Read Pahari, Kullu मत्ती 14 Bible Online

मत्ती 14 - Pahari, Kullu bible

मत्ती 14

¹तेई बौगतै गलील देशा रै चौथाई हिस्से रै राज़ा हेरोदेसै ज़ैबै यीशु रै बारै न शुणू,

²ता तेइयै आपणै सेवका बै बोलू, “ऐ यूहन्ना बपतिस्मै देणु आल़ा सा ज़ो मूँऐंदै न ज़िन्दा हुआ सा होर ऐण्ढै चमत्कारै रै कोम केरदा लागा सा।”

³ऐ सौऐ हेरोदेस राज़ा सा ज़ुणियै आपणै भाई फिलिप्पुस री लाड़ी हेरोदियासा री बजहा न यूहन्ना बँदी बणाईया शाँगीयै बोनिआ कैदखानै न पाऊ ती,

⁴किबैकि यूहन्नै तेइबै आपणै भाई री लाड़ी हेरोदेसै रखणै री तैंईंयैं नाँह केरू ती कि ऐण्ढा केरना तेरी तैंईंयैं ठीक नी ऑथि।

⁵एसा बजहा न राज़ा हेरोदेस यूहन्ना बै मारना चाहा ती पर सौ लोका न डौरा ती, किबैकि ते यूहन्ना बै भविष्यवाणी केरनु आल़ा मना ती।

⁶पर ज़ैबै हेरोदेस राज़ा रा जन्म ध्याड़ा आऊ, ता हेरोदेसै री शोहरीये हरोदेस होर तेइरै पाहुँणै सामनै नौच़िया हेरोदेस राज़ा खुश केरू।

⁷तैबै हेरोदेस राज़ै कसम खाईया तेसा बै बोलू कि, “ज़ो किछ़ तू मुँगली, हांऊँ वचन देआ सा मूँ सौ तौभै देणा।”

⁸सौ आपणी आमा री गैला न एज़िया तेसै बोलू, “मुँभै थाई न रखिया यूहन्ना बपतिस्मा देणु आल़ै री मुँडी दै।”

⁹राज़ा बोहू दु:खी हुआ पर आपणी कसमी री बजहा सैंघै होर सैंघै बेठैंदै लोका री बजहा न तेइयै तेसरी माँग पूरी केरनै रा हुक्म धिना।

¹⁰हेरोदेस राज़ै कैदखानै बै यूहन्नै री मुँडी काटणै री तैंईंयैं मांहणु भेज़ै।

¹¹यूहन्नै री मुँडी काटी, होर थाल़ू न पाईआ आंणी होर शोहरी हागै धिनी। तेसै सौ मुँडी आपणी आमा हागै नैंई।

¹²तैबै यूहन्नै रै च़ेले आऐ होर तिन्हैं तेइरी लाश नेइया पौथी होर ज़ाइआ यीशु बै दसू।

¹³ज़ैबै यीशुऐ यूहन्नै रै बारै न शुणू ता सौ किश्ती पैंधै च़ढ़िया सुनसान ज़ैगा बै नौठा, ऐ शुणिया लोका ग्राँ-ग्राँ न एज़िया पैदल यीशु पिछ़ै च़लै।

¹⁴यीशु ज़ैबै किश्ती न बाहरै आऊ, ता लोकै री बोहू बड़ी भीड़ हेरिया तिन्हां पैंधै दया केरी, होर तेइयै तिन्हां सैंघलै बीमार मांहणु ठीक केरै।

¹⁵ज़ैबै सौंझ़ हुई ता तेइरै च़ेले एज़िया बोलू, “ऐ सुनसान ज़ैगा सा होर बड़ी देर हुई सा तू इन्हां लोका बै विदा केर ताकि ते ग्राँ न ज़ाइआ आपणै खाँणै रा होर रौहणै रा इंतज़ाम केरलै।”

¹⁶पर यीशुऐ तिन्हां बै बोलू, “इन्हरा जाँणा ज़रूरी नी ऑथि। तुसै इन्हां बै किछ़ खाँणै बै दैआत्।”

¹⁷च़ेले यीशु बै बोलू, “आसा हागै सिर्फ़ पौंज़ रोटी होर दूई मैच्छ़ी सी।”

¹⁸यीशुऐ बोलू, “तिन्हां मूँ हागै आंणा।”

¹⁹तेइयै भीड़ै रै लोका बै गाह पैंधै बैशणै बै बोलू। तैबै यीशुऐ पौंज़ रोटी होर दूई मैच्छ़ी लेइया स्वर्गा धिराबै हेरिया रोटी होर मैच्छ़ी री तैंईंयैं परमेश्वरा रा धन्यवाद केरू। तैबै रोटी चोड़िया आपणै च़ेले बै धिनी होर च़ेले ते लोका बै बौंडी।

²⁰होर सैभ खाईया रोज़ै। होर तिन्हैं च़ेले बच़ीदी रोटी न भौरुइन्दी बारा टोकरियाँ च़की।

²¹बेटड़ी होर शोहरू छ़ौड़िआ तौखै खाँणु आल़ै कोई पौंज़ हज़ार मर्द ती।

²²एथा न बाद यीशुऐ तुरन्त आपणै च़ेले किश्ती पैंधै बशाइया आपु न पैहलै गलील ज़िलै री समुन्द्रा पारै बै भेज़ै, ज़ाँ तैंईंयैं कि यीशु लोका बै विदा केरलै।

²³भीड़ै रै लोका बै विदा केरै न बाद यीशु केल्हा प्रार्थना केरदा ढौगा पैंधै बै नौठा। सौंझ़की घेरै यीशु तौखै केल्हा ती।

²⁴तेई बौगत किश्ती समुन्द्रा मौंझ़ै पाणी री लैहरा सैंघै डगमगाँदी लागी ती किबैकि बागर सामनै धिरै न च़लदी लागी ती।

²⁵राती कोई च़ोऊथै पौहरै यीशु समुन्द्रा न निकल़िया तिन्हां हागै आऊ।

²⁶तेइरै च़ेले ज़ैबै सौ झ़ीला पैंधै च़लदा हेरू ता ते डौरै होर बोलदै लागै, “ऐ ता कोई भूत सा।” ते डौरै लाइया लेरा मारदै लागै।

²⁷यीशुऐ तिन्हां सैंघै गैला केरी होर बोलू, “हौंसला रखा ऐ हांऊँ सा होर मता डौरदै।”

²⁸पतरसै तेइबै बोलू, “अगर तुसै सी ता मुँभै पाणी पैंधै च़लिया आपु हागै ऐणै बै बोल।”

²⁹यीशुऐ बोलू, “एज़।” पतरस किश्ती न उतरिआ पाणी पैंधै यीशु धिराबै च़लू।

³⁰पर सौ बागरी ब्यानै हेरिया डौरू। सौ डुबदा लागा होर सौ चिलाऊ, “ओ प्रभु जी मुँभै बच़ात्।”

³¹यीशुऐ तुरन्त आपणै हौथै लाइया ढौकू होर बोलू, “ओ थोड़ै बशाह केरनु आल़ै तैं आपणै मना न शक किबै केरू?”

³²ज़ैबै ते किश्ती पैंधै च़ढ़ै ता बागर रूकी।

³³किश्ती पैंधै ज़ो लोका ती, तिन्हैं यीशु बै प्रणाम केरु होर बोलू, “तू सच़, परमेश्वरा रा बेटा सा।”

³⁴ते समुन्द्रा पार उतरिआ गन्नेसरत देशा न पूज़ै।

³⁵तौखलै लोकै सौ पछ़ियाणु होर औरै-पौरै सैभ ज़ैगा तेइरै ऐणै री खबर भेज़ी ताकि सारै बीमार मांहणु बै तेई हागै आंणलै।

³⁶होर ते अर्ज़ा केरदै लागै कि तू आसाबै आपणै झिकड़ै रा पल्लू छ़ुँगणै दै; होर ज़ुणियै छ़ुँगू ते ठीक हुऐ।