Read Pa-khek-lé Pe̍h-ōe-jī Sèng-keng, 1933 - Barclay Taiwanese Bible, 1933 - Full Romanization I-hut-só. 5 Bible Online

I-hut-só. 5 - Pa-khek-lé Pe̍h-ōe-jī Sèng-keng, 1933 - Barclay Taiwanese Bible, 1933 - Full Romanization bible

I-hut-só. 5

¹Lín kì-jiân chòe Siōng-tè só͘ thiàⁿ ê kiáⁿ, tio̍h o̍h Siōng-tè.

²Iā tio̍h kiâⁿ tī jîn-ài, chhin-chhiūⁿ Ki-tok bat thiàⁿ lín, thòe lán hiàn ka-kī chòe lé-mi̍h chòe chè-sū, phang-phang tī Siōng-tè ê bīn-chêng.

³Nā-sī kan-îm kap it-chhè ê ù-òe, á-sī tham-sim, tī lín tiong-kan liân kóng-khí iā m̄ thang, chiah sī chiàu sèng-tô͘ só͘ ha̍p-gî ê;

⁴kiàn-siàu sū, kap phû-phiò ê ōe, á-sī hì-hiauh ê ōe, iā sī put-kai; khah hó tio̍h kóng kám-siā ê ōe.

⁵In-ūi lín khak-si̍t chai kìⁿ-nā îm-loān ê, á-sī ù-òe ê, á-sī tham-sim chiū-sī pài ngó͘-siōng ê, lóng bōe tit thang sêng-chiap ke-gia̍p tī Ki-tok kap Siōng-tè ê kok.

⁶Lín bo̍h-tit hō͘ lâng ēng bô-iáⁿ ōe só͘ khi-phiàn; in-ūi Siōng-tè ê siū-khì ūi-tio̍h chiah ê sū kàu tī pōe-ge̍k ê lâng.

⁷Só͘-í lín bo̍h-tit kap in ū hūn.

⁸In-ūi lín chêng sī àm, nā-sī taⁿ tiàm-tī Chú sī kng, tio̍h chiàu kng-bêng ê lâng lâi kiâⁿ,

⁹(in-ūi kng ê kiat-chí chāi-tī it-chhè ê hó kap gī kap chin),

¹⁰giām-bêng sím-mi̍h sī Chú só͘ hoaⁿ-hí ê.

¹¹Bo̍h-tit chham-chhap tī o͘-àm bô hāu-kó ê kiâⁿ-chòe, khah hó tio̍h chek-pī in;

¹²in-ūi in tī àm-chīⁿ só͘ kiâⁿ ê, liân kóng to͘ kiàn-siàu.

¹³To̍k-to̍k hoān sū siū chek-pī ê chiū-sī hō͘ kng só͘ hián-bêng; in-ūi kìⁿ-nā siū hián-bêng ê lóng sī kng.

¹⁴Só͘-í kóng, Khùn ê lâng tio̍h chhíⁿ, tùi sí-lâng tiong khí-lâi, chiū Ki-tok ê kng beh chiò lí.

¹⁵Só͘-í tio̍h chim-chiok khòaⁿ lín ê só͘ kiâⁿ sī cháiⁿ-iūⁿ, m̄ thang chhin-chhiūⁿ bô tì-sek ê,

¹⁶tio̍h chhin-chhiūⁿ ū tì-sek ê, tio̍h pó-sioh ki-hōe, in-ūi tong-kim ê sî-sè siâ-ok.

¹⁷Só͘-í m̄ thang gōng-gōng, tio̍h bêng-pe̍k sím-mi̍h sī Chú ê chí-ì.

¹⁸Iā bo̍h-tit chiú-chùi, ōe tì-kàu hòng-sù, sī tio̍h hō͘ Sèng Sîn chhiong-móa;

¹⁹ēng si, ēng koa, ēng sîn ê hù, tāi-ke saⁿ ìn-tap, ēng sim gîm si chok-ga̍k lâi o-ló Chú;

²⁰bān sū siông-siông tī lán ê Chú Iâ-so͘ Ki-tok ê miâ lâi kám-siā Pē Siōng-tè;

²¹tio̍h kèng-ùi Ki-tok lâi saⁿ sūn-ho̍k.

²²Chòe hū-jîn-lâng ê, tio̍h sūn-ho̍k ka-kī ê tiōng-hu, chhin-chhiūⁿ sūn-ho̍k Chú chi̍t iūⁿ.

²³In-ūi tiōng-hu chòe hū-jîn-lâng ê thâu, chhin-chhiūⁿ Ki-tok chòe kàu-hōe ê thâu, iā ka-kī chòe choân-thé ê Kiù-chú.

²⁴Chóng-sī kàu-hōe sūn-ho̍k Ki-tok, hū-jîn-lâng hoān sū iā tio̍h án-ni sūn-ho̍k tiōng-hu.

²⁵Chòe tiōng-hu ê, lín tio̍h thiàⁿ hū-jîn-lâng, chhin-chhiūⁿ Ki-tok thiàⁿ kàu-hōe, iā thòe i hiàn ka-kī,

²⁶beh hō͘ i chiâⁿ-sèng, sī ēng chúi ê sóe kap tō-lí lâi chheng-khì i,

²⁷beh chiong i hiàn hō͘ ka-kī chòe êng-kng ê kàu-hōe, bô tiám, bô jiàu-bīn, hit khoán lóng bô, chiū-sī sèng bô hâ-chhû.

²⁸Án-ni tiōng-hu tio̍h thiàⁿ i ê hū-jîn-lâng chhin-chhiūⁿ ka-kī ê sin-thé. Thiàⁿ ka-kī ê hū-jîn-lâng chiū-sī thiàⁿ ka-kī.

²⁹In-ūi bē bat ū lâng oàn-hūn ka-kī ê seng-khu, chiū-sī iúⁿ-chhī i, pó-sioh i, chhin-chhiūⁿ Ki-tok ê khoán-thāi kàu-hōe;

³⁰in-ūi lán chiū-sī I seng-khu ê pah-thé.

³¹In-ūi án-ni lâng beh lī-khui pē-bú, kiat-liân i ê bó͘, in nn̄g-ê beh chiâⁿ-chòe chi̍t thé.

³²Chit ê ò-biāu tōa ah; góa kóng i, lâi chí Ki-tok kap kàu-hōe.

³³Chóng-sī lín lâng-lâng sûi ê tio̍h thiàⁿ i ê hū-jîn-lâng chhin-chhiūⁿ ka-kī; iā hū-jîn-lâng tio̍h kèng-ùi i ê tiōng-hu.