Read Pa-khek-lé Pe̍h-ōe-jī Sèng-keng, 1933 - Barclay Taiwanese Bible, 1933 - Full Romanization Má-Khó 11 Bible Online

Má-Khó 11 - Pa-khek-lé Pe̍h-ōe-jī Sèng-keng, 1933 - Barclay Taiwanese Bible, 1933 - Full Romanization bible

Má-Khó 11

¹In kiâⁿ kūn Iâ-lō͘-sat-léng, kàu Kaⁿ-ná soaⁿ-piⁿ ê Pek-hoat-kî kap Pek-tāi-nî ê sî,

²Iâ-so͘ chhe nn̄g ê ha̍k-seng, kā in kóng, Lín khì tùi-bīn ê hiuⁿ-siā, í-keng ji̍p-khì chiū beh tú-tio̍h chi̍t chiah lû-á pa̍k tī hia, iáu-bē bat ū lâng khiâ ê; tháu-khui kā i khan lâi.

³Nā ū lâng mn̄g lín kóng, Siáⁿ-sū chòe án-ni? lín chiū tio̍h kóng, Chú khiàm-ēng i; liâm-piⁿ beh hō͘ i tò-lâi chia.

⁴Nn̄g lâng chiū khì, tú-tio̍h chi̍t chiah lû-á, tī lō͘-ni̍h ê oat-kak, pa̍k tī mn̂g-gōa, chiū tháu i.

⁵Piⁿ-thâu khiā ê lâng ū-ê kóng, Lín tháu lû-á beh siáⁿ-sū?

⁶In chiàu Iâ-so͘ só͘ kóng ê kā in kóng; hiah ê lâng chiū pàng hō͘ i khì.

⁷In chiū khan lû-á chiū-kūn Iâ-so͘, sòa ēng ka-kī ê saⁿ phoa̍h tī hit téng-bīn; Iâ-so͘ chiū khiâ i.

⁸Ū chōe-chōe lâng ēng in ê saⁿ pho͘ tī lō͘-ni̍h; iā ū-ê ēng chhiū-ki, chiū-sī tùi hn̂g-ni̍h só͘ chhò lâi ê.

⁹Chêng kiâⁿ āu tè ê kiò kóng, Hô-sàn-ná, tī Chú ê miâ lâi ê, eng-kai tit-tio̍h o-ló;

¹⁰hit-ê teh-beh lâi ê kok, chiū-sī lán ê chó͘-kong Tāi-pi̍t ê kok, eng-kai tit-tio̍h o-ló ah; tī chì-koâiⁿ ê ūi ah, Hô-sàn-ná.

¹¹Iâ-so͘ ji̍p Iâ-lō͘-sat-léng, ji̍p tiān-tn̂g; sì-kè khòaⁿ ta̍k hāng ê mi̍h; ji̍t í-keng àm, chiū kap cha̍p-jī ê ha̍k-seng chhut-khì kàu Pek-tāi-nî.

¹²Keh ji̍t, in tùi Pek-tāi-nî chhut-lâi, Iâ-so͘ iau.

¹³Hn̄g-hn̄g khòaⁿ-kìⁿ chi̍t châng bû-hoa-kó chhiū ū hio̍h, chiū khì khòaⁿ tī hit téng-bīn ū só͘ tit-tio̍h bô; í-keng kàu, kèng-jiân bô só͘ tit-tio̍h, chí ū hio̍h nā-tiāⁿ; in-ūi m̄ sī bû-hoa-kó ê sî;

¹⁴chiū tùi hit châng chhiū kóng, Taⁿ liáu-āu éng-éng bô lâng chia̍h-tio̍h lí ê ké-chí. I ê ha̍k-seng iā thiaⁿ-kìⁿ.

¹⁵In kàu Iâ-lō͘-sat-léng, Iâ-so͘ ji̍p tiān; chiū kóaⁿ-chhut tiān-lāi bóe-bōe ê lâng, chhia-tó ōaⁿ chîⁿ ê lâng ê toh, kap bōe chíⁿ-á ê lâng ê í;

¹⁶sòa m̄ chún lâng tòa khì-kū tùi tiān-ni̍h keng-kè.

¹⁷Koh kà-sī in kóng, Kiám bô kì-chài kóng, Góa ê chhù beh chheng chòe bān pang kî-tó ê chhù mah? nā-sī lín hō͘ i chòe chha̍t-siū.

¹⁸Chiah ê chè-si-thâu kap keng-ha̍k-sū thiaⁿ-kìⁿ, chiū chhē-khòaⁿ thang cháiⁿ-iūⁿ lâi bia̍t I, in-ūi kiaⁿ I; sī chèng lâng lóng kî-koài I ê kà-sī.

¹⁹Ta̍k ê-hng Iâ-so͘ chhut siâⁿ khì.

²⁰Chá-khí sî in tùi hia keng-kè, chiū khòaⁿ-kìⁿ hit châng bû-hoa-kó chhiū kun-ki lóng ko͘-tâ-khì.

²¹Pí-tek kì-tit chiū kā I kóng, Lia̍p-pí, lí khòaⁿ, lí só͘ chiù-chó͘ ê bû-hoa-kó chhiū í-keng ta-khì.

²²Iâ-so͘ ìn kóng, Lín tio̍h sìn Siōng-tè.

²³Góa si̍t-chāi kā lín kóng, Hoān-nā kā chit ê soaⁿ kóng, Sóa-khì, hiat tī hái-ni̍h, sim-lāi bô giâu-gî, to̍k-to̍k sìn i só͘ kóng ê tek-khak chiâⁿ, chiū beh kā i chiâⁿ.

²⁴Só͘-í góa kā lín kóng, Kìⁿ-nā lín só͘ kî-tó lâi kiû ê, tio̍h sìn sī í-keng tit-tio̍h, chiū beh kā lín chiâⁿ.

²⁵Kìⁿ-nā lín khiā-teh kî-tó ê sî siūⁿ-tio̍h ū lâng tek-chōe lí sím-mi̍h, chiū tio̍h sià-bián i; hō͘ lín tī thiⁿ-ni̍h ê Pē iā siá-bián lín ê kè-sit.

²⁷In koh kàu Iâ-lō͘-sat-léng; Iâ-so͘ tī tiān-lāi teh kiâⁿ ê sî, hiah ê chè-si-thâu keng-ha̍k-sū kap tiúⁿ-ló chiū-kūn I kóng,

²⁸Lí ēng sím-mi̍h koân kiâⁿ chiah ê sū? koh chī-chūi hō͘ lí chit ê koân thang kiâⁿ i ah?

²⁹Iâ-so͘ chiū kā in kóng, Góa iā mn̄g lín chi̍t kù ōe; lín nā ìn góa, góa chiah beh kā lín kóng góa ēng sím-mi̍h koân kiâⁿ chiah ê sū.

³⁰Iok-hān ê sóe-lé sī tùi thiⁿ á-sī tùi lâng ah? lín tio̍h ìn góa.

³¹In saⁿ-kap gī-lūn kóng, Nā kóng, Tùi thiⁿ, I beh kóng, Án-ni lín siáⁿ-sū m̄ sìn i?

³²Nā kóng, Tùi lâng,—in chiū kiaⁿ peh-sìⁿ, in-ūi chèng lâng si̍t-chāi lia̍h Iok-hān chòe sian-ti.

³³Chiū ìn Iâ-so͘ kóng, Goán m̄ chai. Iâ-so͘ chiū kā in kóng, Góa iā bô beh kā lín kóng góa sī ēng sím-mi̍h koân kiâⁿ chiah ê sū.