Read Pa-khek-lé Pe̍h-ōe-jī Sèng-keng, 1933 - Barclay Taiwanese Bible, 1933 - Full Romanization Hap-kai 2 Bible Online

Hap-kai 2 - Pa-khek-lé Pe̍h-ōe-jī Sèng-keng, 1933 - Barclay Taiwanese Bible, 1933 - Full Romanization bible

Hap-kai 2

¹Che sī tī Tāi-lī-o͘ ông jī-nî, la̍k-ge̍h jī-cha̍p-sì ji̍t.

²Chhit-ge̍h jī-cha̍p-it ji̍t, Iâ-hô-hoa ê ōe thok sian-ti Hap-kai kóng,

³Lí tio̍h kā Iû-tāi ê chóng-tok Sat-la̍h-thiat ê kiáⁿ, Só͘-lô-pa-pek, kap Iok-sat-tap ê kiáⁿ, chè-si-thâu Iok-su-a, í-ki̍p só͘ chhun ê peh-sìⁿ kóng,

⁴Lín tiong-kan iáu tī-teh ê lâng, ū chī-chūi bat khòaⁿ-kìⁿ chit keng tiān chiông-chêng ê êng-kng mah? Hiān-chāi lín khòaⁿ-liáu cháiⁿ-iūⁿ ah? kiám-m̄-sī tī lín ê ba̍k-chiu khòaⁿ chhin-chhiūⁿ bô mah?

⁵Iâ-hô-hoa kóng, Só͘-lô-pa-pek ah, lí tio̍h ióng-kám; Iok-sat-tap ê kiáⁿ, chè-si-thâu Iok-su-a ah, lí ia̍h tio̍h ióng-kám; Iâ-hô-hoa koh kóng, Chit só͘-chāi ê peh-sìⁿ ah, lín ia̍h tio̍h ióng-kám, ia̍h tio̍h chòe-kang, in-ūi Góa kap lín tī-teh; che sī bān-kun ê Iâ-hô-hoa kóng--ê.

⁶Tng lín chhut Ai-ki̍p ê sî, Góa kap lín li̍p iok ê ōe, Góa ê Sîn tiàm-tī lín tiong-kan; lín bo̍h-tit kiaⁿ.

⁷In-ūi bān-kun ê Iâ-hô-hoa án-ni kóng, Koh bô jōa-kú, Góa beh koh chi̍t-pái tín-tāng thiⁿ kap tōe kap hái kap ta-tōe.

⁸Góa beh tín-tāng bān-kok, bān-kok só͘ him-bō͘--ê beh lâi; Góa chiū hō͘ êng-kng chhiong-móa chit keng tiān; che sī bān-kun ê Iâ-hô-hoa kóng--ê.

⁹Bān-kun ê Iâ-hô-hoa kóng, Gûn sī Góa--ê, kim ia̍h sī Góa--ê.

¹⁰Chit keng tiān āu-lâi ê êng-kng, beh iâⁿ-kè chêng ê êng-kng; che sī bān-kun ê Iâ-hô-hoa kóng--ê; koh tī chit ê só͘-chāi, Góa beh siúⁿ-sù pêng-an; che sī bān-kun ê Iâ-hô-hoa kóng--ê.

¹¹Tāi-lī-o͘ ông jī-nî, káu ge̍h jī-cha̍p-sì ji̍t, Iâ-hô-hoa ê ōe thok sian-ti Hap-kai kóng,

¹²Bān-kun ê Iâ-hô-hoa án-ni kóng, Koan-hē tī lu̍t-hoat lí thang mn̄g chè-si,

¹³kóng, Siat-sú ū lâng ēng saⁿ-á-ku pau sèng ê bah, chit ê saⁿ-á-ku óa-tio̍h piáⁿ, á-sī thng, á-sī chiú, á-sī iû, á-sī pa̍t-hō chia̍h-mi̍h, chiū chit ê mi̍h chiâⁿ-chòe sèng mah? Chè-si ìn kóng, Bô--lah.

¹⁴Hap-kai koh kóng, Siat-sú ū lâng bong--tio̍h sin-si bak lah-sap, lâi óa-tio̍h chiah ê mi̍h ê chi̍t-hāng, chit ê mi̍h chiâⁿ-chòe ù-òe mah? Chè-si ìn kóng, Chiâⁿ-chòe ù-òe.

¹⁵Hap-kai chiū ìn kóng, Iâ-hô-hoa kóng, Tī Góa ê bīn-chêng, chit ê peh-sìⁿ sī chhin-chhiūⁿ án-ni, chit ê kok iā sī án-ni; in ê chhiú só͘ chòe ta̍k-hō ê kang iā lóng sī án-ni; in tī-chia só͘ hiàn--ê bô chheng-khì.

¹⁶Taⁿ chhiáⁿ lín siūⁿ, chit-ji̍t í-chêng, Iâ-hô-hoa ê tiān iáu-bē ū chio̍h tha̍h tī chio̍h-téng ê sî;

¹⁷le̍k-kè hiah ê sî, lâng lâi kàu gō͘-kak-tui, siūⁿ beh tit-tio̍h jī-cha̍p táu, chí-ū cha̍p-táu; ū lâng lâi kàu chiú-khut, siūⁿ beh tit-tio̍h gō͘-cha̍p àng, chí-ū tit-tio̍h jī-cha̍p àng.

¹⁸Tī lín ê chhiú só͘-chòe it-chhè ê kang, Góa ēng ko͘-tâ, hiú-nōa, tōa-pha̍uh phah lín, lín iáu-kú bô kui-ǹg Góa; che sī Iâ-hô-hoa kóng--ê.

¹⁹Chhiáⁿ lín siūⁿ chit-ji̍t í-chêng, tùi káu-ge̍h jī-sì ji̍t kiàn-li̍p Iâ-hô-hoa tiān ê tōe-ki ê sî, lín tio̍h siūⁿ i.

²⁰Chhek-chhng iáu ū chéng-chí mah? Phû-tô-chhiū, bû-hoa-kó-chhiū, sia̍h-liû-chhiū, kaⁿ-ná-chhiū, lóng bē ū kiat ké-chí; tùi kin-á-ji̍t khí, Góa beh sù-hok lín.

²¹Hit-ge̍h jī-cha̍p-sì ji̍t, Iâ-hô-hoa ê ōe tē-jī-pái lîm-kàu Hap-kai kóng,

²²Lí tio̍h kā Iû-tāi ê chóng-tok Só͘-lô-pa-pek kóng, Góa beh tín-tāng thiⁿ kap tōe;

²³Góa beh chhia-tó lia̍t-kok ê pó-chō, tû-bia̍t ta̍k pang-kok ê sè-le̍k, ia̍h beh chhia-tó chiàn-chhia kap chē-chhia--ê, bé kap bé-peng lóng beh tó--lo̍h-khì, ta̍k-ê tùi i ê hiaⁿ-tī ê to lâi sí.