Read Pa-khek-lé Pe̍h-ōe-jī Sèng-keng, 1933 - Barclay Taiwanese Bible, 1933 - Full Romanization Sin-bēng-kì 24 Bible Online

Sin-bēng-kì 24 - Pa-khek-lé Pe̍h-ōe-jī Sèng-keng, 1933 - Barclay Taiwanese Bible, 1933 - Full Romanization bible

Sin-bēng-kì 24

¹Lâng nā chhōa-bó͘, jiân-āu khòaⁿ i ê bó͘ m̄ tèng-ì, in-ūi i chai i ū bô ha̍p-gî ê sū, chiū thang siá lî-su hō͘ i, kau i ê chhiú, chhe i lī-khui i ê ke.

²Hū-jîn-lâng lī-khui i ê ke liáu-āu, thang khì kè pa̍t-lâng.

³Nā sī āu ê tiōng-hu oàn-hūn i, iā siá lî-su kau i ê chhiú, kah i lī-khui i ê ke, á-sī i āu ê tiōng-hu chhōa i chòe-bó͘ chiū sí;

⁴chiū hit-ê chêng ê tiōng-hu í-keng kah i khì-ê, bōe-tit-thang tī i phah lah-sap í-āu, koh chhōa i chòe-bó͘; in-ūi che sī Iâ-hô-hoa só͘ iàm-ò͘ⁿ-ê; m̄-thang hō͘ Iâ-hô-hoa lí ê Siōng-tè só͘ siúⁿ-sù lí chòe-gia̍p ê tōe lâi hoān-chōe.

⁵Sin chhōa-bó͘ ê lâng m̄-thang khì kau-chiàn, iā m̄-thang kau-tài i pān-lí sím-mi̍h sū; thang hō͘ i tī ke-lāi chheng-hân chi̍t-nî, thang hō͘ i só͘ chhōa ê bó͘ hoaⁿ-hí.

⁶M̄-thang ēng lâng ê chio̍h-bō, á-sī chio̍h-bō ê téng-tún, chòe chún-tǹg; in-ūi che sī ēng lâng ê sìⁿ-miā chòe chún-tǹg.

⁷Nā tú-tio̍h lâng koái Í-sek-lia̍t-tiong chi̍t-ê hiaⁿ-tī, khoán-thāi i chòe lô͘-châi, á-sī bōe i, hit ê koái-kùn chiū tio̍h hō͘ i sí; án-ni, chiū tùi lín tiong-kan tû-khì hit ê pháiⁿ.

⁸Thái-ko ê pháiⁿ chèng-thâu, lí tio̍h chin sòe-jī; chè-si Lī-bī lâng it-chhè só͘ kà-sī lín-ê, tio̍h chiàu án-ni lâi kiâⁿ; góa só͘ bēng-lēng in ê, lín tio̍h chip-siú lâi kiâⁿ;

⁹chá chhut Ai-ki̍p ê sî, Iâ-hô-hoa lí Siōng-tè tī lō͘-ni̍h tùi Bí-lī-àm só͘-kiâⁿ-ê, lí tio̍h kì-tit.

¹⁰Lí bô-lūn ēng sím-mi̍h chioh chhù-piⁿ, m̄-thang ji̍p i ê ke the̍h chún-tǹg,

¹¹lí tio̍h khiā tī gōa-bīn, thèng-hāu kā lí chioh ê lâng the̍h chún-tǹg chhut-lâi hō͘ lí;

¹²hit lâng nā sī sòng-hiong, lí m̄-thang lâu i ê chún-tǹg kè-mî;

¹³ji̍t-lo̍h ê sî, tek-khak tio̍h ēng hit ê chún-tǹg hêng i, hō͘ i ēng i ê saⁿ kah teh khùn; i chiū kā lí chiok-hok; che tī Iâ-hô-hoa lí Siōng-tè ê bīn-chêng, beh sǹg-chòe lí ê gī.

¹⁴Khùn-khó͘ sòng-hiong ê chhiàⁿ-kang lâng, bô-lūn sī lí ê hiaⁿ-tī, á-sī chhut-gōa lâng tiàm tī lí ê tōe, tī lí ê siâⁿ-mn̂g-lāi ê, lí m̄-thang khi-hū i;

¹⁵i ê kang-chîⁿ lí hit-ji̍t tio̍h hō͘ i, m̄-thang thèng-hāu kàu ji̍t-lo̍h-liáu; in-ūi i sòng-hiong, kòa-sim tī hit-ê; kiaⁿ-liáu i in-ūi lí lâi tùi Iâ-hô-hoa âu-kiò, lí chiū ū chōe.

¹⁶M̄-thang in-ūi kiáⁿ lâi hō͘ lāu-pē sí, iā m̄-thang in-ūi lāu-pē lâi hō͘ kiáⁿ sí; ta̍k-lâng tio̍h ūi-tio̍h ka-kī ê chōe lâi sí.

¹⁷Lí sím-phòaⁿ, m̄-thang oan-óng chhut-gōa lâng kap bô-pē ê kiáⁿ, iā m̄-thang the̍h kóaⁿ-hū ê i-chiûⁿ chòe chún-tǹg;

¹⁸lí tio̍h kì-tit lí tī Ai-ki̍p bat chòe lô͘-châi, Iâ-hô-hoa lí ê Siōng-tè kiù-sio̍k lí tùi hia chhut; só͘-í góa bēng-lēng lí tio̍h án-ni kiâⁿ.

¹⁹Lí tī chhân-ni̍h siu-koah gō͘-kak, nā bōe-kì-tit chi̍t-sok tī chhân-ni̍h, m̄-thang koh oat-khì the̍h, tio̍h lâu hō͘ chhut-gōa lâng kap ko͘-jî kóaⁿ-hū, tì-kàu Iâ-hô-hoa lí ê Siōng-tè beh tī lí ê chhiú só͘ chòe it-chhè ê sū, sù-hok lí.

²⁰Lí phah lí ê kaⁿ-ná-chhiū í-āu m̄-thang koh sûn hiah ê chhiū-ki; tio̍h lâu hō͘ chhut-gōa lâng kap ko͘-jî kóaⁿ-hū.

²¹Lí bán lí ê phû-tô, só͘-chhun-ê m̄-thang koh bán, tio̍h lâu hō͘ chhut-gōa lâng, kap ko͘-jî, kóaⁿ-hū;

²²lí iā tio̍h kì-tit lí tī Ai-ki̍p tōe bat chòe lô͘-châi; só͘-í góa bēng-lēng lí tio̍h án-ni kiâⁿ.