Read Pa-khek-lé Pe̍h-ōe-jī Sèng-keng, 1933 - Barclay Taiwanese Bible, 1933 - Full Romanization Pí-tek chiân 4 Bible Online

Pí-tek chiân 4 - Pa-khek-lé Pe̍h-ōe-jī Sèng-keng, 1933 - Barclay Taiwanese Bible, 1933 - Full Romanization bible

Pí-tek chiân 4

¹Taⁿ Ki-tok kì-jiân tī jio̍k-thé siū khó͘, chiū lín iā tio̍h ēng chit hō sim-chì chòe chiàn-khì; in-ūi í-keng tī jio̍k-thé siū khó͘ ê, ū kap chōe soah;

²tì-kàu lín chit tia̍p í-āu, tī jio̍k-thé iáu oa̍h ê sî-ji̍t, bô thàn lâng ê su-io̍k, sī thàn Siōng-tè ê chí-ì.

³In-ūi í-chêng ê ji̍t, lín thàn gōa-pang lâng ê ì-ài, kiâⁿ tī siâ-îm, su-io̍k, chiú-chùi, hòng-chhiòng, iàn-lo̍k, kap chiah ê ge̍k-hoat pài ngó͘-siōng ê sū, sî í-keng kàu-gia̍h lah;

⁴taⁿ lín m̄ kap in cháu kàu tī pîⁿ-pîⁿ hòng-tōng ê ke̍k-thâu, in chiū ūi-tio̍h án-ni kî-koài lâi húi-pòng:

⁵in beh tùi hit ê piān-piān beh sím-phòaⁿ oa̍h-lâng sí-lâng ê Chú lâi ka-kī pâi-lia̍t.

⁶In-ūi hok-im iā bat thoân hō͘ sí-lâng, sī beh hō͘ in tī jio̍k-thé chiàu lâng siū sím-phòaⁿ, tī sîn chiàu Siōng-tè ōe oa̍h.

⁷Nā-sī bān sū ê kiat-kio̍k kūn lah; só͘-í tio̍h chū-chāi, chiat-chè lâi kî-tó;

⁸tē it iàu-kín tāi-ke tio̍h chhiat-chhiat saⁿ-thiàⁿ;

⁹in-ūi thiàⁿ sī jia-khàm chōe-chōe chē-kòa; tāi-ke saⁿ chiap-thāi, bo̍h-tit nga̍uh-nga̍uh liām;

¹⁰ta̍k lâng chiàu só͘ siū ê un-sù saⁿ ho̍k-sāi, chòe Siōng-tè pah-poaⁿ un-tián ê koán-ke;

¹¹nā ū soan-káng ê, tio̍h chhin-chhiūⁿ soan-káng Siōng-tè ê chiàu-bēng; ū saⁿ ho̍k-sāi ê, tio̍h chhin-chhiūⁿ ēng Siōng-tè só͘ siúⁿ-sù ê la̍t: hō͘ Siōng-tè tùi Iâ-so͘ Ki-tok tī bān sū ōe tit-tio̍h êng-kng; I ū êng-kng, ū koân-lêng, kàu tāi-tāi bô soah. À-bēng.

¹²Só͘ thiàⁿ ê hiaⁿ-tī ah, tī lín tiong-kan só͘ ū chhin-chhiūⁿ hé ê chhì-liān, m̄ thang kî-koài i, ná chhin-chhiūⁿ tú-tio̍h hui-siông ê sū:

¹³to̍k-to̍k tio̍h in-ūi ū hūn tī Ki-tok ê kan-khó͘, lâi hoaⁿ-hí; hō͘ lín iā tī I êng-kng hián-hiān ê sî hoaⁿ-hí khoài-lo̍k.

¹⁴Lín ūi-tio̍h Ki-tok ê miâ hō͘ lâng mē, ū hok-khì; in-ūi êng-kng ê sîn chiū-sī Siōng-tè ê Sîn, an-hioh tī lín.

¹⁵In-ūi lín tiong-kan m̄ thang ū lâng ūi-tio̍h chòe hiong-siú, chòe chha̍t, kiâⁿ pháiⁿ, á-sī in-ūi chhap pa̍t lâng ê sū, lâi siū-khó͘:

¹⁶chóng-sī lâng nā ūi-tio̍h sī Ki-tok-tô͘ lâi siū khó͘, chiū bo̍h-tit kiàn-siàu, tio̍h tī chit ê miâ kui êng-kng Siōng-tè.

¹⁷In-ūi sî kàu lah, sím-phòaⁿ tùi Siōng-tè ê ke tāi-seng; nā sī tùi lán khí-thâu, chiū hiah ê m̄ sìn-thàn Siōng-tè hok-im ê lâng, in ê kiat-kio̍k beh cháiⁿ-iūⁿ ah!

¹⁸Gī ê lâng nā lím-lím tit kiù, chiū bô kèng-khiân ê, kap ū chōe ê lâng, beh khiā tī sím-mi̍h só͘-chāi ah?

¹⁹Só͘-í chiàu Siōng-tè ê chí-ì siū khó͘ ê, tio̍h ēng hó phín-hēng, chiong in ê lêng-hûn kau-tāi sìn-si̍t chō-hòa ê Chú.