Read Pa-khek-lé Pe̍h-ōe-jī Sèng-keng, 1933 - Barclay Taiwanese Bible, 1933 - Full Romanization Bin-sò͘ Kì 17 Bible Online

Bin-sò͘ Kì 17 - Pa-khek-lé Pe̍h-ōe-jī Sèng-keng, 1933 - Barclay Taiwanese Bible, 1933 - Full Romanization bible

Bin-sò͘ Kì 17

¹Iâ-hô-hoa hoan-hù Mô͘-se kóng,

²Lí kā Í-sek-lia̍t lâng kóng, tùi in kia̍h koáiⁿ-á, ta̍k chi-phài chi̍t-ki, chiū-sī tùi hiah ê chi-phài ê siú-léng, kiōng kia̍h cha̍p-jī ki; lí siá ta̍k-lâng ê miâ tī i ê koáiⁿ-á.

³Tī Lī-bī hit-ki koáiⁿ-á tio̍h siá A-lûn ê miâ; in-ūi ta̍k chi-phài ê thâu-lâng lóng ū chi̍t ki koáiⁿ-á.

⁴Lí tio̍h chiong hiah-ê hē tī hōe-bō͘-lāi hoat-kūi ê thâu-chêng, chiū-sī Góa kap lín siong-hōe ê só͘-chāi.

⁵Góa só͘ kéng hit-lâng, i ê koáiⁿ-á beh puh-gê; án-ni Góa beh hō͘ Í-sek-lia̍t lâng ai-oàn ê ōe, chiū-sī in só͘ ai-oàn lín ê ōe, lóng soah, bô koh hō͘ Góa thiaⁿ-kìⁿ.

⁶Mô͘-se chiū kā Í-sek-lia̍t lâng kóng; in ê siú-léng chiū ēng koáiⁿ-á kau hō͘ i, chiàu in ê chi-phài chi̍t ê siú-léng chi̍t-ki, kiōng cha̍p-jī ki koáiⁿ-á; A-lûn ê koáiⁿ-á iā tī hiah ê koáiⁿ-á ê tiong-kan.

⁷Mô͘-se chiū chiong hiah ê koáiⁿ-á hē tī hoat-kūi ê pò͘-pîⁿ-lāi, tī Iâ-hô-hoa ê bīn-chêng.

⁸Bîn-á-ji̍t Mô͘-se ji̍p-khì hoat-kūi ê pò͘-pîⁿ; khòaⁿ ah, sio̍k Lī-bī ê ke, A-lûn ê koáiⁿ-á, í-keng puh-gê, siⁿ hoe-m̂, khui-hoe, kiat-chiâⁿ hēng-jîn.

⁹Mô͘-se tùi Iâ-hô-hoa ê bīn-chêng kia̍h hiah ê koáiⁿ-á chhut-lâi, kàu Í-sek-lia̍t ê chèng-lâng hia; in khòaⁿ-kìⁿ ta̍k-lâng kia̍h in ê koáiⁿ-á.

¹⁰Iâ-hô-hoa tùi Mô͘-se kóng, Ēng A-lûn ê koáiⁿ-á iû-goân hē tī hoat-kūi chêng, lâu-teh, chòe chiah ê pōe-ge̍k ê lâng ê kàm-kài; án-ni lí chiū hō͘ in tùi Góa ai-oàn ê ōe soah, bián-tit in sí-bô.

¹¹Mô͘-se án-ni kiâⁿ, sī chiàu Iâ-hô-hoa só͘ bēng-lēng-ê lâi kiâⁿ.

¹²Í-sek-lia̍t lâng tùi Mô͘-se kóng, Khòaⁿ ah, goán sí lah, goán bia̍t-bô lah, lóng bia̍t-bô lah.

¹³Kìⁿ-nā óa-kūn, chiū-sī óa-kūn Iâ-hô-hoa ê hōe-bō͘ ê, lóng sí; goán beh lóng-chóng sí mah?