Read Pa-khek-lé Pe̍h-ōe-jī Sèng-keng, 1933 - Barclay Taiwanese Bible, 1933 - Full Romanization Lo-má 11 Bible Online

Lo-má 11 - Pa-khek-lé Pe̍h-ōe-jī Sèng-keng, 1933 - Barclay Taiwanese Bible, 1933 - Full Romanization bible

Lo-má 11

¹Góa chiū kóng, Siōng-tè kiám ū khì-sak I ê peh-sìⁿ ah? Toàn-toàn m̄ sī. In-ūi góa iā sī Í-sek-lia̍t lâng, chhut tī A-pek-la̍h-hán ê hō͘-è, Piān-ngá-bín ê chi-phài.

²Siōng-tè bē bat khì-sak I só͘ tāi-seng chai ê peh-sìⁿ. Á-sī lín m̄ chai sèng-keng tī Í-lī-a hit chām só͘ kì-chài ah? i ū cháiⁿ-iūⁿ tùi Siōng-tè kò Í-sek-lia̍t lâng,

³kóng, Chú ah, in ū thâi-sí lí ê sian-ti, ku̍t-tó lí chiah ê chè-tôaⁿ; chí ū lâu góa tī-teh, in iā beh ti̍h góa ê sìⁿ-miā.

⁴Chóng-sī Siōng-tè ū ìn i cháiⁿ-iūⁿ ah? sī kóng, Góa ūi-tio̍h ka-kī ū lâu chhit-chheng lâng, bē bat kūi-pài Pa-le̍k ê.

⁵Hiān-kim iā án-ni iáu ū só͘ lâu-teh, chiū-sī chiàu un-tián lâi kéng-soán ê.

⁶Chóng-sī nā chiàu un-tián, chiū bô koh tùi só͘ kiâⁿ; nā bô, chiū un-tián m̄ sī un-tián.

⁷Án-ni chiū cháiⁿ-iūⁿ? Í-sek-lia̍t só͘ kiû ê, i kèng-jiân bô tit-tio̍h; to̍k-to̍k siū-kéng ê ū tit-tio̍h, kî-û ê chiū pìⁿ ngī-sim;

⁸chiàu só͘ kì-chài, kóng, Siōng-tè hō͘ in hun-bê ê sim, bōe khòaⁿ-kìⁿ ê ba̍k-chiu, bōe thiaⁿ-kìⁿ ê hī-khang, kàu tī kin-á-ji̍t.

⁹Tāi-pi̍t iā kóng,_x0009_Hō͘ in ê iân-toh chiâⁿ chòe oa̍h-tauh, chòe lô-bāng,_x0009_Chòe that-gāi, chòe pò-èng tī in;

¹⁰Hō͘ in ê ba̍k-chiu hoe, bōe-ōe khòaⁿ-kìⁿ,_x0009_In ê ka-chiah siông-siông ku-ku.

¹¹Án-ni góa chiū kóng, In í-keng tio̍h-tak, sī tì-kàu in poa̍h-tó mah? Toàn-toàn m̄ sī. Hoán-tńg tùi in ê hoān-chōe, chín-kiù chiū kàu tī gōa-pang, beh kek-khí in ê hùn-chì.

¹²Taⁿ in ê hoān-chōe nā chòe sè-kan ê pù-ū, in ê soe-thè nā chòe gōa-pang ê pù-ū, hô-hòng in ê chhiong-móa?

¹³Góa sī tùi lín gōa-pang lâng kóng, In-ūi góa sī gōa-pang lâng ê sù-tô͘, góa êng-kng góa ê chit;

¹⁴khòaⁿ ōe thang kek-khí góa kut-jio̍k chhin ê hùn-chì, lâi kiù in tiong-kan kúi-nā lâng.

¹⁵In-ūi in ê siū khì-sak nā chòe sè-kan ê koh hô, chiū in ê siū chiap-la̍p, m̄ sī tùi sí lâi oa̍h sī sím-mi̍h ah?

¹⁶Khí-thâu hiàn ê mī nā sī sèng, chiū kui-sn̂g iā sī sèng; kun nā sī sèng, chiū ki iā sī sèng.

¹⁷Chiah ê ki nā ū-ê at-khí-lâi, iā lí pún sī soaⁿ kaⁿ-ná tit-tio̍h chiap tī in tiong-kan, saⁿ-kap hūn tī kaⁿ-ná ê kun kap pûi-chiap;

¹⁸lí chiū m̄ thang tùi ki lâi khoa-kháu; lí nā khoa-kháu, chiū m̄ sī kun óa-khò lí, sī lí óa-khò kun.

¹⁹Án-ni lí beh kóng, Ki at-khí-lâi beh hō͘ góa chiap-lo̍h-lâi.

²⁰Tio̍h; in tùi m̄ sìn chiah at-khí-lâi, lí tùi sìn chiah khiā-tiâu.

²¹Sim bo̍h-tit chū-ko, tio̍h kiaⁿ-hiâⁿ. in-ūi Siōng-tè nā bô pó-sioh sūn-sèng ê ki, iā beh bô pó-sioh lí.

²²Tio̍h khòaⁿ Siōng-tè ê chû-pi kap giâm-kín; khoán-thāi hiah ê poa̍h-tó ê, sī giâm-kín; nā-sī khoán-thāi lí sī Siōng-tè ê chû-pi, chóng-sī lí tio̍h tn̂g-tn̂g tiàm-tī I ê chû-pi; nā bô, iā beh kā lí koah-khí-lâi.

²³Koh in nā m̄ sī tn̂g-tn̂g tiàm-tī m̄ sìn, iā beh tit-tio̍h chiap; in-ūi Siōng-tè ōe koh chiap in.

²⁴In-ūi lí nā tùi hit ê sūn-sèng chòe soaⁿ kaⁿ-ná ê kì-jiân koah-khí-lâi, ge̍k-sèng lâi chiap tī hó ê kaⁿ-ná, hô-hòng hiah ê sūn-sèng ê ki beh chiap tī pún kū ê kaⁿ-ná ah?

²⁵Hiaⁿ-tī ah, góa m̄ ài lín m̄ chai chit ê ò-biāu bián-tit lín ka-kī lia̍h-chòe tì-hūi; chiū-sī Í-sek-lia̍t tiong ū-ê chiâⁿ-chòe ngī-sim, thèng-hāu gōa-pang móa-móa chìn-ji̍p;

²⁶án-ni thong Í-sek-lia̍t beh lóng tit kiù, chiàu só͘ kì-chài kóng,_x0009_Beh ū Kiù-chú tùi Sûn-siâⁿ chhut,_x0009_Kóe-tû Ngá-kok ê put-khiân;

²⁷Koh góa tû-khì in ê chōe ê sî,_x0009_Che chiū-sī góa kap in só͘ li̍p ê iok.

²⁸Chiàu hok-im, chiū in ūi-tio̍h lín lâi chòe kiû-siû; chiàu kéng-soán, chiū in ūi-tio̍h lia̍t-chó͘ lâi tit-tio̍h thiàⁿ.

²⁹In-ūi Siōng-tè ê un-sù kap tiàu-lâng lóng bô thè-hòe.

³⁰Sī chhin-chhiūⁿ lín chêng bô sūn-ho̍k Siōng-tè, nā-sī taⁿ tùi in ê bô sūn-ho̍k lín tit-tio̍h lîn-bín,

³¹án-ni in taⁿ bô sūn-ho̍k, thang tùi lín ê tit-tio̍h lîn-bín, hō͘ in ia̍h tit-tio̍h lîn-bín.

³²In-ūi Siōng-tè í-keng ûi bān lâng tī bô sūn-ho̍k ê tiong-kan, tiâu-tî beh lîn-bín bān lâng.

³³Chhim-tîm ah! Siōng-tè ê tì-hūi kap kiàn-sek ê pù-ū ah! I ê phòaⁿ-toàn bōe chhek-to̍k-tit, I ê lō͘-tô͘ tui-chhē bōe tio̍h.

³⁴Chī-chūi chai Chú ê sim-chì? Chī-chūi kap I chham-gī? chī-chūi tāi-seng hō͘ I, tì-kàu hō͘ I pò-tap?

³⁵In-ūi bān mi̍h lóng chhut tī I, óa-khò I, kui tī I.

³⁶Goān I êng-kng kàu tāi-tāi. À-bēng.