Read Pa-khek-lé Pe̍h-ōe-jī Sèng-keng, 1933 - Barclay Taiwanese Bible, 1933 - Full Romanization Ngá-koh 3 Bible Online

Ngá-koh 3 - Pa-khek-lé Pe̍h-ōe-jī Sèng-keng, 1933 - Barclay Taiwanese Bible, 1933 - Full Romanization bible

Ngá-koh 3

¹Góa ê hiaⁿ-tī ah, m̄ thang chōe-chōe lâng chòe sian-siⁿ, in-ūi chai lán beh siū khah tāng ê sím-phòaⁿ.

²In-ūi lán chèng lâng tī chōe-chōe hāng poa̍h-tó. Tī kóng ōe bô poa̍h-tó ê, chiū-sī chòe oân-choân ê lâng, iā ōe iok-sok i thong seng-khu.

³Lán hē bé-kā-kiuⁿ tī bé ê chhùi, hō͘ in sūn-thàn lán, chiū koán-hat in thong seng-khu.

⁴Koh, lí khòaⁿ, hiah ê chûn, sui-jiân hiah tōa chiah, hō͘ tōa hong sàu i, iû-goân sī ēng sòe-sòe ê tōa hō͘ i tńg-oat, chiàu tāi-kong ê ì-sù só͘ ài.

⁵Án-ni chi̍h sī sòe-sòe ê thé, iáu-kú kóng tōa ōe. Lí khòaⁿ, sió-khóa ê hé sio chhiū-ba̍k jōa chōe ah!

⁶Chi̍h chiū-sī hé, tī lán pah-thé tiong chòe put-gī ê sè-kài, phah lah-sap thong seng-khu, it-seng ê hêng-tōng tūi i hoat hé; i ka-kī ê hé sī tùi tē-ge̍k hoat.

⁷In-ūi ta̍k lūi ê cháu-siù, pe-chiáu, thâng-thōa, chúi-cho̍k, lóng siū chè-ap, iā í-keng hō͘ jîn-lūi chè-ap.

⁸To̍k-to̍k chi̍h bô lâng ōe chè-ap; sī bô thêng-hioh ê pháiⁿ mi̍h, ū sí ê to̍k móa-móa.

⁹Lán ēng i o-ló Chú, chiū-sī Pē, koh ēng i chiù-chó͘ lâng, chiū-sī chiàu Siōng-tè ê khoán-sit lâi chhòng-chō ê.

¹⁰O-ló kap chiù-chó͘ siāng chi̍t ê chhùi chhut. Góa ê hiaⁿ-tī ah, che sī m̄ eng-kai.

¹¹Chúi-chôaⁿ kiám ōe tùi siāng chi̍t khang lâu chhut tiⁿ-ê khó͘-ê mah?

¹²Góa ê hiaⁿ-tī ah, bû-hoa-kó chhiū ōe siⁿ kaⁿ-ná mah? á-sī phû-tô chhiū ōe siⁿ bû-hoa-kó mah? án-ni tùi kiâm-ê lâu-chhut chiáⁿ-ê iā bōe-ōe.

¹³Lín tiong-kan chī-chūi ū tì-hūi kiàn-sek ê ah? chiū tio̍h ēng tì-hūi ê un-jiû, tùi hó ê phín-hēng, lâi hián-bêng i ê só͘ kiâⁿ.

¹⁴Lín sim-lāi nā khǹg ok-to̍k ê oàn-tò͘ kap saⁿ-chiⁿ, chiū bo̍h-tit khoa-kháu, bo̍h-tit pe̍h-chha̍t lâi ge̍k chin-lí.

¹⁵Chit hō tì-hūi m̄ sī tùi téng-bīn lâi ê, sī sio̍k tī chōe, sio̍k tī hiat-khì, sio̍k kúi ê khoán.

¹⁶In-ūi tī sím-mi̍h só͘-chāi ū oàn-tò͘ kap saⁿ-chiⁿ, chiū tī hia ū jiáu-loān kap it-chhè ê pháiⁿ sū.

¹⁷To̍k-to̍k tùi téng-bīn ê tì-hūi, it sī chheng-kiat, iáu-ê sī hô-pêng, un-jiû, hó siong-liông, ū lîn-bín kap hó ê ké-chí móa-móa, bô phian-thán, bô ké-hó.

¹⁸Koh gī ê ké-chí sī chāi-tī hô-pêng, kā kiâⁿ hô-pêng ê lâng lâi chèng.