Read Pahari, Kullu मत्ती 18 Bible Online

मत्ती 18 - Pahari, Kullu bible

मत्ती 18

¹तैबै यीशु रै च़ेले तेई हागै एज़िया पुछ़ू, “स्वर्ग रै राज्य न सैभी न बड़ा कुण सा?”

²तैबै यीशुऐ एक शोहरू आपु हागै शाधु होर तिन्हां मौंझ़ै खड़ा केरू,

³“हांऊँ तुसाबै सच़ बोला सा, ज़ैबै तैंईंयैं तुसै ऐई होछ़े शोहरू सांही नी बणलै स्वर्ग राज्य न नी ज़ाई सकदै।

⁴अगर कोई आपणै आपु बै ऐई बच्च़ै सांही नम्र बणा सा सौऐ स्वर्ग राज्य न सैभी न बड़ा सा।

⁵ज़ुण मेरी तैंईंयैं ऐण्ढै शोहरू बै ग्रहण केरा सा सौ मुँभै ग्रहण केरा सा।”

⁶“यीशुऐ भी बोलू, अगर कोई न तुसै पाप करवा सी, ज़ुण मूँ पैंधै बशाह केरा सी, ता परमेश्वरा तुसाबै सख्त सज़ा देणी, भलै सौ मांहणु होछ़ै शोहरू सांही होला, तेइरी तैंईंयैं ऐ भला सा कि एक बड़ा पौट तेई रै गौल़ा न बोनिआ, सौ समुन्द्र न शेटू लोड़ी।

⁷ठोकरा री बजहा न मुँभै दुनिया रै लोकै री तैंईंयैं दु:ख सा। परीक्षा ता ऐणी पर हाय सा! तेई मांहणु पैंधै ज़ौसरी बजहा न ठोकर लागा सा।

⁸अगर तेरै हौथ या ज़ोंघा तौभै ठोकर खिया सा ता तेइबै काटिया शेट किबैकि टुण्डै होर लँगड़ा होईया ज़ाणै न ता तेरै तैंईंयैं ऐ भला सा कि दुई हौथ ज़ोंघा होंदैआ नरका मौंझ़ै तेसा हमेशा री औगी न पाऊ लोड़ी ज़ुण कैधी भी हिशणै री नी ऑथि।

⁹होर अगर तुसै ज़ो हेरा सी सौ तुसाबै पापा री बजहा बणा सा तिन्हां च़ीजा बै हेरना बंद केरा! दुई औछ़ी रखणी होर नरकी री औगी न शेटिणै न ता कांणै होईया परमेश्वरा रै राज्य न प्रवेश केरना भला सा।”

¹⁰“होर हेरा, मेरै इन्हां होछ़ै च़ेले न कौसी बै भी बेकार हेरीत् समझ़दै। हांऊँ तुसाबै दसा सा कि इन्हरी हेर-शुण केरनु आल़ै स्वर्गदूतै री पहुँच स्वर्गा न मेरै परमेश्वर पिता हागै लगातार रौहा सा।

¹¹हांऊँ मांहणु रा बेटा भटकैंदै लोका रा उद्धार केरनै री तैंईंयैं आऊ सा।”

¹²“तुसै कि सोच़ा सी? अगर कौसी मांहणु हागै शौऊ भेड़ा सी, होर तिन्हां न एक भेड़ राहइली ता कि तेई नढ़ीनुऐ भेड़ा छ़ौड़िआ सौ एक भेड़ ढौगा न ज़ाइआ नी तोपणी?

¹³होर अगर सौ तेइबै मिला सा ता हांऊँ तुसाबै सच़ बोला सा, तेइबै ऐतरी खुशी तिन्हां नढ़ीनुऐ भेड़ै री तैंईंयैं नी होंणी ज़ो राहुईदी नी ती ऑथि पर एसा एकी भेड़ै री तैंईंयैं तेइबै बोहू खुशी होंणी।

¹⁴ऐण्ढी इच्छा स्वर्गै रै परमेश्वर पिता री भी सा कि कोई बी मांहणु नी भटकला।”

¹⁵अगर तेरा विश्वासी भाई तेरै खिलाफ़ अपराध केरा सा ता तेइबै केल्है न ज़ाइआ समझ़ा अगर सौ तेरी शुणला ता तैं आपणा भाई पाऊ।

¹⁶अगर सौ नी शुणला ता आपु सैंघै एक-दूई होर मांहणु नेइया ज़ा, किबैकि मूसा रै नियमा रै मुताबक, “हर एक शिकायत दुई या दुई न ज़ादा गुआही सामनै सच़ साबित होणी चेहिऐ।”

¹⁷अगर सौ तिन्हरी बी नी शुणला ता मण्डली बै दैस। अगर सौ मण्डली री भी नी शुणला ता तू तेइबै होरी ज़ाति होर च़ुँगी लेणू आल़ा बुझ़िया छ़ौड़ी दै।

¹⁸“हांऊँ तुसाबै सच़ बोला सा, ज़ो किछ़ तू एसा धौरती पैंधै बोनला, तेई स्वर्गा न बोनिणा होर ज़ो तू एसा धौरती पैंधै खोलला तेई स्वर्गा न खोलिणा।

¹⁹“हांऊँ तुसाबै ऐ भी दसा सा, अगर तुसा मौंझ़ै दूई मांहणु एसा धौरती पैंधै कौसी गैला री तैंईंयैं एक मन होईया प्रार्थना केरलै ता सौ बापू रै धिरै न ज़ो स्वर्गा न सा तिन्हरी तैंईंयैं होंणा।

²⁰किबैकि ज़ौखै मेरै नाँ न दूई या त्रा मांहणु कठा होआ सी तौखै हांऊँ तिन्हां सैंघै होआ सा।”

²¹तैबै पतरस यीशु हागै नौठा होर बोलू, “ओ प्रभु, अगर मेरा विश्वासी भाई मेरै खिलाफ़ अपराध केरदा रौहा सा ता मूँ सौ केतरी बार माफ केरना? अगर सौ सौत बार अपराध केरा सा ता तैबै भी?”

²²यीशुऐ बोलू, “सौत बार केल्ही नी बल्कि हांऊँ तौभै दैसा सा, हमेशा तू तेइबै माफ केर।”

²³“स्वर्ग राज्य री तुलना तेई राज़ै सैंघै केरी सका सी, ज़ुणियै आपणै नोकरा न हिसाब लेणा चाहू।

²⁴ज़ैबै तेइयै हिसाब लेणा शुरू केरू, ता तेई हागै एक ऐण्ढा मांहणु आंणु ज़ुणी हागै कई लाखा रा ऋण ती, ज़ुणिबै नोकर कैधी भी नी देई सकदा ती।

²⁵पर सौ तेथा बै चुकाई नी ती सकदा। तेइरै मालकै तेइरी लाड़ी, बाल-बच्च़ै होर ज़ायज़ाद बेच़िया ऋण पूरा केरनै रा हुक्म धिना।

²⁶ऐथा पैंधै तेइरा नोकर तेई राज़ै री ज़ोंघा पैंधै पौड़िया गिड़गिड़ाँदा लागा, होर बोलू, हे मालक, सब्र केरा, मूँ सारा ऋण चुकाणा।

²⁷तेई नोकरै रै मालक बै तेई पैंधै दया आई होर तेइरा ऋण माफ केरिया सौ छ़ौड़ी धिना।

²⁸“ज़ैबै सौ नोकर तौखै न ज़ाँदा लागा ती ता तेइबै तेइरा सैंघी एक होर नोकर मिलू ज़ुणिबै तेइयै लगभग शौऊ ध्याड़ी री मजदूरी बराबर ऋण धिना ती, तेइयै सौ गौल़ा न ढौकू होर तेइबै बोलू, ‘ज़ो मेरा ऋण तौ हागै सा तैई तू दै।’

²⁹तैबै तेइरै सैंघियै तेइरी ज़ोंघा पैंधै पौड़िया, तेईन अर्ज़ा केरदा लागा; कि सब्र केर मूँ तेरा ऋण देणा।

³⁰पर तेइयै नाँह केरू होर ज़ाँ तैंईंयैं तेइयै सौ ऋण नी चुकाऊ तेइयै सौ कैद भी कराऊ।

³¹होरा नोकर ऐ हेरिया बड़ै दु:खी हुऐ होर तिन्हैं ज़ाइआ एथै री खबर आपणै मालका बै धिनी।

³²“तैबै तेइरै मालकै सौ शाधु होर बोलू, ‘ओ दुष्ट नोकरा, तैं ज़ो मूँ सैंघै अर्ज़ केरी, मैं तौ पैंधै दया केरिया तेरा सारा ऋण माफ केरू।

³³ज़ैण्ढी दया मैं तौ पैंधै केरी तू भी तेई पैंधै केरी सका ती?’

³⁴तेइरै मालका बै बड़ी झ़िक आई होर तैबै तैंईंयैं सज़ा काटणै बै बोलू ज़ैबै तैंईंयैं कि सौ ऋण चुकाला नी।

³⁵“ज़ैबै तैंईंयैं तुसै पूरै मनै आपणै विश्वासी भाई रै अपराध माफ नी केरलै, ता मेरा बापू ज़ो स्वर्गा न सा, तुसा सैंघै भी तैण्ढाऐ केरना।”