Read Pa-khek-lé Pe̍h-ōe-jī Sèng-keng, 1933 - Barclay Taiwanese Bible, 1933 - Full Romanization Thê-mô.-thài chiân 2 Bible Online

Thê-mô.-thài chiân 2 - Pa-khek-lé Pe̍h-ōe-jī Sèng-keng, 1933 - Barclay Taiwanese Bible, 1933 - Full Romanization bible

Thê-mô.-thài chiân 2

¹Só͘-í góa só͘ khoàn-bián ê, tē it chiū-sī thòe chèng lâng khún-kiû, kî-tó, kiû un, chiok-siā;

²thòe chiah ê ông kap lóng-chóng ê koaⁿ-hú kiû; hō͘ lán hoān sū kèng-khiân toan-chong, thang an-jiân thiâm-chēng lâi kè ji̍t.

³Che sī hó, koh tit-tio̍h chiap-la̍p tī kiù lán ê Siōng-tè ê bīn-chêng;

⁴I ài chèng lâng tit-tio̍h kiù, iā chhim chai chin-lí.

⁵In-ūi Siōng-tè sī chi̍t-ê, Siōng-tè kap lâng ê tiong-kan tiong-pó iā sī chi̍t-ê, chiū-sī chòe lâng ê Ki-tok Iâ-so͘;

⁶I ūi-tio̍h chèng lâng hiàn pún-sin, chòe thòe-sio̍k ê kè-chîⁿ, ū ki̍p-sî chèng-bêng;

⁷in-ūi án-ni góa siū siat-li̍p chòe soan-thoân ê, chòe sù-tô͘, ēng sìn ēng chin-si̍t chòe gōa-pang ê kàu-su; góa só͘ kóng sī chin-si̍t bô pe̍h-chha̍t.

⁸Só͘-í góa ài ta-po͘-lâng kia̍h-khí sèng ê chhiú, bô siū-khì bô giâu-gî, ta̍k só͘-chāi kî-tó;

⁹iā ài hū-jîn-lâng táⁿ-pān sò͘-sò͘, ēng liâm-thí siú-kí ka-kī chng-thāⁿ, m̄ sī ēng piⁿ thâu-mn̂g, kap kim-khì, á-sī chin-chu, á-sī ta̍t chîⁿ ê i-chiûⁿ;

¹⁰sī ēng hó só͘ kiâⁿ chòe chng-thāⁿ, che sī ka-kī jīn chòe kèng Siōng-tè ê hū-jîn-lâng só͘ ha̍p-gî ê.

¹¹Hū-jîn-lâng tio̍h thiâm-chēng, it-bī hâng-ho̍k lâi ha̍k-si̍p.

¹²Góa m̄ chún hū-jîn-lâng thoân-kàu, á-sī koán-hat ta-po͘-lâng, to̍k-to̍k tio̍h thiâm-chēng.

¹³In-ūi A-tong tāi-seng siū chō, jiân-āu chiah Hā-oa.

¹⁴Koh A-tong bô siū khi-phiàn, to̍k-to̍k hū-jîn-lâng siū khi-phiàn lâi hām-lo̍h chōe.

¹⁵Chóng-sī in nā tiàm-tī sìn kap jîn-ài kap chiâⁿ-sèng kiam chiat-chè, i chiū beh tùi siⁿ kiáⁿ lâi tit kiù.