Read Pa-khek-lé Pe̍h-ōe-jī Sèng-keng, 1933 - Barclay Taiwanese Bible, 1933 - Full Romanization Thê-to 3 Bible Online

Thê-to 3 - Pa-khek-lé Pe̍h-ōe-jī Sèng-keng, 1933 - Barclay Taiwanese Bible, 1933 - Full Romanization bible

Thê-to 3

¹Tio̍h hō͘ lâng kì-tit eng-kai hâng-ho̍k pān chèng-sū ê, chiáng-koân ê, lâi sūn-thān i, siông-siông piān lâi kiâⁿ ta̍k hāng ê hó sū,

²bô húi-pòng, bô saⁿ-chiⁿ, tio̍h un-hô, tùi chèng lâng hián-bêng ta̍k iūⁿ ê un-jiû.

³In-ūi lán chêng iā sī bû-ti, pōe-ge̍k, siū bê-he̍k, hâng-ho̍k tī pah-poaⁿ ê su-io̍k kap khoài-lo̍k, oa̍h tī ok-to̍k oàn-tò͘ ê tiong-kan, sī khó-ò͘ⁿ ê, iā tāi-ke saⁿ oàn-hūn.

⁴Nā-sī lán ê Kiù-chú Siōng-tè ê jîn-chû kap I ê thiàⁿ lâng hián-bêng ê sî,

⁵I chiū kiù lán, m̄ sī tùi tī lán só͘ kiâⁿ ê gī, sī chiàu I ê lîn-bín, tùi têng-thâu-siⁿ ê sóe kap Sèng Sîn ê ōaⁿ-sin,

⁶Sèng Sîn chiū-sī I tùi lán ê Kiù-chú Iâ-so͘ Ki-tok só͘ tōa-tōa kàng-lo̍h tī lán ê;

⁷hō͘ lán tùi I ê un lâi chheng-chòe-gī ê, thang chiàu éng-oa̍h ê ǹg-bāng lāi chiâⁿ-chòe hō͘-sû.

⁸Chit ê ōe sī chin-si̍t; koh lūn chiah ê sū góa ài lí ngī-ngī kan-chèng i, hō͘ sìn Siōng-tè ê lâng tì-ì chòe chiah ê hó ê sū-gia̍p. chiah-ê lóng sī hó, ū lī-ek lâng ê.

⁹Chóng-sī lí tio̍h siám-pī gōng-gōng ê piān-pok, sè-hē ê tâm-lūn, saⁿ-chiⁿ, kap ūi-tio̍h lu̍t-hoat ê cheng-chiàn; in-ūi chiah-ê sī bô lī-ek, koh khang-khang.

¹⁰Kiat-tóng ê lâng, í-keng kéng-kài i chi̍t pái koh chi̍t pái, chiū tio̍h kù-chāi i;

¹¹in-ūi chai chit hō lâng sī pōe-biū, ka-kī gí i ê chōe, iû-goân teh hoān.

¹²Góa chhe A-thê-má á-sī Chhui-ki-kó͘ khì chhē lí ê sî, lí tio̍h tì-ì kàu Ni-ko-pho-li̍p lâi chhē góa; in-ūi góa í-keng tiāⁿ-tio̍h tī hia kè tang-thiⁿ.

¹³Hoat-lu̍t-su Se-la̍p kap A-pho-lô, lí tio̍h tì-ì kā i sòng-hêng, hō͘ in bô khiàm-kheh.

¹⁴Koh lán chiah ê lâng tio̍h ha̍k-si̍p chòe hó ê sū-gia̍p, lâi pī-pān hiah ê tek-khak tio̍h ê só͘-hùi, bián-tit bô kiat-si̍t.

¹⁵Kap góa tī-teh ê lâng lóng chhéng-an lí. Hoān-nā tī sìn lâi thiàⁿ goán ê lâng lí tio̍h chhéng-an in. Goān un-tián kap lín chèng lâng saⁿ-kap tī-teh.