Read Pa-khek-lé Pe̍h-ōe-jī Sèng-keng, 1933 - Barclay Taiwanese Bible, 1933 - Full Romanization Má-thài 21 Bible Online

Má-thài 21 - Pa-khek-lé Pe̍h-ōe-jī Sèng-keng, 1933 - Barclay Taiwanese Bible, 1933 - Full Romanization bible

Má-thài 21

¹In kiâⁿ kūn Iâ-lō͘-sat-léng, kàu Pek-hoat-kî kap Kaⁿ-ná soaⁿ ê sî, Iâ-so͘ chhe nn̄g ê ha̍k-seng, kā in kóng,

²Lín khì tùi-bīn ê hiuⁿ-siā, liâm-piⁿ ōe tú-tio̍h chi̍t chiah lû pa̍k-teh, ū lû-á kap i tī-teh; tháu-khui, khan i lâi góa chia.

³Nā ū lâng kā lín kóng sím-mi̍h, chiū tio̍h kóng, Chú khiàm-ēng i, i liâm-piⁿ beh sàng i lâi.

⁴Chit ê sū chiâⁿ, sī beh èng-giām chá thok sian-ti só͘ kóng ê, kóng,

⁵Tio̍h kā Sûn ê cha-bó͘-kiáⁿ kóng,_x0009_Lí ê ông lâi chiū-kūn lí,_x0009_Un-jiû koh khiâ lû,_x0009_Kap lû só͘ siⁿ ê lû-á.

⁶Ha̍k-seng khì, chiàu Iâ-so͘ só͘ hoan-hù in ê khì kiâⁿ.

⁷Khan lû kap lû-á lâi, chiong ka-kī ê saⁿ chhu tī in téng-bīn, Iâ-so͘ chiū chiūⁿ-khì khiâ.

⁸Chèng lâng tiong khah chōe chiong ka-kī ê saⁿ pho͘ tī lō͘-ni̍h; ū-ê chhò chhiū-ki pho͘ tī lō͘-ni̍h.

⁹Chêng kiâⁿ āu tè ê chèng lâng hoah kóng, Tāi-pi̍t ê hō͘-è, Hô-sàn-ná, tī Chú ê miâ lâi ê tit-tio̍h o-ló, tī chì-koâiⁿ ê, Hô-sàn-ná.

¹⁰I ji̍p Iâ-lō͘-sat-léng, thong siâⁿ iô-choah, kóng, Chit-ê chī-chūi?

¹¹Chèng lâng kóng, Chit-ê sī sian-ti Iâ-so͘, tùi Ka-lī-lī ê Ná-sat-le̍k lâi ê.

¹²Iâ-so͘ ji̍p Siōng-tè ê tiān, kóaⁿ-chhut tiān-lāi it-chhè bóe-bōe ê lâng, chhia-tó ōaⁿ chîⁿ ê lâng ê toh, kap bōe chíⁿ-á ê lâng ê í.

¹³Kā in kóng, Ū kì-chài kóng, Góa ê chhù beh chheng chòe kî-tó ê chhù, nā-sī lín chiah ê hō͘ i chòe chha̍t-siū.

¹⁴Chhiⁿ-mî ê, pái-kha ê, tī tiān-ni̍h chiū-kūn Iâ-so͘, I chiū i-hó in.

¹⁵To̍k-to̍k chiah ê chè-si-thâu kap keng-ha̍k-sū khòaⁿ-kìⁿ I só͘ kiâⁿ ê kî-sū, koh khòaⁿ-kìⁿ gín-ná tī tiān-ni̍h hoah kóng, Tāi-pi̍t ê hō͘-è, Hô-sàn-ná, chiū siū-khì; kā I kóng, In teh kóng ê, lí thiaⁿ-kìⁿ bô?

¹⁶Iâ-so͘ kā in kóng, Ū; lín kiám m̄ bat tha̍k-tio̍h hit kù, kóng, Tùi gín-ná kap chia̍h lin ê ê chhùi, lí hō͘ o-ló ê ōe chiâu-pī mah?

¹⁷Chiū lī-khui in, chhut siâⁿ kàu Pek-tāi-nî; tī hia hioh mî.

¹⁸Keh chá-khí, tò-lâi siâⁿ-ni̍h ê sî, Iâ-so͘ iau;

¹⁹khòaⁿ-kìⁿ lō͘-piⁿ chi̍t châng bû-hoa-kó chhiū, chiū óa-kūn khì, bán lóng bô, chí-ū hio̍h nā-tiāⁿ; chiū kā chhiū kóng, Taⁿ liáu-āu, lí éng-éng bô koh kiat ké-chí; hit châng bû-hoa-kó chhiū liâm-piⁿ ko͘-tâ.

²⁰Ha̍k-seng khòaⁿ-liáu chiū kî-koài, kóng, Bû-hoa-kó chhiū cháiⁿ-iūⁿ liâm-piⁿ ko͘-tâ?

²¹Iâ-so͘ ìn kóng, Góa si̍t-chāi kā lín kóng, Lín nā ū sìn bô giâu-gî, m̄ nā chit hō kiâⁿ tī bû-hoa-kó chhiū ê sū lín ōe kiâⁿ; chiū nā tùi chit ê soaⁿ kóng, Tio̍h sóa-khì hiat-lo̍h hái, ia̍h beh chiâⁿ.

²²Koh kî-tó ê sî, kìⁿ-nā lín só͘ kiû ê, sìn chiū tit-tio̍h.

²³Iâ-so͘ ji̍p tiān, kà-sī lâng ê sî, chiah ê chè-si-thâu, kap peh-sìⁿ ê tiúⁿ-ló, chiū-kūn I kóng, Lí ēng sím-mi̍h koân kiâⁿ chiah ê sū? koh chī-chūi hō͘ lí chit ê koân?

²⁴Iâ-so͘ ìn kóng, Góa ia̍h ū chi̍t kù ōe beh mn̄g lín, lín nā kā góa kóng, góa chiah beh kā lín kóng góa ēng sím-mi̍h koân kiâⁿ chiah ê sū.

²⁵Iok-hān ê sóe-lé sī tùi tá-lo̍h lâi? sī tùi thiⁿ, á-sī tùi lâng? In su-khia gī-lūn kóng, Nā kóng, Tùi thiⁿ, I beh kā lán kóng, Án-ni lín siáⁿ-sū m̄ sìn i?

²⁶Nā kóng, Tùi lâng, lán iū kiaⁿ peh-sìⁿ; in lóng lia̍h Iok-hān chòe sian-ti.

²⁷Chiū ìn Iâ-so͘ kóng, Goán m̄ chai. I chiū kā in kóng, Góa ia̍h bô beh kā lín kóng góa sī ēng sím-mi̍h koân kiâⁿ chiah ê sū. Chóng-sī lín phah-sǹg cháiⁿ-iūⁿ?

²⁸Lâng ū nn̄g ê kiáⁿ, chiū-kūn hit ê thâu-chi̍t-ê kóng, Kiáⁿ ah, kin-á-ji̍t khì phû-tô-hn̂g chòe kang.

²⁹Ìn kóng, Góa m̄; āu-lâi hoán-hóe chiū khì.

³⁰Koh chiū-kūn tē-jī-ê, ia̍h án-ni kóng. Ìn kóng, Chú ah, góa beh; chiū kèng-jiân bô khì.

³¹Chí nn̄g ê tá-lo̍h chi̍t ê kiâⁿ lāu-pē ê ì-sù ah? In kóng, Thâu-chi̍t-ê. Iâ-so͘ kā in kóng, Góa si̍t-chāi kā lín kóng chiah ê thiu-hiòng ê kap chhiong-ki tāi-seng lín ji̍p Siōng-tè ê kok.

³²In-ūi Iok-hān tī gī ê lō͘ chiū-kūn lín, lín bô sìn i; thiu-hiòng ê kap chhiong-ki chiū sìn i; koh lín khòaⁿ-liáu, ia̍h bô hoán-hóe khì sìn i.

³³Koh thiaⁿ chi̍t ê phì-jū: Ū chi̍t ê ke-chú, chai chi̍t hn̂g phû-tô, ēng lî-pa ûi i, lāi-bīn khui chiú-khut, khí chi̍t ê chiú-kiⁿ lâu, cho͘ hō͘ tiān-hō͘, chiū khì pa̍t só͘-chāi.

³⁴Siu ké-chí ê sî beh kàu, chiū chhe i ê lô͘-po̍k chiū-kūn tiān-hō͘, siu i ê ké-chí.

³⁵Tiān-hō͘ lia̍h i ê lô͘-po̍k, chi̍t-ê phah, chi̍t-ê thâi, chi̍t-ê ēng chio̍h-thâu tìm.

³⁶Koh chhe pa̍t ê lô͘-po̍k, pí chêng khah chōe; in iû-goân án-ni khoán-thāi in.

³⁷Āu-lâi chhe i ê kiáⁿ chiū-kūn in, siūⁿ kóng, In beh chun-kèng góa ê kiáⁿ.

³⁸Nā-sī tiān-hō͘ khòaⁿ-kìⁿ hit ê kiáⁿ, chiū saⁿ-kap kóng, Chit-ê sī i ê hō͘-sû; lâi, kā i thâi-sí, thang tit i ê gia̍p.

³⁹Chiū lia̍h i, chhia i chhut hn̂g-gōa, hāi-sí i.

⁴⁰Taⁿ hn̂g-chú nā kàu, beh cháiⁿ-iūⁿ lâi pān chiah ê tiān-hō͘?

⁴¹In kā I kóng, I beh ēng ok-pò lâi bia̍t chiah ê ok-lâng; chiong phû-tô-hn̂g cho͘ pa̍t ê tiān-hō͘, chiū-sī chiàu-sî la̍p ké-chí ê.

⁴²Iâ-so͘ tùi in kóng, Keng-ni̍h só͘ kì-chài,_x0009_Sai-hū só͘ khì-sak ê chio̍h,_x0009_Chiâⁿ-chòe chhù-kak-thâu ê chio̍h;_x0009_Che sī Chú só͘ chiâⁿ ê,_x0009_Lán ê ba̍k-chiu khòaⁿ chòe kî-koài,lín kiám bē tha̍k mah?

⁴³Só͘-í góa kā lín kóng, Siōng-tè ê kok beh tùi lín chhiúⁿ-khì, lâi siúⁿ-sù kiat i ê ké-chí ê peh-sìⁿ.

⁴⁴Koh poa̍h-tó tī chit tè chio̍h téng ê teh-beh phòa kô͘-kô͘; hō͘ chit tè chio̍h teh tī i téng-bīn ê beh iù boa̍h-boa̍h.

⁴⁵Chiah ê chè-si-thâu kap Hoat-lī-sài lâng thiaⁿ-kìⁿ I ê phì-jū, chai I só͘ kóng ê sī chí in.

⁴⁶Chiū ài beh lia̍h I, nā-sī kiaⁿ chèng lâng; in-ūi chèng lâng lia̍h I chòe sian-ti.