Read Pa-khek-lé Pe̍h-ōe-jī Sèng-keng, 1933 - Barclay Taiwanese Bible, 1933 - Full Romanization Má-thài 4 Bible Online

Má-thài 4 - Pa-khek-lé Pe̍h-ōe-jī Sèng-keng, 1933 - Barclay Taiwanese Bible, 1933 - Full Romanization bible

Má-thài 4

¹Hit sî Iâ-so͘ hō͘ Sèng Sîn chhōa kàu khòng-iá, beh siū Mô͘-kúi chhì.

²Í-keng kìm-chia̍h sì-cha̍p ji̍t-mî, āu-lâi chiū iau.

³Chhì-ê óa-lâi kā I kóng, Lí nā sī Siōng-tè ê Kiáⁿ, chiū kah chiah ê chio̍h pìⁿ chòe piáⁿ. Nā-sī I ìn kóng,

⁴Ū kì-chài kóng, Lâng ê oa̍h, m̄ nā óa-khò piáⁿ, chiū-sī óa-khò tùi Siōng-tè ê chhùi só͘ chhut lóng-chóng ê ōe.

⁵Mô͘-kúi chiū chhōa I kàu sèng siâⁿ, hō͘ I khiā tī tiān ê bé-liu, kā I kóng,

⁶Lí nā sī Siōng-tè ê Kiáⁿ, tio̍h ka-kī tiô-lo̍h-khì; in-ūi ū kì-chài kóng,_x0009_I beh ūi-tio̍h lí bēng-lēng I ê thiⁿ-sài,_x0009_In beh ēng chhiú hû lí,_x0009_Bián-tit lí ê kha tak-tio̍h chio̍h.

⁷Iâ-so͘ kā i kóng, Koh ū kì-chài kóng, Bo̍h-tit chhì Chú lí ê Siōng-tè.

⁸Mô͘-kúi koh chhōa I chiūⁿ ke̍k koâiⁿ ê soaⁿ, ēng thiⁿ-ē bān kok kap in ê êng-kng hō͘ I khòaⁿ;

⁹kā I kóng, Lí nā phak-lo̍h pài góa, chiah-ê góa lóng hō͘ lí.

¹⁰Iâ-so͘ chiū kā i kóng, Sat-tàn, thè-khì; in-ūi ū kì-chài kóng, Tio̍h pài Chú, lí ê Siōng-tè; to̍k-to̍k ho̍k-sāi I nā-tiāⁿ.

¹¹Tùi án-ni Mô͘-kúi lī-khui I; ū thiⁿ-sài kàu, lâi su-hāu I.

¹²Iâ-so͘ thiaⁿ-kìⁿ Iok-hān koaiⁿ-kaⁿ, chiū thè-khì Ka-lī-lī;

¹³lī-khui Ná-sat-le̍k, khì Ka-pek-lông khiā-khí; chit só͘-chāi tī hái-piⁿ, tī Se-pò͘-lûn kap La̍p-tāi-lī ê kau-kài;

¹⁴sī beh èng-giām chá thok sian-ti Í-sài-a só͘ kóng ê, kóng,

¹⁵Se-pò͘-lûn ê tōe, La̍p-tāi-lī ê tōe,_x0009_Iân hái-kîⁿ ê lō͘, Iok-tàn ê hô gōa,_x0009_Gōa-pang ê Ka-lī-lī;

¹⁶Chē tī o͘-àm ê peh-sìⁿ,_x0009_Bat khòaⁿ-kìⁿ tōa kng;_x0009_Chē tī sí-ìm ê tōe ê,_x0009_Ū kng khí-lâi chiò in.

¹⁷Tùi hit sî Iâ-so͘ khí-thâu soan-thoân kóng, Lín tio̍h hoán-hóe, in-ūi thian-kok kūn lah.

¹⁸Iâ-so͘ kiâⁿ tī Ka-lī-lī ê hái-kîⁿ; khòaⁿ-kìⁿ nn̄g ê hiaⁿ-tī-á, chiū-sī Se-bûn, kiò chòe Pí-tek, kap i ê hiaⁿ-tī An-tek-lia̍t, pha bāng tī hái-ni̍h, in-ūi sī thó-hî lâng.

¹⁹I chiū kā in kóng, Lâi tè góa, góa beh hō͘ lín tit-tio̍h lâng chhin-chhiūⁿ thó-hî ê.

²⁰In liâm-piⁿ lī-khui bāng lâi tè I.

²¹Tùi chia chìn-chêng, koh khòaⁿ-kìⁿ nn̄g ê hiaⁿ-tī-á, chiū-sī Se-pí-thài ê kiáⁿ Ngá-kok kap i ê hiaⁿ-tī Iok-hān, kap in lāu-pē Se-pí-thài tī chûn-ni̍h teh pó͘ bāng; Iâ-so͘ chio in.

²²In liâm-piⁿ lī-khui chûn, pài-pia̍t in ê lāu-pē, lâi tè I.

²³Iâ-so͘ piàn kiâⁿ Ka-lī-lī, tī in ê hōe-tn̂g kà-sī, soan-thoân thian-kok ê hok-im, i-hó peh-sìⁿ-kan ta̍k iūⁿ ê chèng-thâu, kap ta̍k iūⁿ ê pīⁿ-thiàⁿ.

²⁴I ê miâ-siaⁿ pò-iông kàu thong Sū-lī-a; hoān ū tì pīⁿ ê, tú-tio̍h chōe-chōe iūⁿ ê chèng-thâu kap thàng-thiàⁿ ê, hoān-tio̍h kúi ê, iûⁿ-hîn ê, piàn-sūi ê, chhōa in lóng lâi chiū-kūn I, I chiū i-hó in.

²⁵Hit sî, tùi Ka-lī-lī, Te-ka-pho-lī, Iâ-lō͘-sat-léng, Iû-thài, kap Iok-tàn gōa, ū chōe-chōe tīn ê lâng lâi tè I.