Read Pa-khek-lé Pe̍h-ōe-jī Sèng-keng, 1933 - Barclay Taiwanese Bible, 1933 - Full Romanization Sat-ka-lì-a 7 Bible Online

Sat-ka-lì-a 7 - Pa-khek-lé Pe̍h-ōe-jī Sèng-keng, 1933 - Barclay Taiwanese Bible, 1933 - Full Romanization bible

Sat-ka-lì-a 7

¹Hn̄g ê lâng iā beh lâi, ū hūn tī khí Iâ-hô-hoa ê tiān; lín chiū chai bān-kun ê Iâ-hô-hoa chhe góa kàu lín chia. Lín nā chù-ì thiaⁿ-thàn Iâ-hô-hoa, lín ê Siōng-tè ê ōe, chiū beh ū chit ê tāi-chì.

²Tāi-lī-o͘ ông sì-nî káu-ge̍h, chiū-sī Ki-su-liû ge̍h, chhoe sì, Iâ-hô-hoa ê ōe lîm-kàu Sat-ka-lī-a.

³Hit-sî Pek-te̍k-lī lâng í-keng chhe Sa-lī-sek kap Lī-kian-bí-le̍k kap tè in ê lâng khì kiû-un tī Iâ-hô-hoa,

⁴iā mn̄g bān-kun ê Iâ-hô-hoa tiān-lāi ê chè-si í-ki̍p sian-ti kóng, Góa le̍k-nî í-lâi tī gō͘-ge̍h-kan thî-khàu ka-kī hun-piat, taⁿ iáu-kú tio̍h án-ni kiâⁿ mah?

⁵Bān-kun ê Iâ-hô-hoa ê ōe lîm-kàu góa kóng,

⁶Lí tio̍h kā chit só͘-chāi ê chèng peh-sìⁿ kap chè-si kóng, Lín chhit-cha̍p nî kú, tī gō͘-ge̍h chhit-ge̍h kìm-chia̍h pi-ai kiám-sī ūi-tio̍h Góa, ūi-tio̍h Góa, kìm-chia̍h mah?

⁷Lín he̍k-sī chia̍h he̍k-sī lim, kiám m̄-sī lín teh-chia̍h, lín teh-lim mah?

⁸Tng Iâ-lō͘-sat-léng kap sì-ûi ê siâⁿ ū khiā-khí ê peh-sìⁿ koh hong-sēng, lâm-hng kap pîⁿ-iûⁿ ū lâng khiā-khí ê sî, Iâ-hô-hoa thok-tiōng chêng ê sian-ti só͘ soan-thoân ê ōe, lín kiám-m̄-tio̍h thiaⁿ mah?

⁹Iâ-hô-hoa ê ōe koh lîm-kàu Sat-ka-lī-a kóng, Bān-kun ê Iâ-hô-hoa bat án-ni kóng,

¹⁰Tio̍h chiàu chin-si̍t ê kong-pêng lâi sím-phòaⁿ, tāi-ke ēng chû-ài lîn-bín lâi saⁿ khoán-thāi;

¹¹m̄-thang khi-hū kóaⁿ-hū ko͘-jî, chhut-gōa lâng, kap sòng-hiong lâng; m̄-thang sim-lāi kè-bô͘ pháiⁿ-tāi lâi saⁿ-hām-hāi.

¹²Chóng-sī in m̄-khéng thiaⁿ-thàn, oa̍t-tńg keng-thâu pōe-ge̍k, that-ba̍t in ê hī-khang tì-kàu bōe thiaⁿ.

¹³Koh hō͘ in ê sim ngī chhin-chhiūⁿ soān-chio̍h, bián-tit thiaⁿ lu̍t-hoat, kap bān-kun ê Iâ-hô-hoa ēng I ê Sîn thok chêng ê sian-ti só͘ kóng ê ōe; só͘-í bān-kun ê Iâ-hô-hoa tōa-tōa hoat siū-khì.

¹⁴In-ūi I bat kiò, in m̄-thiaⁿ, án-ni in beh kiò, Góa iā m̄-thiaⁿ; che sī bān-kun ê Iâ-hô-hoa kóng--ê;