Read Pa-khek-lé Pe̍h-ōe-jī Sèng-keng, 1933 - Barclay Taiwanese Bible, 1933 - Full Romanization Su-sū-kì 21 Bible Online

Su-sū-kì 21 - Pa-khek-lé Pe̍h-ōe-jī Sèng-keng, 1933 - Barclay Taiwanese Bible, 1933 - Full Romanization bible

Su-sū-kì 21

¹Í-sek-lia̍t lâng tī Bí-su-pa bat chiù-chōa kóng, Goán tiong-kan bô chi̍t-lâng beh ēng cha-bó͘-kiáⁿ kè hō͘ Piān-ngá-bín lâng.

²Peh-sìⁿ lâi kàu Pek-te̍k-lī, tī-hia chē tī Siōng-tè ê bīn-chêng, kàu ê-hng, chhut-siaⁿ tōa thî-khàu; kóng,

³Iâ-hô-hoa Í-sek-lia̍t ê Siōng-tè ah, kin-á-ji̍t tī Í-sek-lia̍t tiong kiám chi̍t chi-phài; Í-sek-lia̍t tiong siáⁿ-sū ū chit ê sū ah?

⁴Keh-ji̍t thiⁿ-kng-chá peh-sìⁿ khí-lâi, tī-hia khí chi̍t chō tôaⁿ, hiàn sio-chè kap pêng-an-chè.

⁵Í-sek-lia̍t lâng kóng, Tī Í-sek-lia̍t chèng chi-phài tiong, chī-chūi bô kap hōe-chiòng chiūⁿ-khì Iâ-hô-hoa hia? In-ūi in tōa chiù-chōa kóng, Kìⁿ-nā bô chiūⁿ Bí-su-pa kàu Iâ-hô-hoa ê bīn-chêng ê, tio̍h hō͘ i sí.

⁶Í-sek-lia̍t lâng ūi-tio̍h in ê hiaⁿ-tī Piān-ngá-bín lâng thè-hóe, kóng, Kin-á-ji̍t Í-sek-lia̍t tiong choa̍t chi̍t chi-phài lah.

⁷Lán í-keng kí Iâ-hô-hoa lâi chiù-chōa, bô beh ēng cha-bó͘-kiáⁿ kè in, taⁿ chiū in só͘ chhun ê lâng, lán beh tùi toh-lo̍h hō͘ in ū bó͘ ah?

⁸Koh kóng, Í-sek-lia̍t chiah ê chi-phài tiong, toh-lo̍h chi̍t-ê bô chiūⁿ Bí-su-pa kàu Iâ-hô-hoa hia? In chiū chhâ-chhut Ki-lia̍t-ngá-pí bô chi̍t-lâng kàu iâⁿ-lāi hōe-chiòng hia.

⁹In-ūi tiám-sǹg peh-sìⁿ ê sî, hiah ê khiā-khí tī Ki-lia̍t-ngá-pí ê lâng, bô chi̍t-ê tī-hia.

¹⁰Hōe-chiòng chiū chhe chi̍t-bān nn̄g-chheng tōa-la̍t ê ióng-sū, hoan-hù in kóng, Lín khì ēng to thâi-sí khiā-khí tī Ki-lia̍t-ngá-pí ê lâng, í-ki̍p hū-jîn-lâng gín-ná;

¹¹lín só͘ tio̍h-kiâⁿ-ê chiū-sī án-ni; tio̍h chiong it-chhè ê ta-po͘ lâng, kap hiah ê bat kap ta-po͘ lâng tâng-pâng ê cha-bó͘-lâng it-chīn thâi-sí.

¹²In tī Ki-lia̍t-ngá-pí lâng ê tiong-kan tú-tio̍h sì-pah ê bē kap ta-po͘-lâng tâng-pâng ê chāi-sek-lú; chiū tòa kàu Ka-lâm tōe Sī-lô ê kun-iâⁿ.

¹³Choân-hōe chhe lâng kā Lîm-bûn chio̍h-pôaⁿ ê Piān-ngá-bín lâng kóng, ēng hô-pêng ê ōe pò in.

¹⁴Hit-sî Piān-ngá-bín lâng tò-lâi; Í-sek-lia̍t lâng chiū chiong só͘ lâu hō͘ i oa̍h Ki-lia̍t-ngá-pí ê cha-bó͘-gín-ná kè hō͘ in; iáu-kú bô kàu-gia̍h.

¹⁵Peh-sìⁿ ūi-tio̍h Piān-ngá-bín lâng chiū thè-hóe; in-ūi Iâ-hô-hoa hō͘ Í-sek-lia̍t chi-phài khih chi̍t-kak.

¹⁶Hōe-tiong ê tióng-ló kóng, Piān-ngá-bín tiong ê hū-lú í-keng châu-bia̍t; taⁿ chiū in só͘ chhun ê lâng lán beh tùi toh-lo̍h hō͘ in ū bó͘ ah?

¹⁷Koh kóng, Piān-ngá-bín tô-cháu ê lâng iû-goân tio̍h ū gia̍p hō͘ in, bián-tit Í-sek-lia̍t tiong choa̍t chi̍t chi-phài.

¹⁸Chóng-sī lán bōe-ōe chiong ka-kī ê cha-bó͘-gín-ná hō͘ in chòe bó͘; in-ūi Í-sek-lia̍t lâng bat chiù-chōa kóng, Ēng cha-bó͘-kiáⁿ kè hō͘ Piān-ngá-bín lâng--ê, tio̍h siū chiù-chó͘.

¹⁹In koh kóng, Tī Lī-pho-ná ê lâm--sì, Pek-te̍k-lī ê pak--sì, chiū-sī tùi Pek-te̍k-lī khì Sī-kiàm tōa-lō͘ tang--sì ê Sī-lô, ta̍k-nî ū Iâ-hô-hoa ê choeh-kî.

²⁰Chiū hoan-hù Piān-ngá-bín lâng kóng, Lín tio̍h khì, bih tī phû-tô-hn̂g-tiong;

²¹nā khòaⁿ-kìⁿ Sī-lô ê cha-bó͘-gín-ná chhut-lâi thiàu-bú, lín tio̍h tùi phû-tô-hn̂g chhut-lâi, tī Sī-lô ê lú-chú-tiong ta̍k-lâng chhiúⁿ chi̍t-ê chòe bó͘, tò--khì Piān-ngá-bín tōe.

²²In ê hū-heng nā lâi tùi goán kò-sò͘, goán beh tùi in kóng, Chhiáⁿ lín tòa-tio̍h goán, lâi un-tián in; in-ūi chêng kau-chiàn ê sî, bô lâu cha-bó͘-gín-ná hō͘ in ta̍k-lâng chòe-bó͘; taⁿ iā m̄-sī lín hō͘ in; nā sī, lín chiū ū chōe.

²³Piān-ngá-bín lâng chiū chiàu án-ni kiâⁿ, chiàu in ê lâng-gia̍h tùi thiàu-bú ê cha-bó͘-gín-ná tiong só͘-lia̍h-ê chhōa in chòe-bó͘, chiū tò--khì in pún-tōe; koh khí siâⁿ lâi khiā-khí hia.

²⁴Hit-sî Í-sek-lia̍t lâng lī-khui hia, ta̍k-lâng tò--khì in ê chi-phài, in ê chong-cho̍k; tùi hia chhut-lâi ta̍k-lâng tò-khì in pún-tōe.

²⁵Tng hit-sî Í-sek-lia̍t-tiong bô ông; ta̍k-lâng chiàu i só͘ khòaⁿ-chòe tio̍h-ê lâi kiâⁿ.17