná. In beh án-ni chheng-khì hit ê tōe.

¹⁷Jîn-chú ah, Chú Iâ-hô-hoa án-ni kóng, Lí tio̍h tùi ta̍k-iūⁿ ê pe-chiáu í-ki̍p chhân-iá ê iá-siù kóng, Lín tio̍h chū-chi̍p chòe-tīn lâi; tio̍h tùi sì-hng chū-chi̍p kàu Góa ūi-tio̍h lín só͘ hiàn ê chè, chiū-sī Í-sek-lia̍t soaⁿ ê tōa-chè, hō͘ lín thang chia̍h-bah lim-huih.

¹⁸Lín beh chia̍h ióng-sū ê bah, lim tōe-chiūⁿ siú-léng ê huih, kang ê mî-iûⁿ, iûⁿ-á, kang ê soaⁿ-iûⁿ, kang ê gû, lóng sī Pa-san pûi ê cheng-siⁿ.

¹⁹Lín chia̍h Góa ūi-tio̍h lín só͘ hiàn ê chè, beh chia̍h iû kàu pá, lim-huih kàu chùi.

²⁰Lín beh tī Góa ê toh chia̍h bé-phit kap chē-chhia-ê, kap ióng-sū kap it-chhè ê chiàn-sū kàu pá-pá; che sī Chú Iâ-hô-hoa kóng--ê.

²¹Góa beh hián-bêng Góa ê êng-kng tī lia̍t-kok-tiong, lia̍t-kok iā beh khòaⁿ-kìⁿ Góa só͘ kiâⁿ ê sím-phòaⁿ, kap Góa só͘ hē tī in sin-chiūⁿ ê chhiú.

²²Án-ni tùi hit-ji̍t í-āu Í-sek-lia̍t-ke beh chai Góa sī Iâ-hô-hoa in ê Siōng-tè.

²³Lia̍t-kok iā beh chai Í-sek-lia̍t-ke siū-lia̍h sī in-ūi in ê chōe-kòa; in tek-chōe Góa, Góa tùi in ng Góa ê bīn; chiong in kau tī in ê tùi-te̍k ê chhiú; in chiū lóng tó tī to-ē.

²⁴Góa chiàu in ê ù-òe chiàu in ê kè-sit khoán-thāi in; tùi in ng Góa ê bīn.

²⁵Só͘-í Chú Iâ-hô-hoa án-ni kóng, Góa beh hō͘ Ngá-kok siū-lia̍h ê lâng tò--lâi; iā beh lîn-bín Í-sek-lia̍t choân-ke;

²⁶iā beh ūi-tio̍h Góa ê sèng-miâ jia̍t-sim.

²⁷In tī pún só͘-chāi an-jiân khiā-khí, bô lâng hō͘ in kiaⁿ, tī Góa chiong in tùi lia̍t-kok-tiong chhōa tò--lâi, tùi tùi-te̍k ê tōe chū-chi̍p lâi, Góa tī lia̍t-kok ê bīn-chêng, tī in sin-chiūⁿ hián-bêng chòe-sèng ê sî, in beh tam-tng in ê kiàn-siàu kap in kan-hoān Góa it-chhè ê chōe.

²⁸Góa hō͘ in siū-lia̍h tī lia̍t-pang, koh chū-chi̍p in tò--lâi pún só͘-chāi, bô lâu chi̍t-lâng tī-hia, in chiū chai Góa sī in ê Siōng-tè Iâ-hô-hoa.

²⁹Góa iā bô koh tùi in ng Góa ê bīn; in-ūi Góa í-keng chiong Góa ê sîn kàng-lo̍h tī Í-sek-lia̍t-ke; che sī Chú Iâ-hô-hoa kóng--ê.